1 Whu wꞌasseenaay wꞌasarama ikitꞌat ingilihoob, tibreeteeb saaꞌaati tarab ookiik naatka dinta.

2 Malya asarama malak Ukwaasanaay suurii gadee rhan, aree baraah asaramaat ambiilhooyaat attiyeewiyaaba.

3 Malaktaayi weer dimꞌaraay mabkhar iibri eeyaayt tikaraamaati mhiiniib ingad. Baruuh gwida libaan iiliweeb attiyeewiyaabu, kasseeh Ukwaasanaay dehayiit siileelti geeb, idimꞌaraayt karaamaati mhiini kehii tehadꞌaayeeti kwirsi suurii tikaraama iifirꞌee dehaay ingad. 4 Oolbaani kwaraar, Ukwaasanaay dehayiit siileelti geeb hiddaab, umalaktaayi wꞌayii Ukwaasanaay suurii asti tageegiya. 5 Malya umalaktaayi tikwararti mabkhar iyhaayt, tikaraamaati mhiinii nꞌeet itib, aree tubuuti kehii winneet igid. Beentooy aree thiwaat thathiwiyaana, huudtwa, talawaawwa, buuti katattiiwwa iiktiin.

6 Malya imalak yꞌasarama eedꞌa yꞌasarama iibriin bareeh kwinhistii dehaay imarna.

7 Umalaktaayi wꞌawwali udꞌaayooh kwinhisiya. Aree beentooy inbiibwa nꞌeetwa booyiib amshawawiyaab eeyaana, aree tubuuti kehii nꞌati tikwiyaan. Tubuutiit mhayaat takwi ilawna, yhindiyeet mhayaat takwi ilawna, aree kassuuh idaruur usootaay ilaw.

8 Umalaktaayi umalya udꞌaayooh kwinhisiya. Naat gaat win riba tꞌiiteena balooltiit ubhari kehii titoogaad. Ubhariit mhayaat takwi booy tiikti. 9 Mhayaat takwi ubhariib iifiint tidhhanyaatee iiyaana, aree tifalluukaateet mhayaat takwi katꞌamiyaan.

10 Umalaktaayi umhaya udꞌaayooh kwinhisiya, win hayuukw usigwuudiit balooli tibreetee dhibiya. Whayuukw ubhari kehiiwwa iyami thawaayeet mhayaat takweeti kehiiwwa dhibiya. 11 Whayuukwi sim whamiib iidna, tumhayaat takwi iyameeb hamiib iiktiin, aree baliin eeyam yhamiinaayee gwida dehay iiyaan.

12 Umalaktaayi ufadhiga udꞌaayooh kwinhisiya. Aree mhayaat takwi tuyintiit titoothꞌa, mhayaat takwi tutrigtiit titoothꞌa, aree mhayaat takwi tiyhayikweet itoothꞌana. Aflaay een bareesooh tumhayaat takwi thibin iiktiin. Oombꞌiit mhayaat takwi thibnamta, whawaadiit mhayaat takwi han thibnamta.

13 Ashbibihoob, kwiikwꞌaay tibreeteeb dhaabi tageega hissii, "Wheelookna, wheelookna, wheelookna tubuutiib eefeen, imalak aamhay aaraw dꞌaab kwinhisi iyadna!" diyee amaasiw.