1 Samuel 1

Samweli gewo

1 Ete ɛkɩ ɛ sara Ramatami-Sufim gɛtɛ wʋ̀ sa Efrayim wodon wuu koro fɔ. Bee kpèlè wɔ̀ alɛ Elikana, wote n di Yeroma, gɛ wotu n di Elihu. Elihu wote n di Tohu gɛ Tohu wote e ye Sufi dɩkpaara gɛtɛ di ye Efrayim wofoli waanɩ fɔ. 2 Elikana e to bɛna bɛnyɔɔ. Bee kpèlè ɛkɩ Hana, gɛ bee kpèlè edo Penina. Penina e wo bebi, mɔ Hana en wo. 3 Gɩkyan n di gɩkyan fɔ, Elikana ee ye wo ditele daanɩ ɛ bʋn ɛ san ɛ ma sʋma Yahwe-Kpatakpɩrɩ, fɔ ɛ tɛ wɔ gedi Silo ditele daanɩ. Dʋkɔ gɛ Eli bebi-teni bɛnyɔɔ gɛtɛ bee kpèlè bɛ alɛ Hofini ma Finehasisi bè di gedi gɩɩ bɛtɛlɛ tɛ Yahwe fɔ. 4 Ɔya-kamasɛ gɛtɛ Elikana ɛɛ tɛ gedi fɔ, ɛɛ tɛ wɔsɔ Penina woyo gedikʋn fɔ ɛ̀ tɛ wo bebi-teni ma wo bebi-nanɩ mɔ booyo adikʋn. 5 Mɔ Hana bɩrɛ, ɛɛ tɛ wɔ gedikʋn gɛtɛ gii di gʋnʋn yema ee len wade ma gɛtɛ Yahwe ɛn yɛ wɔ èè wura ebi gba fɔ. 6 Gɛtɛ Yahwe ɛn tɛ Hana gewo okoro, wosugbe Penina ɛɛ tɩ̀ ka gewo gaade e toro wɔ gɛtɛ wàà ka sa wɔ owurufa. 7 Gɛlɛ gɛ wʋʋ mɛ gɩkyan n di gɩkyan. Ɔya kamasɛ gɛtɛ Hana ɛ̀ bʋn ɛ san Yahwe Dikwo-dɩrɛ fɔ, wosugbe Penina ɛɛ dɔ ade ɛ sa wɔ owurufa gɛtɛ wʋʋ yɛ wɔ eè wula gɛ ɛn taa di. 8 Wʋ̀ ba gɛlɛ fɔ wɔsan Elikana ee lila wɔ alan, <<Hana, anʋn yii koro gɛ aa wula? Anʋn yii koro gɛ an taa di? Anʋn yii koro gɛ a mʋnya? Okoro nmɩ, mɩn da bebi-tenibi fwo tɛ wɔ̀?>>

9 Duwi dɩkɩ, gɛtɛ be di, gɛ bɛ nyʋn be were Yahwe Dikwo-dɩrɛ fɔ daanɩ Silo ditele fɔ, Hana ɛ tɔ ee tiri onyun. Fɔ, gedi gɩɩtɛlɛ Eli è si gɛbɩya gii koro ɛ̀ kpasa ma Yahwe Dikwo-dɩrɛ fɔ diitunu-yon. 10 Dɩkpʋkpʋ-dɩrɛ di sere Hana, gɛ e wula gepepe e tiri onyun ɛ tɛ Yahwe. 11 Gɛ ɛ kan ntam ɛ dɔ̀ alan, <<Oo, Yahwe-kpatakpɩrɩ, gengyi à nya nmɩ aasʋgʋgyan, maayenpu-de nyayɩ gɛ à kʋna mɩɩn koro, gɛ an finla nmɩ aasʋgʋgyan, gɛ à tɛ mɩ ebi-teni fɔ, nan ka wɔ n tɛ awɔ Yahwe, fɔ ɛ̀ɛ̀ sʋma wɔ̀, wɔ nkpa wawi powu yaanɩ. Gɛ bɛn nan ka Ɔhayɩ (Biledi) bɛ wɔrɔ wɔ duyu bɛ nya.>>

12 Ɔkʋna gɛtɛ Hana ɛ̀ sangba ee tiri onyun ɛ tɛ Yahwe fɔ, Eli ɛɛ nya wonyun. 13 Hana ee tiri onyun woturu waanɩ, gɛ wonyun wʋʋ tɔ wʋ gbɛrɛ mɔ bɛn ta nʋn ade gɛtɛ ɛɛ dɔ, okoro Eli ɛ̀ nyɩ̀ alɛ e suu gɛ bʋkan. 14 Okoro Eli ɛ dɔ̀ wɔ alan, <<Ma sere ɔya-mɔmɔ gɛ aà kere bʋkan bʋʋ gɛnyʋn-suu a ya? Kere bʋkan bʋʋ gɛnyʋn-suu ya.>> 15 Gɛ Hana e tiri ade fɔ yiinyun alan, <<Kwa, miinfonte, mɩn taa nyʋn wayɩn abɛɛ bʋkan ma ɔkɛma. Ade n tɛ taga mɩ miinturu waanɩ. Gɛlɛ wuu koro gɛ ǹ de miinturu waanɩ waade ǹ tɛ sɩ̀ Yahwe bʋnʋn. 16 Kara sa amɩnlɛ alɛ aasʋgʋgyan è di ɛnanɩ basaa. Mɩɩn dɩyɩyɛ ma mɩɩn dɩfana dii koro gɛ ǹ te tiri onyun nyawʋ anlɛ.>> 17 Gɛ Eli e tiri wuunyun alan, <<San olila waanɩ! Tii Wurubwarɛ ɛ tɛ wɔ̀ gɩnyan gɛtɛ a lila wɔ fɔ.>> 18 Ɛwʋ gɛ Hana ɛ dɔ̀ wɔ alan, <<Wula nmɩ aasʋgʋgyan gutunkoro.>> Dʋkɔ gɛ Hana ɛ da, gɛ ɛ ma len anyandilɛ e di, gɛ wo koro gɩ nʋ̀n wɔ. 19 Kere-kpalɛ gagyɩgyan-fuu fɔ Elikana ma wɔ bɛfʋrɩ bɛ tɔ bɛ ma sʋma Yahwe. Gɛ be biri bɛ da bɔɔlɛ Rama ditele daanɩ. Elikana ɛ dʋrɔ ma wɔsɔ Hana. Gɛ Yahwe ɛ kʋna Hana wo koro. 20 Wun di awi fɔ, Hana e ton diboro, gɛ e wo ebi-tenibi. Ɛwʋ gɛ ɛ sa wɔ diyere alɛ Samweli, gɛtɛ wuu wùlà alɛ, <<Na lila wɔ na ye Yahwe wakʋn.>>

Hana e tiri Samweli ɛ sɩ̀ ɛ mɛ fɩrɩnfɩrɩn ɛ tɛ Yahwe

21 Gɛtɛ Elikana ma wɔ bɛnɩ be biri bɛ bʋn bɛ san bàà ma tɛ Yahwe gedi, fɔ èè le wɔ ntam fɔ wo koro fɔ, 22 Hana ɛn san. Ɛ dɔ̀ wɔsan alan, <<Gengyi ǹ bɔ ǹ tigi ebi fɔ dɩnyʋn fɔ, nan ka wɔ n ma tɛ Yahwe, fɔ ɛ̀ɛ̀ sara dʋkɔ gakpaakpa.>>

23 Ɛwʋ gɛ wɔsan Elikana ɛ dɔ̀ wɔ alan, <<Mɛ ɛwʋ gɛtɛ wʋ̀ kɔlɔ tɛ wɔ̀! Sara ditele ma sere ɔya gɛtɛ aà tigi wɔ dɩnyʋn! Mɔ fɔ, Yahwe ɛ yɛ wɔ̀ àà talɩ di aa ntam gɛtɛ a kan fɔ wo koro.>> Okoro Hana ɛ sara ditele ɛ nya ebi fɔ wo koro ka ma sere ɔkʋna gɛtɛ e tigi ebi fɔ dɩnyʋn. 24 Gɛtɛ e tigi ebi fɔ dɩnyʋn fɔ, Hana ɛ ka wɔ fɩya ma ɛkwɔ-teni gɛtɛ e di bɩkyan besiyee, ma ɔnʋmʋ tasa-dɩrɛ diboro, ma bʋkan osun ɛ san Yahwe Dikwo-dɩrɛ fɔ daanɩ, Silo ditele. 25 Ɛwʋ gɛ be wolo ɛkwɔ-teni fɔ, gɛ bɛ ka ebi-tenibi fɔ bɛ ma tɛ Eli. 26 Gɛ Hana e lila wɔ alan, <<Miinfonte, koturu gɛ, aa kʋna mɩ? Nmɩ n di ɛna gɛtɛ na ti yela aa bʋnʋn nfan, na tiri onyun na tɛ Yahwe fɔ. 27 Na tiri onyun gɛtɛ Yahwe ɛ̀ɛ̀ tɛ mɩ ebi, gɛ Yahwe ɛ nʋn miinyun-tiri. 28 Okoro ǹ de wɔ ǹ tɛ tɛ Yahwe. Wɔ nkpa awi powu yaanɩ fɔ, è di gɛ Yahwe woyo.>> Gɛ ɛ sʋma Yahwe dʋkɔbɛ.