1 Beenaay harꞌii ashbibihoob, tibreeteeb nagaal dheefa rhan. Suur maasiwaab iiktiyi ambiilhooyti hiss tꞌiiteeb bhaliisamiyaheeb. Whiss "Tooy asti mꞌaa, oonaay harꞌii ibakii tikatiit toona rhisi hook andi." idi. 2 Ani gaalhoob Ishuukeeb daayan, aree anii suurii tibreeteeb gaal kehii iisitꞌi hadꞌaayeeti kwirsi rhan. 3 Aree been beentooy iistꞌa isiigwꞌi tꞌiiteena talawi, aree ooshab tꞌiiteebi. Birii halꞌi, alya awi tꞌiiti tehadꞌaayeeti kwirsi kwalaal iifi. 4 Tagwgwu fadhigt hadꞌaayeeti kwirsiya wari barooh kwalala, aree tagwgwu fadhig suurkina bareeyooh kehii sꞌaaba. Kassaah baraah eera halaka akwaya, aree igirmaayeehna kehii dimꞌaraay taj iibriin. 5 Tehadꞌaayeeti kwirsii talaw talawiya, aree thiwt thiwta. Tehadꞌaayeeti kwirsi suurii aree asaramaat lamba buubiint iifiin. Aan baraah Ukwaasanaay yꞌasarama Shuuk ikatiin. 6 Masi tehadꞌaayeeti kwirsi suurii garooraatiit layi bhar iifi, wꞌaajiit buubi.

Tingꞌateeb, tehadꞌaayeeti kwirsi kwayaay, fadhigt dhhaniya iifiina, aree gaatka suuriisiiwwa harꞌiisiiwwa liiliyaat atabta. 7 Teen tifadhig dhhaniyaateeb gaat whadha tꞌiiteetu, tumalya aree yoob tꞌiiteetu, tumhaya aree aadami fiir tiibri, tufadhiga aree biriiki kwiikwꞌaay tꞌiiteeti. 8 Taan tidhhaniya kastaah gaatka asagwir ambir iibriin. Kassaah yꞌambiraahna tehooywa tisaradwa aree liiliyaateeb kwabasa. Oombꞌeewwa whawaadwa bataah jajawiina:

"Mugaddasu, mugaddasu, mugaddasu

Wꞌankwana Ukwaasana Wꞌalya,

Suur iifiib, wꞌeefeeb, masi yꞌiiniib." iidna.

9 Tidhhaniya tehadꞌaayeeti kwirsiib iistꞌanaay dehaay matuunwa, hamooyseebwa, hamaadwa, oongaal diimaabwa kassoohoobwa dhhaniib iyiwna. 10 Isuurkina itagwgwu fadhig beeb tehadꞌaayeeti kwirsi kehii sꞌaab, bariiyooh suurii fadhig asjidiyaaniit oongaal diimaabwa kassoohoobwa dhhaniib barooh yꞌabidna. Itajeehna tehadꞌaayeeti kwirsi suurii daasiyaaniit:

11 "Baruuk takweet tibariya, yaa Wꞌankwanaayuunwa Ukwaasanaayuunwa,

umatuunwa whamooyseewwa yꞌakrirwa, baruuk tiniina,

kasteeh teena baruuk tidꞌiya,

aree baruuk harriiweet toonaatii bataah daamiyaana,

aree bataah daayeen." idiin.