5 Ayo Obitrus to oruduru, awogboso ke tinarigwu kotata ikweyi nu kotata shini Owuso na tabo.
Ayo Obitrus Ngma Sho Shetu
6 Otu ko gbeno ni Ohiridus ya byo wese ko kepwo ni, Obitrus ya gbola otutetehe kawadakare epa. Ayo gbo kpa ashirika epa, kweyi adakare bokwunu koko wa ofunu owe ko oruduru. 7 Ebebeni oyoleho ka Adole bose danu kweyi ola yu ipu koda. Odo Obitrus abo ashikwu kweyi shiyi mo, <<Nyiso papa!>> Kweyi ashirika she abo nu.
8 Ebeni oyoleho ka danu mo, <<Kpo oshiye wo shoko shini okpo okpabawu wo likpo.>> Kweyi Obitrus ya mani. Oyoleho ki kamo <<Kpo obagidi shikpiye shini ogbosun.>> 9 Obitrus gboso bose shoruduru, anu ke gye moza ni oyoleho yaya mani ya gbodagye okwokwoshi lalo; oya ma byo owa ana la. 10 Ashigbo kawadakare kikyikyo kpa akomwepa, awo owofunu kogye ko gipu kogya. Ofunu gwa dawa abiyinu kweyi abwanu gese. Abose yawu go owe oye ebebeni oyoleho sho Obitrus bita.
11 Ebeni Obitrus kwikye wiyinu kweyi okamo <<Nabani ngye mo Adole so oyoleho nu abo kowa yun ngma shabo ko Ohiridus kpo oza ni ase ko Oyahuda yotuse moya gbodagye ni.
12 Ishini Obitrus gye mani ni, ogole ko Omeremu ene ko Oyohana ni aba yogwu mo Omarkus ni, ase lewa gbayi ba tinarigwu.