1 एक दिन दाऊदे पूछेया, "क्या शाऊलो रे कराने बीचा ते एबुए तक कोई जिऊँदा बची रा, जेस पाँदे आऊँ योनातानो रिया बजअ ते दया दखाऊँ?" 2 शाऊलो रे कराने रा सीबा नाओं रा एक काम करने वाल़ा था, से दाऊदो गे बुलाया ओर जेबे राजे तेसते पूछेया, "क्या तूँ सीबा ए?" तेबे तिने बोलेया, आ, "तेरा दास सेईए।" 3 राजे पूछेया, "क्या शाऊलो रे कराने बीचे एबुए तक कोई जिऊँदा बची रा ए, जेस पाँदे आऊँ परमेशरो जेड़ी दया दखाऊँ?" सीबे राजे खे बोलेया, "आ, योनातानो रा एक पाऊ जिऊँदा तो आए, पर से लंगड़ा ए।" 4 राजे तेसते पूछेया, "से केई आ?" सीबे राजे खे बोलेया, "से तो लोदबार शईरो दे, अम्मीएलो रे पाऊ माकीरो रे कअरे रओआ।" 5 तेबे दाऊद राजे दूत पेजी की से लोदबारो ते, अम्मीएलो रे पाऊ माकीरो रे कअरो ते बुलाई ला।

6 जेबे मपीबोशेत, जो योनातानो रा पाऊ ओर शाऊलो रा पोता था, दाऊदो गे आया, तेबे मुंए रे पारे थाले पड़ी की माथा टेकेया। दाऊदे बोलेया, "ओ मपीबोशेत!" तिने बोलेया, "आऊँ तेरा दास तेरिया तँईं क्या करी सकूँआ?" 7 दाऊदे तेसखे बोलेया, "डर नि; तेरे बाओ योनातानो रिया बजअ ते मां तां पाँदे जरूर दया करनी ओर तेरे दादे शाऊलो री सारी जमीन ताखे वापस देई देणी ओर तां मेरिया मेजा पाँदे रोज रोटी खाया करनी।" 8 मपीबोपोशेते फेर दाऊदो रे सामणे माथा टेकी की बोलेया, "ओ स्वामी, आऊँ मरे दे कुत्ते जेड़ा ए, आऊँ एते जोगा नि ए कि तूँ मां पाँदे दया करे।" 9 तेबे राजे शाऊलो रे कर्मचारी सीबा खे बुलाई की तेसखे बोलेया, "जो कुछ शाऊल ओर तेसरे सारे कराने रा था से मैं तेरे स्वामिए रे पोते खे देईता रा। 10 आजो ते तूँ आपणे माठे ओर सेवका समेत तेसरी जमीना दे जिम्मीदारा करी की तिजी री उपज ल्याया कर, ताकि तेरे स्वामिए रे पाऊए खे रोटी मिलेया करो, पर तेरे स्वामिए रे पोते मपीबोशेतो मेरी मेजा पाँदे रोज रोटी खाया करनी।" ओर सीबा रे तो 15 पाऊ ओर 20 सेवा करने वाल़े थे। 11 सीबे राजे खे बोलेया, "मेरा स्वामी राजा आपणे दासो खे जो आज्ञा देयो, तिना सबी रे मुताबिक तेरे दासा करना।" तदुए ते ई मपीबोशेत राजकुमारा जेड़ा राजे री मेजा पाँदे रोटी खाणे लगेया।

12 मपीबोशेतो रे बी मीका नाओं रा एक छोटा पाऊ था। ओर सीबा रे कअरे जितणे लोक रओ थे सेयो सारे मपीबोशेतो री सेवा करो थे। 13 मपीबोशेत जो दुँईं पैरा ते लंगड़ा था, यरूशलेम शईरो दे रओ था; ओर से राजे री मेजा पाँदे रोज रोटी खाया करो था।