2 सेमुएल 5

दाऊदो रा राज्य अभिषेक

1 तेबे इस्राएलो रे सब गोत्रा रे परदान लोक दाऊदो रे नेड़े हेब्रोनो दे आई की बोलणे लगे, "सुण, आसे लोक ओर तूँ एक ई कुलो रे ए। 2 जेबे पईले शाऊल म्हारा राजा था, तेबे बी इस्राएलो रा अगुवा तूँ ई था ओर यहोवे ताखे बोलेया, कि मेरी प्रजा इस्राएलो रा ग्वाल़ा ओर इस्राएलो रा परदान तूँ ई ऊणा।"*5:2 पज. 78:71 3 तेबे सारे गोत्रा रे बुजुर्ग हेब्रोनो दे राजा दाऊदो गे आए ओर दाऊद राजे तिना साथे हेब्रोनो रे यहोवे रे सामणे वाचा बानी ओर तिने इस्राएलो रा राजा ऊणे खे दाऊदो रा अभिषेक कित्तेया।

4 जेबे दाऊद राज करने लगेया तेबे से तिया साला रा था, ओर से इस्राएलो दे चाल़िया साला तक राज करदा रया। 5 साढ़े साता साला तक तो तिने हेब्रोनो दे यहूदा पाँदे राज कित्तेया ओर तेतिया साला तक यरूशलेम शईरो दे सारे इस्राएल ओर यहूदा पाँदे राज कित्तेया।

दाऊदो रा यरूशलेमो पाँदे कब्जा करना

6 एक दिन राजे आपणे माणूं साथे लई की यरूशलेम शईरो दे जाई की यबूसी लोका ते लड़ने खे आए, जो तेस देशो दे रणे वाल़े थे। तिने ये समजी की कि दाऊदो री सेना एती नि आई सकदी, तेसखे बोलेया, "जदुओ तक तूँ अन्दे ओर लंगड़ेया खे दूर नि करी लओगा, तदुओ तक एती नि कूसी सकदा।" 7 तेबे बी दाऊदो री सेने सिय्योन नाओं रा गढ़ लई ला, बादो ते से दाऊदो रा शईर बणेया। 8 तेस ई दिने दाऊदे आपणे सिपाईया खे बोलेया, "जो कोई यबूसी लोका खे काणा चाओ, तेसखे चाईयो कि सेयो पाणिये रिया सुरंगा रिये ऊई की शईरो खे जाओ ओर अन्दे ओर लंगड़े जिना ते दाऊद मनो ते नफरत करोआ तिना खे काओ।" इजी ते ये कहावत चली, "अन्दे ओर लंगड़े मईलो दे नि आई सकदे।" 9 बादो ते जेबे दाऊद ओर तेसरे सिपाई तेते शईरो पाँदे कब्जा करी चुके सेयो तेती रणे लगे ओर तेस शईरो रा नाओं दाऊदपुर राखेया। ओर दाऊदे चऊँ कनारे मिल्लो ते लई की पीतरलिया तरफा खे दवाल बणवाई।

10 ओर दाऊदो रा बोल-बाला लगातार जादा ऊँदा गया कऊँकि सेना रा यहोवा परमेशर तेस साथे रओ था। 11 एक दिन सोरो रे राजे हीरामे दाऊदो गे दूत ओर देवदारो री लकड़ी, मिस्त्री ओर राजमिस्त्री पेजे ओर तिने दाऊदो खे एक मईल बणाया। 12 ओर दाऊदो खे निश्चा ऊईगा कि यहोवे आऊँ इस्राएलो रा राजा बणाई की स्थिर करी ता ओर आपणी इस्राएली प्रजा रिया तँईं मेरा राज्य बढ़ाई राखेया।

13 जेबे दाऊद हेब्रोनो ते आया तेबे तिजी ते बाद तिने यरूशलेम शईरो रिया तरफा खे रखैला राखी तिया ओर लाड़िया बणाई तिया ओर तिना सबी जवाणसा ते तेसरे ओर बी माठे-बेटिया पैदा ऊए। 14 तेसरी जो ल्वाद यरूशलेम शईरो रे पैदा ऊई तिना रे नाओं यो ए, मतलब शम्मू, शोबाब, नातान, सुलैमान, 15 यिभार, एलीशू, नेपेग, यापी, 16 एलीशामा, एल्यादा ओर एलीपेलेत।

पलिश्तिया पाँदे जीत

17 जेबे पलिश्तिये सुणेया कि इस्राएलो रा राजा ऊणे खे दाऊदो रा अभिषेक ऊई रा, तेबे सारे पलिश्ती दाऊदो री टोल़ा रे निकल़े; ये सुणी की दाऊद गढ़ो दे चली गा। 18 तेबे पलिश्ती सिपाई आई की रपाईम नाओं री काअटिया दे फैली गे। 19 तेबे दाऊदे यहोवे ते पूछेया, "क्या आऊँ ओर मेरे लोक पलिश्तिया पाँदे अमला करुँ? क्या तां सेयो मेरे आथो दे करी देणे?" यहोवे दाऊदो खे बोलेया, "अमला कर; कऊँकि मां पक्का पलिश्ती तेरे आथो दे करी देणे।"

20 तेबे दाऊद ओर तेसरी सेना बालपरासीमो खे गए ओर दाऊदे सेयो तेथी काई ते। तेबे तिने बोलेया, "यहोवा मां सामणे ऊई की मेरे दुश्मणा पाँदे पाणिए री खाड्डा जेड़ा टूटेया।" इजी बजअ ते तिने तेते जगा रा नाओं बालपरासीम राखेया। 21 तेती पलिश्तिये आपणी मूर्तिया राखी तिया ओर दाऊद ओर तेसरे माणूं तिना खे चकी की लईगे। 22 तेबे दूजी बार पलिश्ती सेना चढ़ाई करी की रपाईम नाओं री काअटिया दे फैली गे। 23 जेबे दाऊदे यहोवे ते पूछेया कि आऊँ तिना पाँदे अमला करुँ तेबे तिने बोलेया, "अमला नि कर; तिना पीछा ते कूमी की तूतो रे डाल़ा सामणे ते तिना पाँदे अमला कर। 24 ओर जेबे तूतो रे डाल़ा री डाल़िया बीचा ते सेना रे चलणे री जी आवाज ताखे सुणो, तेबे ये जाणी की फुर्ती करनी कि यहोवा पलिश्तिया री सेना खे काणे खे यबु मांते आगे आई रा।" 25 यहोवे री एसा आज्ञा रे मुताबिक दाऊद आपणियां सेना साथे मिली की गेबा शईरो ते लई की गेजेर शईरो तक पलिश्तिया खे कांदा गया।