1 Tibreeteeb wint winneet girbaat alaama lawta. Takat yint akwaaytu, batiiyeeh iragadaayi whii tuutrig tiifi, aree batiiyooh ugirmaay kehii tamna malu hayikwi taaj iifi. 2 Batuuh nakwalaaytu, aree firaayiit lhanay tiibriit toonaatiit waawta. 3 Malya weet alaama tibreeteeb lawta. Wint adaroot dhhaniinaayt asarama girma tiibriit, tamin dꞌaab tiibriit, ugirmaay kehii aree asarama taj tiibriit lawta. 4 Uniiwaayuuh tibreeti hayikweet mhayaat takwi imhag aree tubuuti kehii igid. Tudhhani beet oofraay dawilt tutakati suurii tingadaayt unisrik itfirihoob barooh tamtiib tehiriw. 5 Malya batuuh oor tifri, wꞌoor kasseeh yhash diitiit kwoolaytii yhikim indi. Laakiin wꞌooruuh Ukwaasanaawwa tehadꞌaayeetoohwa beeti asti tafamiya. 6 Tutakat Ukwaasana batiiyooh dehaay soomraab iiktiyeeb umingaayi mhiin beeti tifoor. Batuuh alifwa malu sheewwa asagwir tamuunwa yinaat beentooy amshabuubaab imaartindi. 7 Aree tibreeteeb finaab iki. Miikhaaꞌiilwa imalakaahwa beet tudhhani finaasamiyaan. Aree tudhhaniiwwa imalakaahwa yꞌagarni bareeh finaasamiyaan. 8 Laakiin tudhhani daayiib akraat kitti, aree baraah tibreeteeb umhiinoohna inawna. 9 Tudhhani tuuwin nꞌati titoogaad, shꞌiika iifiib ukwakwar oobliis tari sheetaan ittiyuud kastooh tuduniya kakwidhsiiniib, been ukwakwar han toobuuti kehii itoogaad, imalakaah han bariiyooh geeb itoogaadna.

10 Malya tibreeteeb tageega hiss amaasiw. Whiss:

"Umidhhanwa, yꞌakrirwa, Ukwaasanaayiitoon tehadꞌaayeewwa,

bariiyooh Umasiihiit tehadꞌaayeewwa, oontꞌa yꞌaaba.

Isanaayeen atehimiyaab,

Ukwaasanaayoon suurii whawaadwa oombꞌeewwa bareeh atehimiyaab,

nꞌati itoogaad.

11 Baraah barooh igribna

whooy booyiiwwa

bareeteeh tibadehaati bhaliiyeewwa iribna.

Baraah ishuukeehna winneet areeyaab kiikeena,

tooyatii han kwabas kiikeen.

12 Aflaay bataak taabri afirhaana,

aree baraak bateeyooh tehooyteeb ikweer han kassaak afirhaana!

Laakiin uubliis nꞌati kehookna tikwaabuuyt,

tuubuutwa uubharwa tidhikwna!

Uubliis imbꞌeeyaah shalik ikatiineet toona ikatiinayt,

gadab itab." idi.

13 Tudhhani toobuuti kehii titoogaadeet toona tikanihoob, beet tootakat wꞌoor tifriit tiskwi. 14 Tootakat malu ambir win kwiikwꞌaayiib tittiyeewaay. Aflaay batuuh umingaayiib batiiyooh dehaay atoomraab oomhiin ookiik biriiktiniit tiikti. Batuuh beentooy mhay hawlaawwa tarabwa amshabuubaab imaar tindi, aree ukwakwarii iidhhan tindi. 15 Malya tudhhani uyafii yami kwaan tootakati harꞌii tifif. Aflaay been uukwaan batooh iniini jillaay tifif. 16 Laakiin tuubuut tootakat tisham, tuubuut uyafooh haaksitaayt oobhar tudhhani uyafii fifaat tiiktiyeeb tikwitꞌa tidꞌi. 17 Malya tudhhani tootakatii tehasaayt, batiiyooh oofraay ibaagi kehii finaab tikwaas. Batiiyuuh uufraay Ukwaasanaayt tiwasi isnaakiir aree Yasuuꞌiit tibadeha abkaab baliib, finaasamta.

18 Aree tudhhani ubhari daraag tingad.