1 Malya ubharii malaaliit dhhani yꞌee rhan. Batuuh tamin dꞌaawwa asarama girmaawwa tiibri, aree dꞌaay kehiika tamin taj iifiina, aree girmaay kehiika Ukwaasana neewi sim kehii kataabi. 2 Umalaaliit dhhani ani rhaneet ooyhaam tꞌiiteetu, laakiin iragada tubꞌashooti ragada tꞌiiteeba, aree uuyaf whadhaay yaf tꞌiiteebi. Tudhhani beet malaaliit dhhani yꞌakrireehwa tehadꞌaayeetoohwa wint suurkinaayeewwa tehii. 3 Umalaaliit dhhaniiti girmaayee gaal wint adilꞌiit tiibriit toona tꞌiiteebi. Laakiin tꞌadilꞌi tuuwin tinꞌir. Kastuuh tuduniyaati dehay ajjabamiyaaniit umalaaliit dhhaniiti harꞌii sakiyaan. 4 Uudehay tudhhani beet umalaaliit dhhani hadꞌaayeet tehii akay batooh yꞌabidna. Baraah umalaaliit dhhani han yꞌabidniit raatiyaana, "Umalaaliit dhhani aab tꞌiiteetu? Batooh adgiriit aaw finaasamiini?" idiin.

5 Umalaaliit dhhani tataggeegti bhaliiwwa, kifuurwa bhaliiyiini yaf tittiyeewaay, aree fadhig tamuunwa malu tirgaawwa tehadꞌaayeetooh haay shagaamtiniyeet toona tittiyeewaay. 6 Batuuh Ukwaasana neewtiib badoota, aree bariiyooh oosimwa oomhiin hooy kwarriyeebwa, kasseeh baliib tibreeteeb ikweerwa neewta. 7 Batuuh Ukwaasanaay oodehayi kehii finaab tikwasiyi jillaaywa bareeh ganriibi jillaaywa akrir attiyeewiyaati. Aree batuuh kasteeh tigabiilaawwa, oodehaywa, ibhaliiwwa, yhashi kehiiwwa hadꞌaayeet attiyeewiyaati. 8 Baliin tuduniya daamaat baakaay umidhhani kitaabiib ismaayaahna whu wharaadnaay kitaabiib katab ikatiineeb nuun, kassaah tuduniyaati dehay umalaaliit dhhani yꞌibid iyadna.

9 Angwiil ibariibka simaasiwna.

10 Gaal han abuukiit dehaay niyaamamaat ikatiineek,

baruuh itꞌibik indi.

Gaal han ibakii bꞌadhdhii madar dehaay niyaamamaab ikatiyeek,

baruuh bꞌadhdhii ituudir indi.

Tuun tuuna aree Ukwaasanaay oodehayi geeb tarmuumaawwa iimaanwa daayiiniyeet toona waliiktini.

11 Malya weet malaaliit dhhani, tubuutii firꞌee rhan. Batuuh whooyt malu dꞌa tiibri, laakiin batuuh han tudhhaniitiit bhaliita. 12 Batuuh beet malaaliit dhhani tꞌawwaliinaati badal kastooh tehadꞌaayi haay shagaamta. Aree toobuutwa tehooy kwarriiwwa umalaaliit dhhani tꞌawwaliit, tꞌadilꞌiituuh tuuwin nꞌiraa tehiyeet, batooh tisꞌabid. 13 Batuuh akraat mꞌuujisaateet alaama tikwaas. Uudehay daayiib rhee, tibreetee nꞌati toobuuti kehii nꞌeet tikwsita. 14 Batuuh beet umalaaliit dhhani tꞌawwaliinaati suurii, mꞌuujisaati dꞌuuyi akrir attiyeewiyaatuuyt, kasseeh oodehay tubuutiib ikweer titil. Batuuh umalaaliit dhhani bꞌadhdhii wookamtaayt masi tinꞌirt, batiiyooh hamooysitiib timsaal idꞌaneet toona bareeh soota. 15 Batuuh beet umalaaliit dhhani tumalyaati timsaal hamshukw hooy tiidꞌi akrir attiyeewiyaati. Aflaay batuuh hadiidtaayt, baliib utimsaaliit ibaada irib kasseeh tisoodir. 16 Batuuh kasseeh oodehay akruur hooy shagaamta, oodiswa oowinwa, ikishiyaawwa whirriiwwa, wꞌayi umaykwaanaay tari tubiitiitiib alaamaat hooy tisidꞌi, 17 aflaay toon tꞌalaama anu gaal han dilba iniineet toona tari gidehooh iidlibeet toona adgiraab kiiki. Beet tꞌalaama aree tudhhaniiti sim tari batiiyooh oosmi ragim tiikti. 18 Tuun tuuna aree fagarandiit waliiktini. Kanaant ibariibka tudhhaniiti ragim hasibna, tuun batuuh wꞌaadami ragim tikati, uragimuuh 666 ikati.