1 Samuel 13

शाऊल राज़ेरो पेइलो पाप ते तैसेरो नितीजो

1 शाऊल 30 सालां केरि उमरी मां इस्राएली लोकन पुड़ राज़ केरने लगो ते तैनी दूई सालन तगर*13:1 दूई सालन तगर शाऊल एक्‍की साले तगर राज़ कियूं, ते ज़ैखन तै दूइयोवं साले सारे इस्राएले पुड़ राज़ केरने लगो। राज़ कियूं।

2 फिरी शाऊले इस्राएली लोकन मरां 3000 मड़द अपने लेई च़ुने; ते तैन मरां 2000 शाऊले सेइं साथी मिकमाश नगरे मां ते बेतेल नगरेरे पहाड़ी प्रदेशे पुड़ राए, ते 1000 योनाताने साथी बिन्यामीन प्रदेशेरे गिबा नगरे मां राए; ते होरे सारे लोक तैनी अपने-अपने डेरे जो भेज़े। 3 तैखन योनाताने पलिश्ती लोकां केरि चौवकी ज़ै गेबा नगरे मां थी ज़ींती; ते एसेरी खबर पलिश्ती लोकन तगर पुज़्ज़ी। तैखन शाऊले सारे मुल्खे मां नरशिंगो बज़ेइतां ई समाद भेज़ो, "इब्रि लोक शुन्न।" 4 ते सारे इस्राएली लोकेईं ई खबर शुनी कि शाऊले पलिश्ती लोकां केरि चौकी ज़ींतोरीए, ते इन भी कि पलिश्ती लोक इस्राएली लोकन सेइं नफरत केरने लगोरेन। तैखन लोक शाऊले सेइं साथी च़ेलतां गिलगाल नगरे मां अकोट्ठे भोइ जे।

5 पलिश्ती लोक इस्राएली लोकन सेइं लड़ाई केरने लेई अकोट्ठे भोइ जे, तैनेईं 30000 रथ, ते 6000 सुवार, ते समुद्रेरे बन्नेरे रेतरे ज़ेरे बड़े सिपाही अकोट्ठे भोए; ते बेतावेन*13:5 बेतावेन बेतेल नगरेरू होरू नवं नगरेरे पूरबेरे पासे गेइतां मिकमाश नगरे मां डेरे लाए। 6 ज़ैखन इस्राएली सेना हेरू कि अस खतरे मां पेई जेवरेम, तैखन तैन मरां कही सिपाही कुढन मां, झ़ैल्‍लन, शफड़न, गत्तन ते खुहन मां, गेइतां छ़प्पे। 7 ते किछ इस्राएली सिपाही यरदन दरियाए पार भोइतां गाद ते गिलादेरे प्रादेशन मां च़ले जे; पन शाऊल गिलगाल नगरे मां राव, ते सारे लोक डेरतां थरकने लगे ते तैस पत्ती च़ले जे।

8 शाऊल शमूएलेरे ठहरावरे वक्तेरे मुताबिक सत दिहाड़न तगर इंतज़ार केरतो राव; पन शमूएल गिलगाल नगरे मां न अव, ते सिपाही तैस करां च़लने गाने लगे। 9 एल्हेरेलेइ शाऊले ज़ोवं, "होमबलि ते मेलबलि मीं कां आनां।" तैखन तैने एप्पु होमबलि च़ाढ़ी। 10 ज़ेरि तै होमबलि च़ाढ़ी, त कुन हेरतन कि शमूएल तैड़ी पुज़्ज़ो; ते शाऊले तैस सेइं मिलने ते सुवागत केरनेरे लेई निस्सो। 11 शमूएले पुछ़ू, "तीं एन कुन कियूं?" शाऊले ज़ोवं, "ज़ैखन मीं हेरू कि सिपाही मीं करां इरां-उरां च़लोरेन, ते तू ठहरावरे दिहाड़न मां न अव, ते पलिश्ती लोक मिकमाश नगरे मां अकोट्ठे भोए, 12 तैखन मीं सोचू कि पलिश्ती गिलगाल नगरे मां मीं पुड़ हमलो केरेले, ते मीं यहोवा कां बिनती भी नईं कियोरीए; एल्हेरेलेइ मीं मजबूर भोइतां होमबलि च़ाढ़ी।" 13 शमूएले शाऊले सेइं ज़ोवं, "तीं बेवकूफरू कम कियूं; तीं अपने परमेशर यहोवारो हुक्म न मन्नो; नईं त यहोवा तेरी हुकूमत इस्राएले पुड़ हमेशा बनेइतां रखेथो। 14 पन हुनी तेरू राज़ बनोरू न रालू; यहोवा अपने लेई अक एरहो मैन्हु तोपोरोए ज़ै तैसेरे मनेरे मुताबिके; ते यहोवा तै अपने लोकन पुड़ प्रधान भोनेरे लेई ठहरावरोए, किजोकि तीं यहोवारो हुक्म न मन्नो।"

15 तैखन शमूएल तैट्ठां च़लो जेव, ते गिलगाल नगरेरां बिन्यामीनेरे गिबा नगरे मां जेव। ते शाऊले ज़ैना सिपाही तैस सेइं साथी गने तैना 600 थिये।

पलिश्ती केरि हार

16 ते शाऊल ते तैसेरू मट्ठू योनातान ते अपने सिपेहिन सेइं साथी थिये तैना बिन्यामीन प्रदेशेरे गेबा नगरे मां राए; ते पलिश्ती लोक मिकमाश नगरे मां डेरो लेइतां बिश्शोरे राए। 17 ते पलिश्ती केरे डेरन मरां हमलो केरनेबाले ट्लाई जथे बनेइतां निस्से; अक जथो शूआल नंव्वेरे प्रदेशेरे पासे मुड़तां ओप्रा नगरेरे बत्तां च़लो, 18 ते दूइयोवं जथो फिरतां बेथोरोन नगरेरे बत्तां च़लो, ते ट्लेइयोवं जथो फिरतां तैस मुल्खेरी बत्तां च़लो ज़ै सबोईम नव्वेंरी पहाड़ेरे पासे ज़ै सुनसान ठैरारे पासे।

19 तैस वक्ते मां पूरे इस्राएल मुल्खे मां लुहार कोन्च न थियो मैलतो, किजोकि पलिश्ती लोकेईं ज़ोवरू थियूं, "इब्रि लोक तलवार या भालो न बनेई सकन।" 20 एल्हेरेलेइ सारे इस्राएली लोक अपने-अपने हल्‍लां केरे फाल ते भाले, मैक्‍कु, ते ड्लातां पट्लनेरे लेई पलिश्ती लोकन कां गाते थिये; 21 पन तैन केरां ड्लातां, फाल, ज़मीनदारी केरनेरे लेई केखू, ते मैक्‍कु केरि धार तिख्खी केरनेरे लेई रेती रखते थिये। 22 एल्हेरेलेइ लड़ाई केरनेरे दिहाड़े शाऊल ते योनातानेरे सैथन मरां कोन्ची कां न त तलवार थी ते न भालो, तैना सिर्फ शाऊल ते तैसेरे मट्ठे योनाताने कां थिये। 23 ते पलिश्ती लोकां केरे चौकरे सिपाही निस्तां मिकमाशेरी वैदी मांजो जे।