1 Bela tin náá, Pyɛɛd nɛ Zaŋ nadi elii nɛ zukamwaa nɛ mot nadi tin ɔ. Wɔ gwaa, bɛghaa-Zɛɛb, ekukuma e bɛmbaalel ɛ kok Ndjaa-ebuwa, zɛnɔɔ bot ɛ ɛdhuu ɛ eSaduseɛ, bɔɔ zokazyɛ pɛ kyee bɛ nadi ɛ. 2 Elyem naadyeebakpaa bɛ, etɛɛ náá, bɛ nabɛ ààkwyɛl náá, Pyɛɛd nɛ Zaŋ, bot ɛ Lwoma bɛbá gheelelyo bot tɔ mɛlyo mɔɔ náá, Yezu Klisto mot nagwyɛ ɔ, nyɛ eezegom. Pyɛɛd nɛ Zaŋ nadi esa deenek ɛ́ étɛp ɛlyaal nɛ bot náá, nɛ tsɛɛtsɛ, bot ɛ zegwyɛ ɔ waagom. 3 Tin bɛ boozɛmɛt Pyɛɛd nɛ Zaŋ zɛwa bɛ é membok. Wɔ gwaa, bɛ zokazɛdjɛk bɛ tin kɛkum mɛlem, etɛɛ náá, bɛ namɛt bɛ ɛ́ bikoko. 4 Bela náá, bɛtɛ nɛ bot ɛ nagwak mɛkpa mɛ bot ɛ lwoma ɔ, ye nabɛ ɛ́, bɛ naadum koŋ nɛ mɛlyo mɔɔ. Mɛtaŋ mɛ bot ɛ tak naabilel, kum tyee bot bɛmil ɛtɛn (5 000).

5 É yak mɛlem, ekukuma eYuda, bɛpaa, zɛnɔɔ bɛghaŋ ɛ mɛkana mɛ etsi, zokazɛsɛɛga pɛ dɛl Yeluzalɛm. 6 Bot ɛ nadi tɔ zɛɛga tak ɔ nabɛ ɛ́, An boo ghaa-Zɛɛb, Kayif, Zaŋ, Alɛkzandɛlɛ zɛnɔɔ bot ɛ mɛbyel ɛ boo ghaa-Zɛɛb djas. 7 Bɛ eezɛtel Pyɛɛd nɛ Zaŋ metetel sok bhwoob’ɔɔ, tin, bɛ eezɛdji bɛ náá: «Bi sa esesɛɛ bak nɛ yak mɛbwala, nɛ din ɛ zɛ?» 8 Tin, Sisim na Dɛɛ eezelwood tɔ Pyɛɛd, nyɛ ɛ́ booke nɛ nɔɔ náá: «Ekukuma e mbyak nɛ bɛpaa ɛ eYuda, 9 bɛ dji bis mɛdjin mak mos ɛ́, étɛp enɛm esa ee bis nasa nɛ boka mot ɛ. Bɛ dji bis ɛ́ náá, mot’ak tsak dáa? 10 Ɛnyɔɛpe, ye goka ɛ́ bi gu náá, biyɔ djas, dɔɔ nɛ bot ɛ Yisalaɛl, yɛ bɛ náá, mot’ak eetyaa tetel nɛ nyel ɛnyɔɛpe é mis men ɔɔ, yɛ ɛ́ nɛ ghwyil din ɛ Yezu Klisto mot Nazalɛt, mot bi nabem é mɛlaaba, da Zɛɛb ɛ́ gomal nyɛ bhis ɛsyee ɔ. 11 Yezu, mot Ekwyala e Zɛɛb di elɛɛ tsɛɛtsɛ náá:

"Ɛkok ɛ bɛzumel mwas ɛ,

moo ɛ́ ɛkok di epyet ndjaŋ ɛ*4.11 Mɛd 118.22."

12 Tsik belaa ɛ́, nɛ din ɛ Yezu Klisto nyɛ ɛmet. Dhiiti mot Zɛɛb nadhis kɔ bɔs’ak náá, nyɛ neetsik mena ɔ, tok.»

13 Dáa bɛ nabee náá, Pyɛɛd nɛ Zaŋ nadi elii nɛ boo ɛbwaalel ɛ, bot ɛ zɛɛga boo kwan eYuda naadjoka. Bɛ naadjoka etɛɛ náá, ye bɛ ɛ́ bɛ eesiiza náá, bɛ nabɛ ɛ́ mbi vaŋ bot ɛ nadi ààtɔ́ mɛdjek ɔ. Bɛ nadi egu náá, bɛ nadi egyee ɛ́ sama wat nɛ Yezu. 14 Tin, bɛ nadi ebee mot natsak ɔ tetel é ngwoob’ɔɔ, bɛ nabɛ ɛ́ ààkabɛ nɛ ɛkpa ɛ ɛyala. 15 Bɛ eezɛke nɛ nɔɔ náá, bɛ wyis tɔ ndjaa epɛ́ɛ. Bɛ moo tin esɔs pak’ɔɔ. 16 Bɛ nadi ekeke ɛ́ náá: «Mena aasaka bot bak dáa? Etɛɛ náá, bot dɛl Yeluzalɛm djas nɛ gu popoopwon náá, bɔɔ ɛ nasa ndem mɛbwala mak, mena tok nɛ ghwyil ɛswonal. 17 Tin, yɛ ààgoka náá, menduk mɛ tɛp’ak gék tɔ mɛlɔ mɛ bot bak djas. Mena ɛ́ waalyak bɛ nɛ mɛbhɛma náá, bɛ nàbaalii nɛ bot kɔ ɛsu ɛ din ɛ Yezu.»

18 Bɛ eezɛdjóo bɛ, bhii tak bɛ eezɛlyak bɛ ɛlyelɛpe náá, bɛ nàbaalii nɛghu ɛlyo ɛ bot nɛ din ɛ Yezu. 19 Tin, Pyɛɛd nɛ Zaŋ eezɛbɔɔza nɛ nɔɔ náá: «Pɛ́ɛka biyɔ bɛmet nɛghu yɛ ɛ́ ɛnyɔɛpe é mis ɛ Zɛɛb náá, bɛ looba nɛ nen nɛghu bɛ looba nɛ Zɛɛb. 20 Yɛ kabɛ bisɔ ɔɔ, bis tok nɛ ghwyil ɛbyen ɛlii dum nɛ sa bis nabee nɛ mis nɛ ɛgwak nɛ mɛlɔ ɛ.» 21 Bot ɛ boo kwan eebaazɛbhɛm bɛ, bhii tak, bɛ eezɛbet bɛ. Bɛ nabɛ ɛ́ ààbɛ nɛ tyee bɛ aazuk bɛ, etɛɛ náá, ɛdhuu ɛ bot djas nadi eduwal Zɛɛb kɔ ɛsu ɛ etɛp ee nasael ɛ. 22 Mot natsak nɛ mɛbwala ɛ Zɛɛb ɔ nabɛ ɛ́ nɛ membu mɛkam-mɛná kɛdhaa.

23 Dáa bɛ nabet bɛ ɛ, Pyɛɛd bɛ nɛ Zaŋ eezɛtɔ́ pɛ pak ɛdhuu ɛ bɛsɔ bɔɔ nadi ɛ. Bɛ moo tin ebaŋa bɛ etɛp djas eboo bɛghaa-Zɛɛb nɛ bɛpaa ɛ eYuda nalɛɛ ɛ. 24 Bhii bɛ nazegwak etɛp binek djas ɛ, bɔɔ djas eezɛgwakel, tin, bɛ eezɛdjaala Zɛɛb náá: «Zɛɛb Mɛkaake, yɛ ɛ́ wɔy ɛ nakus gwoo nɛ bɔs, nɛ boo dii mɛsɔn zɛnɔɔ esonok djas di tɔ tak ɛ. 25 Yɛ ɛ́ wɔy ɛ di náá, nɛ ghwyil Sisim na Dɛɛ wɔ naasa náá, Dhavid bhaab’es mot-mɛsa mɔ ke náá:

"Mɛdhik ɛpekuu, yɛ ɛ́ étɛp yé?

Bot ɛ membyak ɛpedi bhoob yii toto.

26 Bɛmɛkoozi mɛ bɔs eezekomsa,

étɛp ɛkɛlumla dɛɛb,

eboo ekukuma eezesɛɛga.

Bɛ sɛɛga ɛ́, bɛ neekɛlumla dɛɛb nɛ Ghɛŋ,

nɛ mɛkoozi mɛ nyɛ nadjɛ ebotan ɔ*4.26 Mɛd 2.1-2."

27 Yɛ ɛ́ tsɛɛtsɛ náá, Eelood nɛ Pɔɔs Pilat eezesɛɛga kɔ dɛl ɛlak bɛ nɛ ekukuma e membyak mɛ sis, zɛnɔɔ bot ɛ Yisalaɛl, bɛ needi boob kɔ ɛsu ɛ Mot-mɛsa mɔ na Dɛɛ Yezu, mot wɔ nazedjɛ ebotan ɔ. 28 Tin, bɛ eesa esonok djas wɔ naloogek nɛ ɛkwosak ɛ lɔ ɛ. 29 É di’enek, Ghɛŋ, bɛɛa mis kɔ mɛbhɛma mɔɔ, tin da wɔ ɛ́ djɛ bot ɛ mɛsa mɔ ze ɛgoola mɛkpa mɔ, nɛ boo ɛbwaalel. 30 Sɛɛba mbɔ’ɔ, etɛɛ náá, bot neetsak, endem e mɛbwala neesael nɛ din ɛ Mot-mɛsa mɔ na Dɛɛ Yezu.» 31 Dáa bɛ nasilal ɛdjaala ɛ, di bɛ nasɛɛga ɔ zokazɛdheegel, wɔ gwaa, Sisim na Dɛɛ zokalwood tɔ lɔɔ. Bhii tak, bɛ eezɛni é ɛgoola Mɛkpa ɛ Zɛɛb nɛ ɛbwaalel djas.

32 Ɛdhuu ɛ bot djas nadi edum koŋ nɛ Zɛɛb ɔ, nadi ɛ́ tɔ ɛgwakel ɛnyɔɛpe tɔ elyem nɛ esisim, ye tok nɛ mot ngɔt pak’ɔɔ nadi eke náá, esa bɛ ɛ́ yii nyɛy nyɛ ɛmet. Esa ee bɛ nadi nɛ yɛ ɛ, nabɛ ɛ́ yii bɔɔ djas. 33 Yɛ ɛ́ nɛ boo mɛbwala ɛ bot ɛ lwoma nadi elɛɛ bot dáa Ghɛŋ Yezu nagom ɛ. Tin, Zɛɛb naadjɛ bɔɔ djas bɛtɛ nɛ enɛm nɛ embɛɛ bɛ. 34 Ye tok nɛ mot ngɔt pak’ɔɔ nasu sa mot di egoka nɛ ɛdi nɛ yɛ étɛp tsik’ɛ ɔ. Deenek, bot ɛ nadi nɛ epyeeb nɛghu mendjaŋ ɔ, nadi ebɔmsa yɛ, 35 bhii tak, da bɛ ɛ́ zyɛ nɛ epata ee bɛ aabela ɛ, zɛdjɛ bot ɛ lwoma. Bhii tak, bɛ kakaa epata e tak ɛ nɛ mot nɛ mot, é ɛbee egwyes e mot nɛ mot di nɛ yɛ ɛ. 36 Djhoonɔɔka geka nɛ Zozɛf, mot di Levit ɔ,*4.36 Bot ɛ di esa mɛsa tɔ kok Ndjaa-ebuwa ɔ. mot ghola Siipɛlɛ, mot bot ɛ lwoma naget din ɛ Bhaanabhas ɔ. Din ɛ tak kwyɛl ɛlɛɛ ɛ: «mot di edjɛ ghwyil nɛ mɛghaaz ɔ». 37 Nyɛ naabɔmsa pyeeb’ɛ, bhii tak nyɛ eezɛnɔɔ epata, zɛdjɛ bot ɛ lwoma.