1 Bhii tak, fofop naazɛlyaal mɛ dii tsik nadi edjhaazal dáa ɛkok ɛ mɛtaadak ɛ, ye nadi ewyis ɛ́ tɔ bóó mɛkoozi Zɛɛb nɛ Mɔn bhata. 2 Dii tak nadi edhaa kuku ghaada. Le tsik nabɛ ɛ́ pak mɛmbɔ mɛmbá mɛ dii. Le tak nadi edjɛ bhum esok kam nɛ ebá tɔ mbu wat, deenek, sok wat tɔ ngon wat. Tin, eka e tak ɛ́ di edjɛ tsik nɛ bot ɛ mɛdhik. 3 Yɛ aanàkabaadi nɛ dhiiti sonok di náá, yɛ waabela mbee baka ɛ.
Bóó mɛkoozi Zɛɛb nɛ Mɔn bhata aadi ɛ́ tɔ ghaada tak. Tin, bot ɛ mɛsa ɛ Zɛɛb ɛ́ waaduwal nyɛ. 4 É di’enek, bɛ waabee ɛbhwoob ɛ lɛ, din ɛ lɛ aadi ɛ́ kwyala kɔ ebhata-bhwoob bɔɔ. 5 Pum aanàkabaadi tak, bot ɛ́ aanàkabaadi nɛ gwyes ngel lama, nɛghu mɛkas mɛ gwyes. Etɛɛ náá, Ghɛŋ Zɛɛb aasa náá, mɛkas mɛ di kɔ bot ɛ mɛsa mɛ, é di’enek, bɛ waakɔk kɔm-kɔm.
6 Bhii tak, fofop eezɛke nɛ nam: «Mɛkpa mak ɛ́ mɛkpa mɛ etsɛɛtsɛ di egoka nɛ ɛwaaa ɛbwaalel ɛ. Tin, Ghɛŋ Zɛɛb, mot di edjɛ etsoŋ nɛ bɛngoolel ɛ Mɛkpa ɛ Zɛɛb ɔ, nyɛ naadhis fofop’ɛ étɛp ɛlyaal bot ɛ mɛsa mɛ, sa di náá yɛ aanàbɔya nɛ ɛsael ɛ.» 7 Yezu eezɛke: «Gwaka, mɛ moo aazyɛ! Mɛmyaala nɛ bot ɛ di elooba nɛ mɛkpa mɛ natelaa di tɔ mɛkana mak ɛ!»
8 Mam Zaŋ, mɛ naagwak, mɛ naabee etɛp bak. Bhii mɛ nagwak nɛ ɛbee ɛ, mɛ naazɛghaaga si sok bhwoob fofop, mot natel mɛ esonok binek, étɛp mɛ needuwal nyɛ. 9 Tin, nyɛ eezɛke nɛ nam náá: «Nàsa deenek! Mɛ ɛ́ mot-mɛsa dáa wɔy, dáa bɔn-nyoog, bɛngoolel ɛ Mɛkpa ɛ Zɛɛb, dáa bot djas di elooba nɛ mɛkpa di tɔ mɛkana mak ɛ. Yɛ ɛ́ Zɛɛb ɛ wɔ di egoka nɛ ɛduwal!»
10 Bhii tak, nyɛ eebaake: «Sa wɔ ààsyel mɛkpa natelaa wɔ, di tɔ mɛkana mak ɛ. Etɛɛ náá, ɛwala nabɛ náá, esa bak aasael ɛ, ye moo kunaa. 11 Mot di esa ɛbiyo ɔ, gheesa ɛbiyo. Mot di nɛ edhuud ɔ, gheedi tɔ yɛ edhuud. Tin, mot di esa enɛm esa ɔ, gheesa enɛm esa, mot di tɔ edɛɛ ɔ, gheedi tɔ edɛɛ bɛ.»
12 Yezu eezɛke: «Gwaka: Mɛ moo aazyɛ! Mɛ aazyɛ nɛ efute étɛp ɛdjɛ mot nɛ mot, dum nɛ mɛsa mɛ nyɛ nasa ɛ. 13 Mɛ ɛ́ Alfa nɛ Omegha, mot mɛkɛn nɛ mot mɛsik, mɛkɛn nɛ mɛsik.»
14 Mɛmyaala nɛ bot ɛ di egwyii ekaad bɔɔ ɔ, etɛɛ náá, bɛ waabela ze ɛdɛ bhum le tsik, da bɛ ɛ́ ɛni tɔ mɛniel mɛ ghaada. 15 Tin, pɛ kel, yɛ ɛ́ nɛ bot ɛ di nɛ mɛfulu dáa bɛbhyɛ ɔ, bot ɛ mɛlyeeb, bot ɛ mɛzɔ, bot ɛ di egó bot ɔ, bot ɛ di eduwal bɛnaghisɛ ɔ, zɛnɔɔ bot djas di ekwyɛl mɛkɔŋ nɛ ɛlɛɛ elɛŋ etsal ɔ!
16 «Mam Yezu, mɛ naadhis fofop’am étɛp ɛkɛlyaal bin etɛp bak djas dum nɛ ezɛɛga mendjaala. Mɛ ɛ́ mɔn dha ɛ Dhavid, mɛ ɛ́ kwyikwyen di ekas tɔ mɛlem ɔ.»
17 Tin, Sisim nɛ moma ɛbá, mwaa Mɔn bhata ɛpelɛɛ: «Dha!»
Mot di egwak yɛ ɔ, baake ɛ: «Dha!»
Mot di nɛ gwyes mɛdii ɔ zyɛ.
Mot di ekwyɛl mɛdii mɛ di edjɛ tsik ɔ, nyɛ aabela yɛ yii toto!
18 Mam Zaŋ, mɛ lɛɛ ɛ́ tsɛɛtsɛ nɛ mot nɛ mot di egwak mɛkpa natelaa tɔ mɛkana mak ɛ náá: Mot ɛ bil dhiiti sonok ɔɔ, Zɛɛb ɛ́ waakɛl egum zekwyalaa tɔ mɛkana mak ɛ kɔ lɛ. 19 É di’enek, mot ɛ dis dhiiti sonok tɔ mɛkpa natelaa di kwyala tɔ mɛkana mak ɔɔ, Zɛɛb ɛ́ waadis yɛ ɛkɛɛ ɛ bhum le di edjɛ tsik ɔ, dɔɔ nɛ tɔ ghaada na dɛɛ di kwyala tɔ mɛkana mak ɛ.
20 Mot di elyaal etsɛɛtsɛ e etɛp bak ɔ, lɛɛ ɛ́: «Iyooo, mɛ moo aazyɛ!»
Amɛn! Dha, Ghɛŋ Yezu!
21 Betka náá, enɛm nɛ embɛɛ ɛ Ghɛŋ Yezu di nɛ biyɔ djas.
/images/a/Tcg2NiV7ce24OT6kCIQGR)
/images/a/qHG3xNP8jqR-HqIiucz0L)