1 Whu yꞌasseenay ikhattamamaab yꞌasaramaayeeb ukhatim wꞌawwaliib niglee rhan. Malya tidhhaniya tifadhig timanoomaat gaat hooy tuthiwtiit kwinhita, "Mꞌaa!" diyee amaasiw. 2 Ashbibhoob, eera hataay beentooy suuru rhan. Whataay amaab uutak nashshaabt iibri, baruuh taaj attiyeewiyaabi. Aree baruuh thꞌaaytiib ansiramaab ootak tꞌiiteena ansiramtii dehaay ifdin yꞌam.

3 Whu wꞌasseenaay umalya ingilhoob, tudhhani tumalya "Mꞌaa!" diyee amaasiw. 4 Malya weer hataay ifrꞌa eeya, baruuh adaroobu. Whataay amaab uutak aree tubuuti kehii finaab haay iikwsiyi akrir attiyeewiyaabu aree oodehay taktak isoodiir. Baruuh win bꞌadhadh attiyeewiyaabi.

5 Whu wꞌasseenaay umhaya ingilihoob, tudhhani tumhaya "Mꞌaa!" diyee amaasiw. Ashbibihoob, hadal hataay beentooy suuru rhan. Uutak whataay amaab miidaant wꞌayiib abkaabi. 6 Malya tidhhaniya timalooti bitik hiss tꞌiiteena, "Ribꞌaab gamhiib oombꞌii kiraay ikatiin, aree mhay ribꞌa eelooytiib oombꞌii kiraay ikatiin. Laakiin usaliitwa whaawwa baamiigna!" diyee amaasiw.

7 Whu wꞌasseenaay ufadhiga ingilihoob, tudhhani tufadhiga "Mꞌaa!" diyee amaasiw. 8 Ashbibihoob, eelooy hataay beentooy suuru rhan. Whataay amaab uutak aree tooyat atoosmaabi. Aree Umiimash bariiyooh harꞌii diwlaa saki. Baraah tubuutiit fadhigaat takwi bꞌadhdhii haay iidirni akrir attiyeewiyaaba, aree tehargwiiwwa tinasiibeewwa, tubuutiit malaaliit dhhaniyaawwa attiyeewiyaaba.

9 Whu wꞌasseenaay wꞌayya ingilihoob, tikaraamaati mhiini whii been oodehay Ukwaasanaay ibhaliyi sabbii atoodraanaay shuuk rhan. Baraah ikwaasneet tibadeha han rhan. 10 Baraah tageega hissii waliikiyaana, "Wꞌankwana Wꞌakra, umugaddaswa usidkiiwwa, tubuuti dehay naadoor hadiit haakami tindiya? Aree ubooyoon naadoor hooy itkwis tindiya?" idiin. 11 Malya baraah gaalka eeraat yaayt ittiyeewaayna, masi shalik door yhagitneet toona aree soomamiyaan. Ikishiya yꞌarawaahwa, Imasiihiin isanaayaahwa, timmiima adad itoodiirneeb hadiit yhagitneet toona soomamiyaan.

12 Whu wꞌasseenaay wꞌasagwira ingilihoob ashbib, beentooy akraat buutiit katatatanaay tiikti. Hadalt nꞌaayti hamooyee shagaamamaab shiwaali halakiit tuuyin hadalt tiki. Tuutrig kastuuh adaroot oobooy tꞌiiteet tiki. 13 Utiini hindi akra baraam nifiit tehabba dhadhibsiiniib tꞌiiteenaayt, yhayikw tibreeteeb iifiin tubuutiib dhadhibiyaan. 14 Taabri umiksasiit iksasniit kwidhiyaana, aarba kassaahwa tigadiira kastaahwa imhiinaneesoohna yakamiyaan.

15 Malya tubuuti hadꞌaawwa, yhadꞌaayi arwa, idaabtaawwa, igabaawwa, yꞌalyaawwa, ikishiya kassaahwa, kassaah yhirriiwwa, irbaayi liilawi bitik amaraayeeb dhꞌimiyaan. 16 Baraah eerbaawwa iliilawwa waliikiyaana, "Kehoon dhibaana, tehadꞌaayeetiib eestꞌiinaay fiiree kwibisna hoon, whooy gadabee han kwibisna hoon!" idiin. 17 Bareeh igadabi bꞌi uuwin dehaay yꞌaabi. Aflaay aaw adgiriit ingadi?