1 Malya ashbibihoob, suuru beentooy whu oorba Sihiyooni kehii gadee rhan. Bariiyooh geeb aree 144,000 dehay oosmoohwa Ubaabiyooh oosimwa tibiitiyaateeb iibriin. 2 Aree tibreeteeb hiss amaasiw, whiss kwaaniin yami hiss tꞌiiteebu, wint thiwti hiss tꞌiiteebi. Whiss tageega hissi baasankwoob biiboob haay hawaayiineeb tꞌiiteebi. 3 Aree baraah tehadꞌaayeeti kwirsi suuriiwwa, tidhhaniya tfadhigti suuriiwwa, isuurkinaayi suuriiwwa, gayiit kaft kafiyaan. Tookaf 144,000 dehay nuun gaal han kanaab kiiki. Aan baraah aabhat tubuutiib idhhanna. 4 Aan baraah mꞌati geeb moogamaab kiikeena, igarooyeehna kaleewyaaniit nhas ikeen. Whu eebiyi mhiinka beeti imooriimna. Baraah oodehayi bitikii dalaba, awwal firaayiit karaama akay aree Ukwaasanaawwa whoowwa attiyeewiyaaba. 5 Baraah gwisir han hadiidaab kiikeen. Baraah yaay baabariiba.

6 Malya tibreeti bitik dhaabi malaktaayiib weer rhan. Baruuh usakana udaayiib udaayim iibri, tubuutiib ikweer kasseeh yhashwa, kasteeh tigabiilaawwa, kasseeh ibhaliiwwa, kassooh oodehaywa, sootiib yhiriw. 7 Baruuh tageega hissii, "Ukwaasana rikwiina aree barooh hamooysaana, whukwimiit tusꞌaatuuh yꞌaati. Toobuutwa, teebreewwa, oobharwa, iyami thawwa idꞌiib barooh abidna." idi.

8 Umalaktaayi umalya imooraamiit, "Dhibta! Dhibta Baabilyoon tuuwin, batuuh kassooh oodehay jikuuni haab gwꞌasiisita." idi.

9 Umalaktaayi umhaya bareeh iramaayt tageegi hissii hadiidiya: "Umalaaliit dhhaniiwwa utimsaaloohwa anbiid, aree tꞌalaamaatooh tubiitiiti kehii tari wꞌayiib daasiiniibka, 10 baruuh han Ukwaasanaay igadabi whaay gwꞌi indi. Been wha bariiyooh igadabi kaasiit akraab ituufif indi. Baruuh imalak imugaddasaayi suuriiwwa whooy suuriiwwa teetliiw kwirbiitii jasaami indi. 11 Aree bareeyooh ijasaay kwaraar diimaab asti tageegi indi. Baliin tudhhaniiwwa utimsaaloohwa yꞌabid, tari batiiyooh oosmiit tꞌalaama nuunameen, whawaadwa oombꞌeewwa fiinaniit imaar kiidiin. 12 Tuun tuuna aree Ukwaasanaay oodehay Ukwaasanaayt tiwasi isnaakiirwa, Yasuuꞌii aamaneenwa, tarmuumaab idꞌaneet toona waliiktini." idi.

13 Malya tibreetee hiss amaasiw, whiss "Kitiba: oontꞌaanee fidnaab Wꞌankwanaay shagaay iyaayiin libaabiyaan." idi.

Aashuuk "Awooh, baraah ushagaayiisoohna fiini iyadna, aree baraah sakiyaaneet tuuna bareeh iitram tindi." idiin.

14 Ashbibihoob, beentooy suuru eera bꞌaluuk rhan. Gaal Wꞌaadami Oor tꞌiiti ubꞌaluuki kehii iistꞌa, ugirmaay kehii dimꞌaraay taaj iibri, aree hasi minjal wꞌayiib iibri. 15 Malya weer malaktaayi udiini gawii ifirꞌa eeyaayt tageega hissii been ubꞌaluuki kehii iistꞌa barooh infaraad, "Uminjalook yaksaat wikaa! Uwaaki door yꞌaabu, tubuuti harru bashikwi." idi. 16 Aflaay ubꞌaluuki kehii iistꞌa tubuuti kehii uminjalooh yꞌasagwir, aree tuubuur titoowaak.

17 Udiini gaw tibreeteeb eefeenaay weer malaktaayi ifrꞌa eeya. Aree been han hasi minjal iibri. 18 Masi weer malaktaayi toonꞌi abkaab tikaraamaati mhiinii eeyaayt tageega hissii beeb uminjal whasiib iibriinaay dehaay, "Hasi minjalook yaksaat tubuutiib eefeeb wꞌinabiit dirꞌaatee inabi mhakwara dibila, shaawti wꞌinab bashikwi." idi. 19 Umalaktaayi uminjal toobuuti kehii yꞌagwiraayt, wꞌinab idbil aree Ukwaasanaay gadabi whaay win diwaaniib geediya. 20 Wꞌinab diwaaniib idmam, tumadiinaatii barraab shagaamamiya. Been oodwaanii booy kwaaniya, mhay shi kiiloomitir gwimad iikti, aree malu mitra nꞌati hoogiya.