1 Malya tageega hiss udiini gawii iiktiib imalak yꞌasarama bhaliisamiya, "Difnaat Ukwaasanaay igadabi kas yꞌasarama tubuuti kehii fifna." idi.

2 Umalaktaayi wꞌawwali idifaayt ukaasooh whaashi kehii ifif. Oodehay tudhhaniitiit alaama tibiitiyaateeb iibriin malya na batiiyooh utimsaal yꞌibid aree winneet shingiraatwa lhasiintwa adilꞌiya hooy daayaan.

3 Umalaktaayi umalya ukaasooh ubhari kehii ifift, ootak wꞌayaanaay booy tꞌiiteeb iikti, aree ubhariib tiifiina kastuuh tiya.

4 Umalaktaayi umhaya ukaasooh yhoodhaayeewwa iyami thawaayeewwa ifif, aree baraah booy iiktiin. 5 Malya umalaktaayi eeyam abkaab bak diyee amaasiw:

"Baruuk tikwaaseeb whukwim adil ikati,

baruuk Umugaddas Oongaal, suur iifiib, oontꞌa eefeeb,

baruuk bak tehakimayt, adil ikati.

6 Baraah Ukwaasanaay dehaywa inabiyaayi booywa ififna,

aree baruuk bareeh booy gwꞌiineeb tehiiyya, baraah beet toona tꞌastehaliineet imriin." idi.

7 Malya tikaraamaati mhiinii iikti hiss bak diyee amaasiw:

"Awooh, yaa Wꞌankwana Ukwaasana Wꞌalya,

whukwimuuk sidiku aree adilu." idi.

8 Umalaktaayi ufadhiga ukaasooh tooyinti kehii ifif. Aree tuuyin oodehay haay tiiliweet nabꞌuuyti akrir tittiyeewaay. 9 Tuuyin bareeh nabꞌuuytii tiliw. Aree baraah Ukwaasanaay oosim yꞌatna, teen tinasiibi abkaab, bariiyooh oosim yꞌatna. Laakiin baraah ituubti iribna aree umatuunooh hamdaab kiikeen.

10 Umalaktaayi wꞌayya tudhhaniitiit tehadꞌaayeeti kwirsi kehii ukaasooh ifif. Tudhhaniitiit tehadꞌaayi thibin tiikti, aree uudehay lhanaytee imiidalabeehna faniikiyaan. 11 Baraah tilhanaywa tꞌadilꞌiyaati sabbiiwwa Ukwaasana tibreeteeb eefeeb yꞌatna. Laakiin baraah isalalaayeehna yꞌamag hooy tuubaab kiikeen.

12 Umalaktaayi wꞌasagwira ukaasooh Furaati bhar oowinnaay kehii ifif. Aree uyintalawi hadꞌaayee dehaay salal isuumirni jillaay ubhari yam balamiyaan. 13 Malya mhay jin igwꞌooya tꞌiiteeb rhan. Igwꞌooya tudhhaniiti yafii ifirꞌana, umalaaliit dhhaniiti yafii ifirꞌana aree unabi igwisreenaay yafii ifirꞌana. 14 Baraah eejini shuuk mꞌuujisaateet alaama shagaamiin ikatiin. Aree kastooh tuduniyaati hadꞌa beeti giigiyaan. Ukwaasana wꞌalyaanaay oombꞌi oowinnaayt thꞌaaytii dehaay iidbilni jillaay bareeh beeti giigiyaan.

15 Ukwaasana "Sinaakirna, ani ugwiharaayt yꞌi andi. Bꞌaraa hagtiit yhalakaayeeh ingwꞌiid been libaabiya. Shaawti baruuh rabooba saki kiidi, oodehayi suurii han iiskwꞌa kiidi." idi.

16 Malya aajin Yꞌibri bhaliiyee Armagaddoon ittiyoodiib umhiiniib yhadꞌa idbilna.

17 Umalaktaayi wꞌasarama ukaasooh asti ubaraamiib ifif. Udiini gawii aree tageega hiss tehadꞌaayeetii eeyaayt, "Tuun batuuh daamta!" idi. 18 Malya talawa talawiyaana, huudtwa thiwaatwa thathiwiyaana, aree akra buuti katatti iikti. Wꞌaadami tubuuti kehii daayaneekka bak tꞌiiti katatti door han akaab kiiki. Aflaay been tubuuti katatti akraabi. 19 Tumadiina tuuwin mhay mhiin tikitꞌa, aree yhasheet timadiina katꞌamiyaan. Ukwaasana Baabilyoon toowin shꞌiya aree bariiyeeh igadabi kaas haab ataab batooh yhii. 20 Tigadiira kastaah fidnaab ifoorna, aree aarba kwidhiyaan. 21 Tibreetee akra inbiyi awi gaalka aytamuun kiiloogiraam iiktiin oodehayi kehii dhadhibiyaan. Beet yꞌinbiyeet nasiibeeti sabbii aree baraah Ukwaasana yꞌatna. Tunasiibi winneet amaagti.