1 Ani malaktaayiib tibreetee nꞌati yꞌee rhan. Baruuh idhoomaayi miftaah iibri, aree wꞌayiib wint shinshilt abkaabi. 2 Baruuh tudhhani ikwilal, been ukwakwar ishꞌiiya, oobliis tari usheetaan ikatiib, aree alif hawla barooh yhakwir. 3 Baruuh ukwakwar been idhoomaayeeb igidaayt yhakwir malya kehii assiya. Shaawti wꞌalif hawla ingadiineeb ookiik baruuh yhash iitil kiidi. Beenaay harꞌii, baruuh shalik door itfidig indi.

4 Malya hadꞌaayeet gat rhan. Baliin tehadꞌaayeeti kehii iistꞌa haay yhikimni akrir attiyeewiyaaba. Baliin Yasuuꞌiit tibadehaati sabbiiwwa Ukwaasanaay ibhaliyi sabbiiwwa itoodaar eeshuuk han rhan. Baraah tudhhani abidaab kiikeena tari utimsaalooh abidaab kiikeen. Baraah tibiitiyaateeb tari yꞌayeehna kehii tudhhaniitiit alaama dꞌiyaab kiikeen. Baraah idhhanniit Yasuuꞌaab Umasiihi geeb alif hawla hadꞌaab iiktiin. 5 Uudehay yꞌayaab aaraw wꞌalif hawla ingadneeb ookiik dhhanaab kiikeen. Uun baruuh ooyak wꞌawwaliib ikati. 6 Ooyak wꞌawwaliinaay daayeen baliin libaabiyaana, aree mugaddasaaba. Tuuyat tumalya bareeyooh kehii akrir iidꞌi kitdi. Laakiin baraah Ukwaasanaay fagiiriya iikti iyadna, Umasiihi fagiiriya iikti iyadna aree bariiyooh geeb alif hawla yhadꞌana.

7 Wꞌalif hawla ingadiinihoob, uubliis usijnii itfidig indi. 8 Uubliis diftiit kasteeh tubuutiit tijhaati hash iitil indi, aree Juujwa Maajuujwa bareeh finaay dehaay iidbil iyadna. Baraah yꞌadadaahna ubhari daraag eefeeb wꞌissi tꞌiiteeba. 9 Baraah toobuuti kehii itbariirna, aree Ukwaasanaay oodehayi umꞌaskarwa baruuh areeyaab ikatiyeet tumadiinaawwa itkwaliilna. Laakiin tibreetee nꞌeet eetaayt bareeh tiliw tidꞌi. 10 Aree uubliis bareeh itil, fathaktiit nꞌeeti hoodhiib itoogaad, tudhhaniiwwa unabi igwisreewwa been oomhiin itoogaadna. Baraah whawaadwa oombꞌeewwa diimaab jasaami iyadna.

11 Malya win eera hadꞌaayeeti kwirsi gaal kehii iisitꞌeeb rhan. Tuubuutwa taabreewwa bariiyooh suuriisii ifoorna laakiin mhiin miraat kiikeen. 12 Aree yꞌaab, idadiswa iwawinwa tehadꞌaayeeti kwirsi suurii gadee rhan. Aree nagal kitab rhan. Kitaab weer nagaalu, aree baruuh umidhhani kitaab ikati. Uudehay yꞌaya gaalka toona tidꞌiyaab iiktiineet dehaay haakamamiyaan, uktaabiib kataab ishagaayoohna imriin. 13 Uubhar oodehay yꞌayaab yhooy iifiin asti igid. Tuuyatwa yꞌayaaneet duniyaawwa han oodehay yꞌayaab yhooy iifiin asti igidna. Aree gaalka toona tidꞌiyaab iiktiineet dehaay haakamamiyaan. 14 Malya tuuyatwa yꞌayaaneet duniyaawwa toonꞌeeti hoodhiib itoogaadna. Uun tunꞌeeti hoodh tooyat tumalya ikati. 15 Uusmuuh umidhhani kitaabiib maraay biikaayeebka, toonꞌeeti hoodhiib itoogaad.