1 Saardisiib teefeet tukaniisaati malaktaayi ookiik kitiba:

Aan ibhali Ukwaasanaay Eeshuuk yꞌasaramaawwa yhayikw yꞌasaramaawwa abkaab, bariiyeeh bhali ikatiin. Ishanhook akteen, midhhani faal tibariyeet toona akteen laakiin baruuk ayaabwa. 2 Bꞌara! Toona tutibariyeet ayaat baakaay sꞌakira. Baruuk tidꞌiyeet tuuna Ukwaasanaay suurii masi timmiimaat baakaay amri. 3 Shaawti baabaadhiinna, toona tutimriyeetwa tutimaasiweetwa sinaakira, aree tuuba. Laakiin iibꞌar bitdiyeek, ani ugwiharaayt yꞌi andi, toosꞌa ani hooy yꞌi hook andiyeet aree baruuk iikan kitdiina.

4 Baruuk Saardiseeb masi shalik dehay yhalakaayeehna yiwaashiisaab baakay tibariya. Baraah anii geeb hiireeri iyadna, baraah eera halaka akwaya aree takweet ibariin. 5 Been wꞌansiramiini aree bareeh tꞌiiteeb eera halaka iitkwi indi. Been barooh ani oosmooh door han umidhhani kitaabii kaahati. Laakiin bariiyooh oosim Baabiyu suuriiwwa imalakeeyooh suuriiwwa isuukin andi. 6 Angwiil ibariib Aashuuk tikaniisaatee dehaay iyadneet teena simaasiwna.

7 Fiilaadalfiyaay teefeet tukaniisaati malaktaayi ookiik kitiba:

Aan ibhali beeb umugaddaswa usidkiinaaywa ikatiib, bariiyeeh bhali ikatiin. Baruuh Daawidiib umiftaha abkaabu, baruuh fandiigeet toona gaal han wꞌassiti kaꞌadgiriya. Baruuh hankwiireet toona gaal han fiduug kaꞌadgiriya. 8 Baruuk tidꞌiyeet toona akteen. Shibiba, ani suurook nagaal dheefa adꞌi, gaal han aree wꞌassiti kaꞌadgiriya. Shalik taad tibariyeet toona akteen, laakiin baruuk aniib ibhali tidibiya, oosmu han tawaay kitta. 9 Baliib oobliisi dehay ikatiin baraah Yahuudiib biikaayneek han igarooyeehna Yahuudiib hiiseena laakiin gwisreeba. Ani bareeh yꞌeetiit iragadaayeek whii dhibeen iikwasi andi, aree ani barook areeyaniyeet toona iikan iyadna. 10 Baruuk aniit tiwasi kaleewta aree tarmuumaay timtaraamna sabbii, ani han barook ijarrabamtiit toosꞌa hooy ishidhhin hook andi. Kastooh tuduniyaati kehii yꞌeetiit baliib tubuuti kehii ikweer hooy jarrabameeneet barook hooy ishidhhin hook andi.

11 Ani willa yꞌi andi. Toona tutibariyeet kaleewa, aflaay gaal han utaajook iyaay kiidi. 12 Been wꞌansiramiiniib ani Ukwaasanaayu diini gawiib aamuud iikwasi andi. Baruuh shaawti door han iiyꞌish kiidi. Ani bariiyooh kehii Ukwaasanaayu sim iiktib andi, Ukwaasanaayiitu tumadiinaati sim han kehii iiktib andi. Algudus tugayiit Ukwaasanaay tibreetee nꞌati eetni, ani han oosmu ugayiib bariiyooh kehii iiktib andi. 13 Angwiil ibariib Aashuuk tikaniisaatee dehaay iyadneet teena simaasiwna.

14 Laawdiikiyaay teefeet tukaniisaati malaktaayi ookiik kitiba:

Aan ibhali Wꞌamiinwa, wꞌiimaaniiwwa ubadehi usidkiiwwa, Ukwaasanaayt tukhaliigaati haakimwa, bariiyeeh bhali ikatiin. 15 Ishanhook akteen, baruuk nabꞌa kitta lꞌaab han kitta. Baruuk nabꞌa tari lꞌaab tiiktiyeet toona minniiman. 16 Aflaay baruuk bitik-bitik nabꞌa baakaay tari lꞌaab baakaay tikatiyi sabbii, ani uyafiisu siisagti tifi hook andi. 17 Baruuk ‘Ani gabaabu, miraay rayiimaabu, weena kaahariw.’ tindiya. Laakiin baruuk atoorbiibwa, dhibaabwa, aniwwa, hamashaywa, raboobaabwa tikatiyeet toona kitkana. 18 Baruuk anii dimꞌaraab nꞌeetii nhasaab dilba tiniineet toona amankiir hook, aflaay gabi tindiya. Eera halaka teetkwiyeeb han dilba tiniineet toonaatu, aflaay iraboobeek sikwꞌi iikwibis tindiya. Tishtamiiti mishmat tiliiliyaateek kehii hantiyeeb han dilba tiniineet toonaatu, aflaay rhi tindiya.

19 Ani yꞌareeyaneeb baliib eedniin aree adab asidꞌi. Aflaay sidik tumaagnaay singada, aree tuuba! 20 Ani tooy eefi, udheefaay angadi aree kadhawsani. Aniib whiss maasiwtiit udheefa nangiilka, ani shuumi yꞌeetiit bariiyooh geeb tami andi, baruuh han geebu tami indi.

21 Been wꞌansiramiiniib, aniit tehadꞌaayeetiib geebu haay eesitꞌeet takwi barooh iyaaw andi. Ani han bak ansiramanaayt Baabiyu geeb tehadꞌaayeetiyooh kehii nꞌati asꞌa. 22 Angwiil ibariib Aashuuk tikaniisaatee dehaay iyadneet teena simaasiwna." idi.