1 तिना ई दिना रे एड़ा ऊआ कि यहूदा आपणे पाईया खे छाडी की चलीगा ओर तिने हीरा नाओं रे एक अदुल्लामवासी मर्दो गे जाई की रणे लगेया। 2 तेती यहूदे शूआ नाओं री एक कनानी मर्दो री बेटी देखी ओर तेसा साथे ब्या करी की से तेसा गे गया। 3 से गर्भवती ऊई ओर तेसा रे एक पाऊ पैदा ऊआ ओर यहूदे तेसरा नाओं एर राखेया। 4 ओर से फेर गर्भवती ऊई ओर तेसा रे एक ओर पाऊ ऊआ ओर तेसरा नाओं ओनान राखेया। 5 फेर तेसरे एक ओर पाऊ ऊआ ओर तेसरा नाओं शेला राखेया ओर जेस बखते तेसरा जन्म ऊआ, तेस बखते यहूदा कजीब शईरो रे रओ था। 6 कुछ साला बाद यहूदे तामार नाओं री एक जवाणसा साथे आपणे जेठे पाऊ एरो रा ब्या करी ता। 7 पर यहूदा रा से जेठा पाऊ एर यहोवे री नजरा रे दुष्ट था, इजी री खातर यहोवे से काईता।

8 तेबे यहूदे ओनानो खे बोलेया, "आपणी पाबिया गे जा ओर तेसा साथे देऊरो रा तर्म पूरा करी की आपणे पाईए खे ल्वाद पैदा कर।" 9 ओनान तो जाणो था ल्वाद मेरी नि ऊणी; तेबे एड़ा ऊआ कि जेबे से आपणी पाबिया गे गया, तेबे तिने परमेशरो रे जरीये ठराए रे ल्वाद पैदा करने रा कुदरती टंग नि मानेया, जेते कि एड़ा नि ओ कि तेसरे पाईए रे नाओं ते वंश चलो। 10 ये काम जो तिने कित्तेया तिजी ते यहोवा दु:खी ऊईगा ओर तिने से बी काईता।

11 तेबे यहूदे एते डरो रे मारे कि केथी एड़ा नि ओ कि आपणे पाईया जेड़ा शेला बी मरी जाओ, तिने आपणी बऊ तामारा खे बोलेया, "जदुओ तक मेरा पाऊ शेला जवान नि ऊई जाओ तदुओ तक आपणे बाओ रे कअरे बिदुआ ई बणी री रओ।" तेबे तामार आपणे बाओ रे कअरे जाई की रणे लगी। 12 बऊत बखत बीतणे ते बाद यहूदा री लाड़ी जो शूआ री बेटी थी, से मरी गी; तेबे यहूदा शोगो रे दिन पूरे ऊणे ते बाद आपणे दोस्त हीरा अदुल्लामवासी समेत आपणी पेडा-बाकरिया री ऊन कापणे वाल़ेया गे तिम्नाह शईरो खे गया। 13 ओर तामारा खे ये समाचार मिलेया कि तेरा सऊरा आपणी पेडा-बाकरिया री ऊन कापणे खे तिम्नाहो खे चली रा। 14 तेबे तेसे ये सोची की कि शेला जवान तो ऊईगा रा, पर आऊँ तेसरी लाड़ी नि बणी पाई; तेसे बिदुआ रा पईरावा उतारेया ओर कूँडा पाई की आपणे आपू खे टकी ता ओर एनैम शईरो रे फाटको गे, जो तिम्नाहो री बाटा रे ए, जाई की बैठीगी। 15 जेबे यहूदे तामार देखी, तिने से वेश्या समजी, कऊँकि तेसे आपणा मूँ टकी राखेया था।

16 यहूदा बाटा रे तेसा रिया तरफा खे फिरेया ओर तेसा खे बोलणे लगेया, "माखे आपू गे आऊणे दे," कऊँकि तेसखे ये पता नि था कि से तेसरी बऊ ए। ओर से बोलणे लगी, "जे आऊँ ताखे आपू गे आऊणे देऊँ, तो तां माखे क्या देणा?" 17 तिने उत्तर दित्तेया, "मां आपणी बाकरिया रे चूण्डो बीचा ते एक बाकरिया रा बच्चा तांगे पेजी देणा।" तेबे तामारे बोलेया, "पला तेसरे पेजणे तक क्या तूँ मांगे कुछ रईन राखी जाएगा?" 18 तिने पूछेया, "आँऊ तांगे क्या रईन राखूँ?" तेसे बोलेया, "आपणी मुअर ओर गले़ री डोरी ओर आपणे आथो री सोठी।" तेबे तिने तेसा खे सेयो चीजा देईतिया ओर तेसा गे गया ओर से तेसते गर्भवती ऊईगी। 19 तेबे से उठी की चली गी ओर आपणा कूँडा उतारी की आपणा बिदुआ रा पईरावा फेर पईनी ता।

20 तेबे यहूदे बाकरिया रा बच्चा आपणे दोस्त अदुल्लामवासीए रे आथो रे पेजीता कि से रईन राखी रिया चीजा तेसा जवाणसा रे आथो ते छुड़ाई की ली आओ; पर तेसखे से जवाणस नि मिली।

21 तेबे तिने तेथो रे लोका ते पूछेया, "से देवदासी जो एनैमो री बाटा रिया तरफा खे बैठी थी, से केईए?" तिने बोलेया, "एती तो कोई देवदासी नि थी।" 22 तेबे तिने यहूदा गे वापस ऊई की बोलेया, "माखे से नि मिली ओर तेते जगा रे लोके बोलेया, ‘एती तो कोई देवदासी नि थी।’ "

23 तेबे यहूदे बोलेया, "अच्छा, से रईन राखी रिया चीजा तेसा गेई रणी दे, नई तो आसे लोक तुच्छ गिणे जाणे; देख, मैं तो ये बाकरिया रा बच्चा पेजेया था, पर से ताखे नि मिली।"

24 तकरीबन तीन मीन्ने बाद यहूदे खे ये समाचार मिलेया, "तेरी बऊए तामारे व्याभिचार करी राखेया; बल्कि से व्याभिचारो ते गर्भवती बी ऊईगी री।" तेबे यहूदे बोलेया, "तेसा खे बारे ली आओ कि से फूकी जाओ।"

25 जेबे तेसा खे बारे निकयाल़ने लगी रे थे, तेबे तेसे आपणे सऊरे खे ये संदेशा पेजेया, "जेस माणूंए रिया यो चीजा ए; तेसते ई आऊँ गर्भवती ऊई री," फेर तेसे ये बी बोलेया, "पछयाण तो सयी कि ये मुअर ओर गले़ री डोरी ओर सोठी केसरी ए।"

26 यहूदे तिना चीजा खे पछयाणी की बोलेया, "ये तो मांते जादा बेकसूर ए, कऊँकि मैं से आपणे पाऊ शेला खे नि ब्यायी।" ओर तिने तेसा साथे फेर कदी इजी रे बारे दे गल्ल नि कित्ती।

27 ओर जेबे तेसा रे बच्चा जमणे रा बखत आया, तेबे ये पता लगेया कि तेसा रे गर्भो रे जुड़ूंआ बच्चे ए। 28 जेबे तेसा रे जमणे लगेया, तेबे एकी बच्चे रा आथ बारे आया ओर दाईये लाल सूतो रा तागा लई की तेसरे आथो रे ये बोली की बानी ता, "पईले येई पैदा ऊआ।" 29 जेबे तिने आपणा आथ पीछे टाईता तेबे तेसरा पाई पैदा ऊईगा। तेबे तेसे दाईये बोलेया, "तूँ कऊँ जबरदस्ती बारे आईगा?" इजी खे तेसरा नाओं पेरेस राखेया। 30 पीछा ते तेसरा पाई जेसरे आथो रे लाल सूतो रा तागा बानी राखेया था, पैदा ऊआ ओर तेसरा नाओं जेरह*38:30 जेरह मतलब लाल राखेया।