1 Afasoosiib teefeet tukaniisaati malaktaayi ookiik kitiba:

Aan ibhali yhayikw yꞌasarama wꞌayooh umaykwaanaay abkaab, aree idimꞌaraayt tilambaati mꞌabaka yꞌasaramaayi bitik hiireeriiniib, bariiyeeh bhali ikatiin. 2 Ishanhook akteen, wꞌakra shagaayook akteen aree usabirook akteen. Amaag dehay bitꞌamtaraameet toona akteen, baliib igarooyeehna linguumiyaab hiisiin laakiin baraah kiikeena, baruuk bareeh jarrabtaaneet toona akteen. Malya bareeh gwisreeb akay timriya. 3 Baruuk asbirta aree aniib oosmi jillaay igwirha timtaraama, agwooy han diyaab kitta.

4 Laakiin ani masi toon batooh kehook abari: baruuk suur tiibriyeeb ureerook tꞌish tidꞌiya. 5 Tageega mhiinii dhibtaaneet toona shꞌaa! Tuubaa suur saktiyeet teena sakaa. Tuubi bitdiyeek, ani yꞌi hook andi, malya tilambaati mꞌabakaayeek oomhiiniisooh giigsi andi. 6 Laakiin toon toona daayiina akay tibariya: Nikoolaayi idꞌaneet teena tiriba, ani han anriib.

7 Angwiil ibariibka Aashuuk tikaniisaatee dehaay iyadneet teena simaasiwna. Beet tunaatiib ansirameen aree umidhhani hindi firaayii haay tameeneet hadꞌaayi iyaaw andi. Been whindi Ukwaasanaayt tujannaatiib eefi.

8 Samiirnaay teefeet tukaniisaati malaktaayi ookiik kitiba:

Aan ibhali beeb eesuurwa wꞌagiyaawwa ikatiib, iiyaayt malya masi idhhannaay bhali ikatiin. 9 Igwirhaayeekwa inaawookwa akteen, laakiin baruuk gabaabwa. Baliib Yahuudiib baakaay igarooyeehna Yahuudiib hiisiit bariiyook kehii amaagna hadiideen han akteen. Baraah oobliisi dehay ikatiin. 10 Toona tehooy lhami tindiyeet naat han hooy baarakwiya. Ani andi hook, gwadib bareesookna uubliis jarrabti jillaay oosjin daasi indi, aree tamint yina lhami tiyadna. Tooyat ookiik han wꞌiimaan dꞌiyaa! Malya ani umidhhani taaj iyaaw hook andi. 11 Angwiil ibariibka Aashuuk tikaniisaatee dehaay iyadneet toona simaasiwna. Beet tunaatiib ansirameen aree tooyat tumalyaatiib door han lhami kiidiin.

12 Bargamuumeeb teefeet tukaniisaati malaktaayi ookiik kitiba:

Aan ibhali beeb hasi bꞌadhadh malu ginnaleeb ibariinaay bhaliiya. 13 Baruuk naad kwarriyeeb akteen, aree uubliis naamhiin hadꞌaayeet ibariyeeb akteen. Laakiin baruuk aniib oosmii dehaay sidik tingada. Antiibaasiit tiyina han, aniib ubadehi usidkiib, tumadiinaatiyookna itoodaar, oomhiin uubliis ikwiireeb, aniib wꞌiimaanook ankiraab kitta.

14 Laakiin ani shalikna bariiyook kehii abari: baruuk beentooy Balꞌaamiib utꞌaliim abka dehay tibariya. Balꞌaam aree Balak agriisiya. Baruuh Balak maagtiit sidꞌooy allamiya. Yꞌisraaꞌiili isanamaayee dehaay farꞌat mꞌariiti tamsitiiwwa, jikuuniib dhaabsiti jillaaywa Balak allamiya. 15 Oontꞌaaneet baruuk han Nikoolaay tꞌaliim allameen dehay tibariya. 16 Shaawti tuuba! Tuubi bitdiyeek, ani willa yꞌeetiit hook uyafiyu eefeeb bꞌadhadhii bareeh finaasami andi. 17 Angwiil ibariibka Aashuuk tikaniisaatee dehaay iyadneet teena simaasiwna. Beet tunaatiib ansiramiiniib, Ani mannaab timꞌari tidhꞌimaanaatii naat iyaaw andi. Ani masi barooh eera awi gayi sim kehii kataab ikatiyeeb iyaaw andi. Been wꞌawi nuunami indiib uubhaat iikan indi.

18 Tiyaatiiraayt tukaniisaati malaktaayi ookiik kitiba:

Aan ibhali Ukwaasanaay Oori bhaliiya, tiliiliyaataah toonꞌeeti balool tꞌiiteeb ikatiineeb, aree iragadaayaah nhast ashti tꞌiiteeb ikatiineeb, bariiyeeh bhaliiya. 19 Ishanhook akteen, ureerookwa wꞌiimaanookwa akteen, ushagaamtiyook akteen, utarmuumaayook han akteen. Baruuk suureeka oontꞌa gwidaka shaga shagaamtiniya.

20 Laakiin ani toon batooh kehook abari: tootakat Isabeel timtariima, batuuh ugarooyooh nabiit tinsiim. Batuuh utꞌaliimiisooh aniib ikishiya kwakwidhsitini, jikuuniib eedhabwa, sanamaayee dehaay farꞌat mꞌariiti tamtiibwa mitiyaatni. 21 Been wꞌamaag shanhooh ishtiit tuubtiyi jillaay daman iyiw, laakiin batuuh tuubtiib niyaamaat kitti. 22 Aflaay ani batooh lhanayti nꞌaali kehii iikwit andi. Baliib jikuuniib dhaabeen aree batiiyeeh isalalaayee tuubi biidiineek, batiiyooh geeb akraab lhami iyadna. 23 Ani batiiyeeh yꞌar thꞌati idaar andi. Malya iginꞌaawwa igirmaawwa shanbiib aneeb akatiyeet toona tikaniisi kastaah iikan iyadna. Aree bareesookna gaalka ishanhiyooh dehaay jasaayi andi. 24 Oontꞌa bareekna Tiyaatiiraay ibaagi andi hookna, bareekna batiiyooh utꞌaliim agbilaab baakaywa, oobliisiit tikwabasnay tidhoomaat ittiyoodiint agriiyaab baakaywa, ani weer rabi kehookna daasi kaadi. 25 Ani yꞌaniyeeb ookiik toona tutibariineet kaleewaana.

26 Baliib ansirameetiit ani aharriiweet toona wꞌagiya ookiik shagaameen, ani idehayaayi kehii bareeh hadꞌaayeet iyaaw andi.

27 Baraah bareeh diitiit kwoolaytii yhikim iyadna.

Ani Baabiisu amriyeet tehadꞌaayeetiit,

baraah idehaya oodwaaniit katꞌiit firkak iikwasi iyadna. 28 Ani masi bareeh oomhi hayuukw iyaaw andi. 29 Angwiil ibariib Aashuuk tikaniisaatee dehaay iyadneet teena simaasiwna.