उत्पत्ति 39

7 इना गल्ला ते बाद एड़ा ऊआ कि तेसरे स्वामिए री लाड़िए यूसुफो रिया तरफा खे आख लगाई ओर बोलेया, "मां साथे सओ।"

8 पर तिने तेसा री ये गल्ल नि मानी ओर आपणे स्वामिए रिया लाड़िया खे बोलेया, "सुण, जो कुछ एते कअरो रे ए, से मेरे आथो रे ए; तिजी रे बारे दे मेरा स्वामी कुछ नि जाणदा ओर तिने सब कुछ मेरे आथो रे सम्बाल़ी ता रा। 9 एते कअरो रे मांते बड़ा कोई निए ओर तिने ताखे छाडी की, जो तेसरी लाड़ी ए; सब कुछ मांगे छाडी राखेया; तेबे पला, आऊँ इतणी बड़ी दुष्टता करी की परमेशरो रा पापी कऊँ बणूँ?" 10 ओर एड़ा ऊआ कि से हर रोज यूसुफो साथे गल्ला करदी रई, पर तिने तेसा री नि मानी कि तेसा गे लेटो या तेसा साथे रओ। 11 एकी दिन एड़ा ऊआ कि यूसुफ आपणा काम-काज करने खे कअरे गया ओर कअरो रे नौकरा बीचा ते कोई बी कअरो रे पीतरे नि था।

12 तेबे तेसे जवाणसे तेसरे टाल्ले पकड़ी की बोलेया, "मां साथे सओ," पर से आपणे टाल्ले तेसा रे आथो रे छाडी की नठीगा ओर बारे निकल़ी गा।