20 Aho nyinya wa bagala ba Sebetayo mwahikira Yesʉ na bagala bʉwe n’ɨfʉkama embere sɨwe bʉshana n’ɨmʉshaba kɨnwa kɨgʉma. 21 Yesʉ mwamʉbʉtsya athɨ: «Ushondya ki?» Mwamʉshʉbɨtsya athɨ: «Wandabya wabya mo Bwamɨ bwawe, ʉhamʉle abagala baye babɨrɨ aba bikale, omʉgʉma ko lʉnda lwawe lw’amalyo n’ogʉndɨ ko lw’amalembe.» 22 Yesʉ mwashubya athɨ: «Muthetsi ekyo omʉshaba. Mwanganakotsya ɨshoma olwatha lwa malɨgo lo nyashoma?» Mobamʉshʉbɨtsya bathɨ: «Ega, thwangakotsya.» 23 Aho Yesʉ mwabwɨrabo athɨ: «Kwenene mwandashoma olwatha lwaye lwa malɨgo.20:23 Soma Mɨkolano 12:2. Hewethuwe erikatsya abandʉ ko lʉnda lwaye lw’amalyo kʉtse lw’amalembe, nyɨthalɨ ingye ngyo nyangahamʉla. Nɨ Gongo yowene yo wandahira abandʉ athangaga ithegekania ko myʉnda eyo.»
24 Abandɨ bɨga ikumi babere bonvwa ebyo, mobatsɨbʉkɨra bagala ba Sebetayo abo. 25 Aho Yesʉ mwabɨrɨkɨrabo n’ɨbwɨrabo athɨ: «Mwetsi ko abakʉlʉ b’abandʉ b’ebɨhanda abanathegeka abandʉ mʉ kahatho, n’abakʉlʉ babo abanikala kʉbo. 26 Aho ebyo bɨthatholere ibya bithyo mo kathi kenyu. He omʉndʉ amashondya ibya mʉkʉlʉ mw’imwe, lɨtholere niabya mukoli enyu. 27 Na mʉndʉ mʉlebe amashondya ibya mʉmbere mw’imwe, lɨtholere niabya mʉkobe enyu. 28 Ni bathyo ko Mʉgala w’oMʉndʉ ahikaga, lɨthalɨ ɨkolerwa, hewethuwe ɨkolerana n’ɨhana obʉyɨngo bʉwe bubye ndihi bʉshana n’ɨshabʉla bandʉ bangɨ.»20:28 Soma 26:28; 1Tiomote 2:6.