1 Tehadꞌaayeeti kwirsiib iistꞌanaay wꞌayi umaygwadiinaay miksas mhalleeh idarageeb katab kehii iifiineeb aree asarama khatmaayee assamaab rhan. 2 Aree alya malaktaayi tageegi hissii kwinhiib rhan, baruuh "Wꞌasseenaay kitꞌatiit oon umiksasi niguul aaw takweetooh ibari?" idi. 3 Laakiin tibreeteeb tari tubuutiib tari tubuuti whii gaal han oon umiksasi niguul adgiraab kiiki tari gaal han tehooy shibbaab kiiki. 4 Gaal han been umiksas iingil tari tehooy iishbib, takweet iibriib miraab kaakuuyt, ani winneet waawan. 5 Malya yꞌeegrimaayee gaal, "Baawaawa! Shibiba, Yahuudaayt tugabiilaati hadha, Daawidiib ugadam ansiramiya. Baruuh been umiksasi niguul adgiriini aree yꞌasseenayeeh yꞌasarama ikhattamama nangiil." idiheeb.

6 Malya hoob tehadꞌaayeeti kwirsi bitik gadee rhan. Whu fadhigt manoomaat dhhaniyaawwa yꞌeegrimaawwa kwalala. Whu toona teharaadt tꞌiiteebi. Asarama dꞌaab iibri, asaramaat liili iibri. Baliin aree Ukwaasanaay eeshuuk yꞌasarama kastooh tubuutii dehaay fadag iiktiin. 7 Whu eeyaayt been tehadꞌaayeeti kwirsiib iistꞌanaay wꞌayi umaykwaanaay umiksas yakisiya. 8 Baruuh umiksas yakisiyanihoob, tidhhaniya timanoomaat tifadhigwa yꞌeegrima itagwgwu fadhigwa whooy whii asjidiyaan. Baraah gaalka baasankwoob iibriina, dimꞌaraay kwararti mꞌabak libaan ataab iibriin. Aan baraah aree Ukwaasanaay dehayiit siileelt ikatiin. 9 Aree baraah gayiit kaft kafiyaana:

"Baruuk umiksasi yaksiti takweetooh tibariya

aree wꞌasseenaay nangiila,

baruuk titoodaarayt,

aree ubooyiisook Ukwaasanaay dehaay daab tidlib tiyha

kasteeh tigabiilaateewwa kasseeh ibhaliiyeewwa, kasseeh idehayaayeewwa, kasseeh yhasheewwa daab tidlib tiyha.

10 Baruuk bareeh hadꞌaawwa fagiiriyaawwa Ukwaasanaayoon shagaameen tikwaasa,

aree baraah tubuuti kehii yhikim iyadna." idiin.

11 Malya ani agwaalil aree gwida malaki hissa amaasiw. Baraah gwida alfa iiktiina, aree tamin alfa doora tamin alfa iiktiin. Baraah tehadꞌaayeeti kwirsiiwwa tidhhaniya timanoomaatwa yꞌeegrimaawwa kwalala. 12 Baraah tageega hissii kafiyaana:

"Whu wharaad takweet ibari,

baruuh akrirwa miraaywa fagarandiitwa taadwa iniin,

aree hamooyseewwa matuunwa hamaadwa iniin." idiin.

13 Malya tubuuti kehiiwwa tibreeteebwa tiifiinaaka, aree tubuuti whiiwwa ubhari kehiiwwa tiifiinaaka kasseeh kafee amaasiw, baraah:

"Beeb tehadꞌaayeeti kwirsiib eestꞌiiwwa whooy dehaaywa

whamaadwa whamooyseewwa umatuunwa, yꞌakrirwa bareeyooh baꞌiiktiin,

Diimaabwa kassoohoobwa bareeyooh baꞌiiktiin!" idiin.

14 Tidhhaniya tifadhig, "Aamiin" idiin. Yꞌeegrima aree asjidiyaaniit yꞌabidna.