न्यायियो 7

गिदोनो री मिद्यानिया पाँदे जीत

1 तेबे गिदोन जेसखे यरूब्बाल बी बोलोए ओर सारे लोक जो तेस साथे थे प्यागा जल्दी उठे ओर हरोद नाओं री सूबल़ा गे आपणे डेरे खड़े कित्ते ओर मिधानिया रे डेरे तिना रे उत्तरी तरफा खे मोरे नाओं री पाह्ड़िया रे नेड़े तराईया दे थे। 2 तेबे यहोवे गिदोनो खे बोलेया, "जो लोक तां साथे ए सेयो बऊत जादा ए। आऊँ मिधानिया खे तिना रे कब्जे दे करने खे तिना री मताद नि करी सकदा, नई तो इस्राएली लोका ये बोली की कमण्ड करना ओर बोलणा की आसे मिधानी लोका पाँदे आपू जीत आसिल कित्ती। 3 इजी री खातर तूँ इस्राएली लोका बीचे जा ओर तिना खे बोल कि जो कोई लड़ाई करने ते डरोआ, से गिलाद पाह्ड़ो ते आपणे कअरो खे वापस चली जाओ।" तेबे 22,000 लोक आपणे डेरेया खे वापस ऊईगे ओर बस तेती 10,000 लोक ई रयी गे।

4 तेबे यहोवे गिदोनो खे दूजी बार बोलेया, "यबु बी लोक जादा ए; तिना खे सूबल़ा गे थाले लयी चल, तेती मां सेयो तेरिया तँईं चुणने ओर जिना रे बारे दे आऊँ ताखे बोलूँ सेयो तां साथे चलो, सेयो तो तां साथे जाओ; ओर जिना रे बारे दे आऊँ ताखे ना करुँ, तिना बीचा ते कोई बी तां साथे नि जाओ।" 5 तेबे गिदोन तिना खे सूबल़ा गे थाले लयी गा; तेती यहोवे गिदोनो खे बोलेया, "जितणे लोक कुत्ते जेड़े जीबा साथे चाटी की पाणी पियो तिना खे लग राख ओर तेड़े ई सेयो लोक बी लग करने जिना जानूआ रे पारे ऊई की आथे की पाणी पीणा।" 6 जिने लोके आथ लगाई की कुत्तेया जेड़े जीबे की चाटी की पाणी पिया तिना री गिणती 300 ऊई ओर बाकी सबी लोके जानू थाले लगाई की पाणी पिया। 7 तेबे यहोवे गिदोनो खे बोलेया, "इना 300 लोका खे जिने जीबे की चाटी की पाणी पीणे वाल़ेया रे जरीये मां तुसे छुड़ाणे ओर मिधानी लोक तेरे वशो दे करी देणे; तेबे बाकी सारे आपणे-आपणे डेरेया खे वापस ऊई जाओ।" 8 तेबे गिदोने तिना बाकि लोका रे आथो ते रोटी लयी ओर आपणे-आपणे रड़सिंगे लये ओर तिने इस्राएलो रे सारे मर्द आपणे-आपणे डेरे खे पेजी ते, पर सेयो 300 मर्द आपू गे राखे ओर मिधानी लोका रे डेरे गिदोनो रे डेरे ते निठे तराईया दे खड़े थे।

9 तेसा ई राती यहोवे गिदोनो खे बोलेया, "उठ, तिना रे डेरे पाँदे अमला कर; कऊँकि मैं तिना पाँदे ताखे जीत दलाई ती री। 10 पर जे तूँ कल्ला अमला करने ते डरेया, तो आपणे दास फूरे खे तिना रे डेरे गे आपू साथे थाले लई जा। 11 तेती जाई कि सुण कि सेयो क्या बोलणे लगी रे; तिजी ते बाद ताखे तेते डेरे पाँदे अमला करने रा याओ ऊणा।" तेबे से आपणे सेवक फूरे खे साथे लयी की मिधानी सिपाईया गे जो डेरे रे कूणे दे थे उतरी गा। 12 मिधानी, अमालेकी ओर पूर्वी लोक तो टिड्डिया जेड़े बऊत थे जो तराईया दे फैली रे थे ओर तिना रे ऊँट बालूए री कणियां जेड़े गिणतिया ते जादा थे। 13 जेबे गिदोन तेती आया, तेबे एक जणा आपणे केसी साथिये गे आपणा सुफना ईंयाँ बताणे लगी रा था, "सुण, मैं सुफने दे देखेया कि जौ री एक रोटी पलठदी-पलठदी की मिधानो रे डेरे दे आई ओर डेरे खे एड़ी टक्कर बाई की से टल़ीगा ओर डेरा एड़ा पल़्टी ता कि से टल़ीगा।" 14 तेबे तेसरे साथिये ज्वाब दित्तेया, "ये योआशो रे पाऊ गिदोन नाओं रे एक इस्राएली मर्दो री तलवारी ईए; कऊँकि परमेशरे मिधान ओर तेसरे सबी डेरेया पाँदे जीत दलाई ती री।" 15 से सुफना ओर तेतेरा मतलब सुणी की गिदोने परमेशरो रा तन्यवाद कित्तेया ओर इस्राएलो रे डेरे दे वापस ऊई की बोलेया, "उठो, यहोवे मिधानी सेना तुसा रे वशो रे करी ती री।" 16 तेबे तिने तिना 300 मर्दा रे तीन चूण्ड कित्ते ओर एकी-एकी मर्दो रे आथो रे एक-एक रड़सिंगा ओर खाली कअड़ा दित्तेया ओर कअड़ेया रे पीतरे एक-एक मशाल थी। 17 तेबे गिदोने तिना खे बोलेया, "माखे देखो ओर तेड़ा ई करो; सुणो, जेबे आऊँ तिना डेरेया रे कूणे गे पऊँछूं, तेबे जेड़ा आऊँ करुँ, तेड़ा ई तुसे बी करना। 18 मतलब जेबे आऊँ ओर मां साथले सारे रड़सिंगा बजाओ तेबे तुसे बी डेरे रे चऊँ कनारे रड़सिंगे बजाणे ओर ललकारना, यहोवे री जीत ओर गिदोनो री जीत।"

19 आदिया राती दे जिंयाँ ई पईरेदारा री बदली ऊई तिंयाँ ई गिदोने आपू साथले 100 मर्दा समेत मिधानिया रे डेरे रे कूणे दे जाई की रड़सिंगा बजाया ओर आपणे आथो रे कड़े तोड़ी ते। 20 तेबे तीनो चूण्डे बी आपणे रड़सिंगे बजाए ओर कअड़े तोड़ी ते ओर आपणे-आपणे खूँजे आथो दे मशाल ओर दाँणे आथो दे बजाणे खे रड़सिंगा लयी की चींगणे लगे, यहोवे री लड़ाई ओर गिदोनो री लड़ाई। 21 तेबे सेयो डेरेया रे चऊँ कनारे आपणी-आपणी जगा रे खड़े दे रये ओर मिधानी सेना रे सारे लोक इस्राएली लोका खे देखी की डरीगे ओर चींगदे ऊए तेथा ते नठीगे। 22 ओर गिदोन ओर तेसरे साथिये 300 रड़सिंगे बजाए ओर यहोवे एड़ा कित्तेया कि मिधानिया रे सिपाई एकी दूजे खे तलवारी साथे काणे लगे; ओर बचे दे मिधानी सिपाई सरेरा शईर ओर बेतशिता शईरो खे नठीगे ओर तब्बात शईरो रे बन्ने आबेल महोला तक नठीगे। 23 तेबे इस्राएली लोक मतलब नप्ताली, आशेर ओर मनश्शे रे गोत्रो रे मर्द बुलाए ओर सेयो कट्ठे ऊई की मिधानिया पीछे दौड़े। 24 ओर गिदोने एप्रैमो रे पाह्ड़ी प्रदेशो दे ये बोलणे खे दूत पेजे, मिधानिया साथे लड़ने खे आओ ओर यरदन नदिया रे काअटा ते बेतबारा तक तिना ते पईले आपणे वशो दे करी लो। तेबे सारे एप्रैमी मर्दे कट्ठे ऊई की यरदन नदिया ते बेतबारा तक आपणे वशो रे करी ता। 25 ओर तिने ओरेब ओर जेब नाओं रे मिधानो रे दो परदाना खे पकड़ेया; ओर ओरेबो खे ओरेब नाओं री चट्टानी पाँदे*7:25 ओरेब नाओं री चट्टानी पाँदे जेते चट्टानी पाँदे ओरेब काया तेसरे मरने ते बाद एते रा नाओं ओरेब चट्टान राखेया , ओर जेबो खे जेब नाओं रे अंगूरा रे रसकुण्डो*7:25 जेब नाओं रे अंगूरा रे रसकुण्डो जेबो रे एस कुण्डो पाँदे काणे ते बाद एते कुण्डो रा नाओं जेब कुण्ड पड़ेया पाँदे काया; ओर सेयो मिधानिया रा पीछा करदे रये; ओर ओरेब ओर जेबो रे सिर बाडी की यरदन नदिया ते पार गिदोनो गे लयी गे।