Gênesis 50

याकूबो री मौत

1 तेबे यूसुफ आपणे बाओ रे मुंए पाँदे पड़ी की रोया ओर तेसरे गल़े लगेया। 2 ओर यूसुफे तिना बैदा खे, जो तेसरी सेवा करो थे, आज्ञा दित्ती कि मेरे बाओ रे मरे रे शरीरो दे खुशबूदार चीजा परो; तेबे बैदे इस्राएलो रे मरे रे शरीरो रे खुशबूदार चीजा परी तिया। 3 ओर तेसरे चाल़ी दिन पूरे ऊए, कऊँकि जिना री लोथा रे खुशबूदार चीजा परी जाओईया, तिना खे इतणे ई दिन पूरे लगोए ओर मिस्री लोक तेसरिया तँईं 70 दिना तक शोग करदे रये।

4 जेबे तेसरे शोगो रे दिन बीतीगे, तेबे यूसुफ फिरौनो रे कराने रे लोका खे बोलणे लगेया, "जे तुसा री कृपा-दृष्टि मां पाँदे ओ तो ये बिनती फिरौनो खे सुणाओ, 5 मेरे बाओ ये बोली की कि देख, आऊँ मरने वाल़ा ए, माखे ये कसम खुल़ाई, ‘जो कब्र मैं आपू खे कनान प्रदेशो रे खणायी राखी तिदे ई तूँ माखे माट्टी देओगा।’ इजी री खातर माखे एबे तेती जाई की आपणे बाओ खे माट्टी देणे री आज्ञा दे, तिजी ते बाद मां वापस आई जाणा।"

6 तेबे फिरौने बोलेया, "जाई की आपणे बाओ री खुल़ाई री कसमा रे मुताबिक तिना खे माट्टी दे।" 7 तेबे यूसुफ आपणे बाओ खे माट्टी देणे खे चलीगा ओर फिरौनो रे सारे काम करने वाल़े, मतलब तेसरे भवनो रे स्याणे ओर मिस्र प्रदेशो रे स्याणे तेस साथे चले। 8 ओर यूसुफो रे सारे कअरो वाल़े, ओर तेसरे पाई ओर तेसरे बाओ रे कअरो रे सारे लोक बी साथे गये; पर सेयो आपणे बाल-बच्चे, ओर पेडा-बाकरिया ओर गाय-बल़द गोशेन प्रदेशो रेई छाडी गे। 9 ओर तेस साथे रथ ओर सवार गए, ईंयाँ पीड़ बऊत ऊईगी। 10 जेबे सेयो आतादो रे खल्याणो तक, जो यरदन नदिया ते पार ए, पऊँचे, तेबे तेती बऊत जादा शोग कित्तेया ओर यूसुफे आपणे बाओ खे साता दिना रा शोग कराया। 11 आतादो रे खल्याणो रे शोगो खे देखी की तेते प्रदेशो रे रणे वाल़े कनानिये बोलेया, "ये तो मिस्रिया रा कोई बड़ा पारी शोग ऊणा।" इजी बजअ ते तेते जगा रा नाओं आबेलमिस्रैम पड़ेया ओर से यरदनो ते पार ए।

याकूबो खे मकपेला री गुफा रे दबाणा

12 याकूबो रे माठेया ठीक सेई काम कित्तेया जेतेरी तिने तिना खे आज्ञा दित्ती थी; 13 फेर तिने तेसखे कनान प्रदेशो रे जाई की मकपेला री तेसा जमीना वाल़ी गुफा रे, जो मम्रे रे सामणे ए, माट्टी दित्ती; जो अब्राहमे हित्ती एप्रोनो ते इजी खेई मोले लई थी, कि से कब्रिस्तानो खे तेसरी आपणी जमीन ओ। 14 आपणे बाओ खे माट्टी देई की यूसुफ आपणे पाईया साथे ओर तिना सबी साथे जो तेसरे बाओ खे माट्टी देणे खे तेस साथे गये थे, मिस्रो खे वापस आईगे।

यूसुफो री आपणे पाईया खे ईम्मत देणी

15 जेबे यूसुफो रे पाईए देखेया कि म्हारा बाओ मरीगा रा, तेबे बोलणे लगे, "क्या पता कि यूसुफ एबे आसा पीछे पड़ो ओर जितणी बुराई आसे तेस साथे कित्ती थी सबी रा पूरा बदला आसा ते लओ।" 16 इजी खे तिने यूसुफो खे ये संदेशा पेजेया था, "तेरे बाओ मरने ते पईले आसा खे ये आज्ञा दित्ती थी, 17 ‘तुसे यूसुफो खे ईंयाँ बोलेयो कि आसे बिनती करूँए कि तूँ आपणे पाईया रे पाप ओर पाप माफ करी दे; आसे तो तां साथे बुराई कित्ती थी, पर एबे आपणे बाओ रे परमेशरो रे दासा रे पाप माफ कर।’ " तिना री इना गल्ला खे सुणी की यूसुफ रोणे लगेया। 18 ओर तेसरे पाई आपू बी जाई की तेस सामणे रूड़ी गे ओर बोलेया, "देख, आसे तेरे दास ए।"

19 यूसुफे तिना खे बोलेया, "डरो नि, क्या आँऊ परमेशर ए कि तुसा खे सजा देऊँ? 20 जबकि तुसे मेरिया तँईं बुराईया रा बिचार कित्तेया था; पर परमेशरे तेसी गल्ला रे पलाईया रा बिचार कित्तेया, जेते की से एड़ा करो, जेड़ा कि आजके दिनो रे सामणे ए कि बऊत सारे लोका रे प्राण बची जाओ। 21 इजी खे एबे डरो नि, मां तुसा रा ओर तुसा रे बच्चेया रा पालण-पोषण करदे रणा।" ईंयाँ यूसुफे तिना खे समजयाई-बुजाई की तसल्ली दित्ती।

यूसुफो री मौत

22 यूसुफ आपणे बाओ रे कराने समेत मिस्रो रे रओ था ओर यूसुफ 110 साला तक जिऊँदा रया। 23 ओर यूसुफे एप्रैमो रे पड़पोते बी देखी लये ओर मनश्शे रे पोते बी, जो माकीरो रे पाऊ थे, सेयो पैदा ऊए ओर यूसुफे सेयो गोदा रे लये।

24 यूसुफे आपणे पाईया खे बोलेया, "आँऊ तो मरने वाल़ा ए; पर परमेशरो पक्का तुसा री सम्बाल़ लणी ओर तुसे एते प्रदेशो ते निकयाल़ी की तेस प्रदेशो दे पऊँचाई देणे, जेतेरे देणे री तिने अब्राहम, इसहाक ओर याकूबो ते कसम खाई थी।"*50:24 इब्रानी 11:22 25 फेर यूसुफे इस्राएलिया खे ये बोली की कि परमेशरो पक्का तुसा री सम्बाल़ लणी, तिना खे इजी रे बारे दे कसम खुल़ाई, "आसा तेरी आड्डिया एते प्रदेशो ते तेते प्रदेशो रे लई जाणिया।"*50:25 इब्रानी 11:22 26 ईंयाँ यूसुफ 110 साला रा ऊई की मरेया ओर तेसरे मरे रे शरीरो रे खुशबूदार चीजा परिया ओर तेसरा शरीर मिस्रो रे एक सन्दूको रे राखेया।