Apocalipse 20

Satan eekɔɔlaa é membok

1 Bhii tak, mɛ eezɛbee fofop ngɔt edus tɔ gwoo, esul pɛ si, nyɛ nadi ɛ́ nɛ sap boo guk na dim-dim di ààbɛ nɛ ɛsik ɛ nɛ boo kel ghwooz é mbɔ. 2 Nyɛ eezɛmɛt dhalaghɔŋ, nyɔ na mwa, ye kwyɛl ɛlɛɛ ɛ́ dim mot mɛkɔŋ nɛghu Satan. Wɔ gwaa, nyɛ zɛkɔl nyɛ, lóo nyɛ é membok pɛ nyɛ aakɛdi membu mil wat ɛ. 3 Bhii fofop nalóo nyɛ tɔ boo guk na dim-dim di ààbɛ nɛ ɛsik ɛ, nyɛ eezɛkɔɔl yɛ nɛ sap, nyɛ eezɛtiŋal boo ɛtuŋa pɛ kɔ tak, kɛl luk, etɛɛ náá, dhalaghɔŋ needi ààbaasa náá, bot ɛ mɛdhik wo ze, kɛkum é ghɛŋ membu mil menek aadjaala ɛ. Bhii tak, nyɛ waawyiselaa étɛp ba mɔɔ ɛwala.

4 Bhii tak, mɛ eezɛbee mɛbhóó mɛ mɛkoozi, bot ɛ nadi mendiidel kɔ tak ɔ naabela ghwyil ɛpɛ́ɛ ɛ bot. Mɛ naabaabee esisim e bot ɛ natsakaa kɔ ɛsu ɛ esosoob bɔɔ dum nɛ etsɛɛtsɛ ee Yezu natel ɛ, nɛ Mɛkpa ɛ Zɛɛb. Bot binɔk nabɛ ɛ́ ààduwal tit nɛ naghisɛ yɛ, bɛ nabɛ ɛ́ ààbela geka tit kɔ ebhata-bhwoob, ààkobɛ-bɛak é mbɔ. Bɛ naagom, bɛ naadi sama nɛ Klisto membu mil wat. 5 Bɛdhiiti bot ɛ nagwyɛ ɔ, nabɛ ɛ́ ààgom ɛsok nɛ membu mil wat (1 000) yenek nɛ si. Yɛ ɛ́ ɛgom ɛ bot yii mɛkɛn. 6 Mɛmyaala nɛ bot ɛ Zɛɛb nagomal é ɛgom ɛ mɛkɛn ɔ. Tin, bɛ ɛ́ bot ɛ Zɛɛb, ɛsyee ɛ bhɔɔba tokapɛ nɛ ghwyil kɔ lɔɔ. Deenek, bɛ kadi ɛ́ bɛghaa-Zɛɛb nɛ yɛ Klisto, bɛ waakɔk sama nɛ Klisto membu mil wat.

Satan eepɛ́ɛa

7 É ghɛŋ membu mil wat (1 000) yenek aadjala ɛ, Satan aawyiselaa é membok, 8 nyɛ waatɔ́ kɛkɔɔ bot ɛ mɛdhik djas di kɔ etuma ená é bɔs ɔ, ye kwyɛl ɛlɛɛ ɛ́, Ghɔɔg nɛ Maghɔɔg*20.8 Ghɔɔg nɛ Maghɔɔg yɛ ɛ́ deenek ɛ́ bot ɛ mbyak eYuda nadi edjedjóo ekyee e mɛdhik mɛ bot ɛ mɛbhuka ɛ bɔn ɛ Zɛɛb é mɛsik mɛ bhwak. Yɛ aabelaa ɛ́ tɔ Ɛze 38–39.. Nyɛ aasɛɛg bɛ étɛp ɛduu tuub. Bɛ aadi ɛ́ ɛbuɛpe dáa bɛsyɛ é ngwoob boo dii mɛsɔn. 9 Bɛ eezɛwyɛɛza kɔ ɛko ɛ bɔs djas. Bɛ eezɛdii ghaada Zɛɛb di ekwyɛl ɛ, di bot ɛ zedum koŋ nɛ Zɛɛb di ɔ. Tin, du eezɛdus pɛ tɔ gwoo, wɔ gwaa, ye zɛsilal bɛ. 10 Wɔ gwaa, dim mot mɛkɔŋ, mot nadi ekɔɔ bɛ ɔ, zɛmwasaa tɔ tok du mɛsii na goo-goo, pɛ kyee tit nɛ bɛngoolel ɛ Mɛkpa ɛ Zɛɛb yii mɛkɔŋ di ɔ. Deenek, bɛ aadi ɛ ezukaa mwos nɛ pum kɔm-kɔm.

Mɛpɛ́ɛa mɛ mɛsik

11 Bhii tak, mɛ eezɛbee boo bóó mɛkoozi na puu, nɛ mot ndiidel kɔ tak. Gwoo nɛ bɔs naazɛdiib sok bhwoob’ɛ, mot nabɛ ɛ́ ààkabaabee yɛ. 12 Bhii tak, mɛ eezɛbee bot ɛ nazegwyɛ ɔ, bot di nɛ mbyok nɛ bot ɛ ààdi nɛ mbyok ɔ, nabɛ ɛ́ metetel sok bóó mɛkoozi. Tin, bɛmɛkana naazɛdiiaa, wɔ gwaa, dhiiti mɛkana zɛbaadiiaa, yenek nabɛ ɛ́ mɛkana mɛ tsik. Bot ɛ nazegwyɛ ɔ napɛ́ɛaa ɛ́ dum nɛ sa bɛ nasa ɛ, dáa ye nazekwyalaa tɔ bɛmɛkana ɛ. 13 Boo dii mɛsɔn naazɛbulal bot ɛ nagwyɛ tɔ tak ɔ, wɔ gwaa, ɛsyee nɛ dɛl ɛ edim e bot ɛ nazegwyɛ ɔ, zɛbulal yɛ pe. Deenek, mot nɛ mot naapɛ́ɛaa dum nɛ sa nyɛ nasa ɛ. 14 Tin, ɛsyee nɛ dɛl ɛ edim e bot ɛ nazegwyɛ ɔ, zokazɛmwasaa tɔ tok du. Tok du tak ɛ́ ɛsyee bhɔɔba. 15 Deenek, mot djas nadi ààbɛ nɛ din kwyala tɔ mɛkana mɛ tsik ɔ, nyɛ naamwasaa tɔ tok du yenek.