1 ईनु वातेन पछेन अब्‌राम काजे यहोवा भगवान असु बताड़्‌यु की, "अब्‌राम, बीहे मां, मे तारु ढाळ बणीन तारी राखवाळी करीस, ने मे तुसेक बेसको मटो ईनाम आपीस।"

2 अब्‌राम जपाप आप्‌यु, "ए मालीक यहोवा, तु मेसेक काय देसी? काहाकी मारी अवल्‌यात नी हय, ने मारा घरेन वारीस ते एलीएजर रवसे जु दमीस्‌क सहर वाळु छे।" 3 अब्‌राम असु बी कह्‌यु, "तारे भीणी सी मेसेक ते अवल्‌यात बी नी देदु; तेरेमां मारा घर मां एक सेवक वारीस रवसे।"

4 तत्‌यार अब्‌राम धड़े यहोवा भगवानेन बुल अळी आयो ने कह्‌यु, "तारु वारीस जु नी हय, बाकुन तारी खुदेन अवल्‌यातेन वारीस रवसे।" 5 यहोवा भगवान अब्‌राम काजे बाहर ली ज्‌यु ने अब्‌राम सी कह्‌यु, "सरग भीणी भाळ, ने तारान गिन्‌ती लागाड़, यहोवा अब्‌राम सी कह्‌यु, असात तारा अवल्‌यात बी रवसे, जीनुक कुय बी गीण नी सके।"✝15:5 रोमीयो 4:18; ईब्‌रानीयो 11:12

6 अब्‌राम यहोवा भगवान पर भुरसु कर्‌यु, ने यहोवा भगवान ईनी वात सी तीनाक वारलु काम मां गीण्‌यु।

7 ने यहोवा भगवान अब्‌राम काजे कह्‌यु, "मे हयुत यहोवा छे, जु कसदीयान उर सहर सी बाहर नीकाळ्‌यु, काहाकी तुसेक ज देस जड़े ने तु ईना देस पर हक जमाड़े।"

8 अब्‌राम कह्‌यु, "ए मालीक यहोवा भगवान, मे कसु जाणों की तु मेसे ईना देसेक आप देसी?"

9 तेरेमां यहोवा भगवान अब्‌राम सी कह्‌यु, "तीन सालेन केवड़ी, तीन सालेन एक बुकड़ी, ने तीन सालेन एक सींगड़ा वाळु गाडरु, एक हुली ने अळी एक पेरवान पीला काजे ली आव।" 10 अब्‌राम यहोवा भगवान वाटे ज आखो ली आयु, ने तीनु आखाक काटी-काटीन दुय-दुय टुकड़ा कर्‌यु ने टुकड़ा काजे यहोवा भगवान अगळ मेल्‌यु, बाकुन हयु चिरलान टुकड़ा नी कर्‌यु। 11 ने अब्‌राम तीनु मारला जानवार काजे यहोवा भगवान अगळ मेल रहलु, ती घुवड़ा तीना मास भीणी झड़पायता आया, बाकुन अब्‌राम तीनु घुवड़ा काजे ढासाड़ देदु।

12 जत्‌यार दाहड़ु डुबणे बाजी रहलु, तत्‌यार अब्‌राम मटी नींद मां सुय ज्‌यु ने तेरे पर आंधारो छावाय ज्‌यो। 13 तत्‌यार यहोवा भगवान अब्‌राम सी कह्‌यु, "जी छाचली छे की तारा अवल्‌यात दीसरा देस मां परदेसी बणीन रवसे, जां तीनुक गुलाम बणावसे, ने तीनुक च्‌यार सोव साल लग एल्‌हा पाड़से।✝15:13 नीरगमन 1:1-14; नेवताळान काम 7:6 14 ने जीना देस मां जे गुलाम बणसे, तीनु देसेन माणसे काजे मे डंड आपीस, ने अळतेन चां सी तारा अवल्‌यात बेसको धन लीन आवसे। ✝15:14 नीरगमन 12:36; 12:40,41; नेवताळान काम 7:7 15 बाकुन तु ते तारा डाहा-बुड़ा मां जाय्‌न वारु भेसकाय जासी, ने तु ते डाहवारे लग जीवीन तारा डाहा-बुड़ा मां वारु तुसे अघे करीन गाड़ देसे। 16 बाकुन चे चवंथी पीड़ी मां पछा आवसे; काहाकी जां लग एमोरी जातीन माणसेन भुंडला कामे करनेन पुरो हवसे ने तीनुक डंड बी जड़नु चाहजे।"

17 सांतो दाहड़ु बुडीत गुयलु, तत्‌यार ने बेसको आंधारो हय ज्‌यो, तत्‌यार तीनु काटला जानवर्‌यान दुय-दुय टुकड़ान ईचमां सी कुळु उड्‌तेलो एक चुल्‌हा मां ने एक धपतेलो मसाल भगवान भेळे गुयो। 18 ने तीनेत दाहड़े यहोवा अब्‌राम सी बुली बांद्‌यु ने कह्‌यु, "मे तारा अवल्‌यात काजे मीसर नदी सी लागाड़ीन मट्‌ली नदी फरात लग आप दीस। 19 मतलब केनीया, कनीज्‌जीया, कदमोनीया, 20 हीत्‌तीया, परीज्‌जी, रापाया, 21 एमोरीया, कनानीया, गीरगास्‌यु ने यबुसीयान जागा, मे तारा अवल्‌यात काजे आप दीस।"