1 Malya gayiit bireetwa gayiit buutwa rhan. Taabri tishꞌiiyaawwa tuubuur tishꞌiiyaawwa kwidhiyaan. Uubhar han giigiya. 2 Tumadiina tumugaddas Algudus tugayiit tibreetee Ukwaasanaay nꞌati yꞌee rhan. Batuuh tudooba utakiyooh dehaay amaart, daayiib daawriimaat tꞌiiteet akay eeta. 3 Tehadꞌaayeetii tageegaat waliikt amaasiw, "Shibibna, Ukwaasanaayt kookanii oontꞌa oodehayi geeb ikati, aree baruuh bareeyooh geeb ikwaar indi. Baraah dehayooh iikti iyadna, aree Ukwaasana uukna bareeyooh geeb iikti indi aree Kwaasanaayoohna iikti indi. 4 Baruuh kasteeh teemlu bareeteeh tiliiliyaatee yhaat indi. Beentooy shaawti yat daayi kitdi, tari gadabti daayi kiidi, tari waawt daayi kitdi, tari lhanayt daayi kiidiin. Taan taana kastaah shaawti door han daayi kiidiin." idi.

5 Tehadꞌaayeeti kwirsi kehii iistꞌa been, "Shibiba, ani naatka gayiit akwasi!" idi. Malya baruuh, "Een bareeh kitiba! Ani andiyeetuuk tuuna takweet tibari aree sidik tikati." idi.

6 Baruuh anii dehaay, "Tuun faayamaatu! Ani Alfaawwa Oomeegaawwa, Eesuurwa Wꞌagiyaawwa akati. Iyaweeb kasseeh umidhhani yami thawaayee balaashii yam gwꞌasi andi. 7 Kassaah baliin yꞌansiramaab aree toon toona kastooh kwasaami iyadna. Ani Kwaasanaayoohna iikti andi. Baraah han anii ar iikti iyadna. 8 Laakiin oodehay toobꞌiin ibariinwa, ikeefriiwwa, ifaasdaawwa, imadooraawwa, toomaagti kinaawwa, toosehar shagaameen baliibwa, isanama yꞌabidwa, kasseeh igwisreewwa, umhiinuuhna tukwibriitiit balooliini bhar iikti indi. Tuun batuuh tooyat tumalya tikati." idi.

9 Imalak yꞌasaramaayeeb gaal eekas yꞌasarama, tꞌaakharaatiit nasiibi tꞌasarama atab iibriib, eeyaayt anii dehaay, "Mꞌaa, whooyt takat, tudooba rhisi hook andi." idi. 10 Aashuuk aneeb kaleewiyaanheeb, aree umalaktaayi winneet tageega ribaay mooyii dehaay ifiyakeheeb. Baruuh Algudus tumadiina tumugaddas rhisiyaheeb, batuuh Ukwaasanaay tibreetee nꞌati yꞌee rhisiyaheeb. 11 Batuuh Ukwaasanaay umatuunii buubti, winneet alya jawhariit buubti, ooshab tꞌiiteetu, tukarooraatiit nhasti. 12 Batuuh winneet wint heeta tamna malu dheefaayeet tiibri. Aree idheefaayeeb tamna malu malak ingidna. Idheefaayeeb Israaꞌiileet tigabiila titamna malooti sima hooy katabta. 13 Uyintalawiib mhay dheefa iifiina, mhay dheefa tugiblaatiib iifiina, mhay dheefa oosꞌiidiib iifiina, aree mhay dheefa uyindhibiib iifiin. 14 Tumadiinaatiit heeta tamna malu asaasi kehii dꞌarta. Bareeyooh kehii Whooy ilinguumiya itamna malooyi sima kataba.

15 Umalaktaayi aneeb bhaliisamiib, dimꞌaraayt kwoolay tumadiina haay abbariyeet iibri. Tumadiinaati dheefaawwa teheetaawwa haay abbari. 16 Tumadiina gwimadtu, marꞌatu, tumarabꞌa tꞌiiteeti. Baruuh tukwoolaytii tumadiina abbariyanihoob malu alfaawwa fadhig sheewwa kiiloo mitir tiikti. Imagmidwa, imarꞌiiwwa, itageegwa gal iiktiin. 17 Baruuh teheeta abbariyanihoob, asarama tamuun mitra tageegaatu, wꞌaadami abbarti umalaktaayi iidꞌeenaay asagwir mitra tiikti. 18 Teheeta siigwꞌii dꞌaartu, saafi dimꞌaraayt tumadiina tisiwꞌaaliitiit nhasti. 19 Tumadiinaatiit heetaati asaas gwida alya aweeyee daawriimaaba. Wꞌasaas wꞌawwali siigwꞌeebu, umalya asaas yaaguut iikti, umhaya asaas eeraat misikwtu, aree ufadhiga asaas soomiiti awi iikti. 20 Wꞌayya asaas agiig hamashooyu, wꞌasagwira asaas agiig adaroobu, aree wꞌasarama asaas daburjaan iikti. Wꞌasimha asaas jadꞌiibu, wꞌashshadhiga asaas aree yaaguut kirkimiyaay iikti, utamna asaas agiig sootaay iikti. Wꞌasaas utamna gwira aree feeruus iikti, wꞌasaas utamna malya aree jamash iikti. 21 Idheefa itamna malu jawharaaba, gaal dheefaaka gaal jawhar tꞌiiteebi. Tumadiinaati salal uuwin nhas dimꞌaraabu, gidehiisii rhistiniit siwꞌaali tꞌiiteebi.

22 Tumadiinaatiib diini gaw rhaab kaaki. Wꞌankwana Ukwaasana Wꞌalyaawwa Whoowwa diini gawooh ikatiin. 23 Tumadiina masi yint tari tirigt tehiriwt kitti. Ukwaasanaay umatuun tumadiina buubsi. Whu nuurooh ikati. 24 Uudehay bariiyooh nuuriib saki iyadna, aree tubuuti hadꞌa kassooh umraayiisoohna tumadiina shuumi iyadna. 25 Beentooy hawaad biihaayi sabbii, idheefaayaah kassooh oombꞌi door han assami kiidiin. 26 Kassaah idehaya tumadiinaatii dehaay matuunwa hamooyseewwa haay yꞌi iyadna. 27 Najjasamaana han shuumsi kiidiina, isiisakwꞌi sanamaawwa talasaawwa shagaameen han shuumsi kiidiin. Laakiin ismaayaahna Whooy umidhhani kitaabiib katab ikatiineeb aabhat shuumi iyadna.