1 Imalak yꞌasaramaayeeb gaal asarama kas iibriib eeyaayt anii dehaay, "Mꞌaa, tujakiin toowinnaati jasa rhisi hook andi. Batuuh gwida yami kehii sꞌaat tikati. 2 Batiiyooh geeb tubuuti hadꞌa jikuun shagaamaab iifiin. Tubuutiib eefeen uudehay batiiyooh oojkuuni wha hooy gwꞌiyaaniit sammoomiyaan." idiheeb.

3 Malya umalaktaayi Ishuukeeb ifiyakeheeb umingaay ookiik istoobheeb. Beentooy adaroot dhhaniiti kehii tiistꞌa takat rhan. Tudhhani kastooh Ukwaasanaay neewi sima kehii kataba. Asarama girma tiibri, aree tamin dꞌa tiibri. 4 Tutakat adaarhamaashwa adaru halakwa akwaaytu, buubi dimꞌara tiibri, alya aweebwa almaaswa tiibri. Batuuh wꞌayiib dimꞌaraay kaas abkaati. Uukaas amaagnaytwa batiiyooh jikuuniit dhimiyaaytwa ataabi. 5 Tuun tuuna batiitooh tubiitiiti kehii kwabaasnaayt kataabtu: "Baabilyoon tuuwin, kasteeh tijakiinaateet toondi tikatiit, tuduniya tishdhamiit." miyaad kehii kataabi.

6 Beet tootakat Ukwaasanaay oodehayi booyii, baliib Yasuuꞌii aamaniyaan oodehayi booyii, askiraa rhan.

Ani batooh rhanihoob winneet ajjabaman. 7 Malya umalaktaayi anii dehaay, "Naanhooy ajjabamta? Toon tootakatiib kwabaast toona dehook fassari andi. Batuuh amaat tikatiyeet tudhhani igirma yꞌasaramaawwa eedꞌa itaminwa tibariit han dehook fassari andi. 8 Tudhhani door gaal baruuk rhitaneet oontꞌa kitehaay, laakiin idhoomaayee firꞌati yꞌi tindi. Aree batooh kwidhsi tindi. Tuduniya daamtaneekka ismaayaahna umidhhani kitaabiib katab biikaayneeb, baliin toobuutiib eefeen uudehay tudhhani rheenihoob ajjabami iyadna. Aree batuuh door gaal tiifi, oontꞌa kitehaay, aree masi yꞌi tindi.

9 Tuun aree tifagarandiiti girma waliiktini. Igirma yꞌasarama, asarama riba tutakat kehii teestꞌeeba. 10 Baraah han asarama hadꞌa ikatiin. Ay hadꞌa dhibiyaana, gaal eefi, uuraaw masi yꞌaab kiiki. Laakiin baruuh yꞌiiniyihoob, ibakii shalik door daayi indi. 11 Tudhhani door gaal tiifiit, oontꞌa baahaayiit aree whadꞌa wꞌasimha tikati. Baruuh yꞌasaramaayeeb gaal ikati aree kwidhi indi. 12 Baruuk rhitaneeb aadꞌa itamin, tamin hadꞌa masi hadꞌaayeet miraab baakay ikatiin. Laakiin gaal hadꞌaayeet imaar indi, tudhhaniiti geeb aree saaꞌaat gaat whadꞌaayt yhikim indi. 13 Baraah gal hadaf ibariina: yꞌakrireehwa tehadꞌaayeetoohwa tudhhani iyaaw iyadna. 14 Baraah whu finaasami iyadna, laakiin whu bareeh iigrib indi. Baruuh yꞌankwanaayi Wꞌankwana ikati aree yhadꞌaayi Whadꞌa ikati akay, aree bariiyooh geeb waliikamaab, iwaasamaawwa usidki aamananaawwa ikatiin." idi.

15 Malya umalaktaayi anii dehaay, "Eeyam baruuk rhitani tujakiin kehii sꞌaat tiiktiyeeb, baraah dehayaaba, gwida dehayaawwa, hashwa, bhaliibwa ikatiin. 16 Tudhhaniiwwa aadꞌa yꞌasarama baruuk rhitaneebwa tujakiin iirib iyadna. Baraah batooh kwidhsi iyadna aree raboobsi iyadna. Batiiyooh ubashar tami iyadna aree batooh nꞌeetiib iiliw iyadna. 17 Ukwaasana harriiweet toona bareeyooh iginꞌaayeeb idꞌiit, baraah tudhhani hankiimi jillaay yꞌakrireehna batooh iyawneet toona agbiliyaan. Ukwaasanaay ibhali sidik ikatiineeb ookiik bak saki iyadna. 18 Tootakat baruuk rhitaneet tumadiina toowin tubuuti hadꞌaayi kehii tehankiim tikati." idiheeb umalaktaayi.