Apocalipse 21

Yuo fefe ghɔŋbə Chisê-fefe-kə

1 Ndʉʉmɛ, mɔ nyíɛ yuo fefe ghɔŋbə chisê-fefe-kə, bʉʼka fəŋ yuo ghɔŋbə fəŋ kəchisê nɔʼ kə mì, təmə muukwɛʼtəŋmə leʼ bɛ ghɔ fɛ. 2 Mɔ nyíɛ yəŋkwɛʼtəŋkə ndə i bɛ ŋkʉʉ, Jɛlosalɛŋ fefe, kə́ shíʼ gwè hə yuo bəshʉ-Nyii, bə nɔʼ shʉ̀tə ɔŋ ɔ bʉ̀ʉ tə bɛ nə vaabəke ndə bə nɔʼ shʉ̀tə ɔŋ ndə məgɛ̀ lɔŋ tʉ ləŋ-ɛŋ.

3 Mɔ yʉ́ gyʉʉ dədə ndə i gìe hə ndəŋ mbʉ kəyetə kə́ ghɔ̀ŋ mbɔ, "Nyíɛ! Yəŋ-chî-Nyii-kə nɔ bɛ mu bʉəməsʉʉ nduɔ. Ɔ bu kə́ chí ghɔŋ bɔŋ, bɔ̂ŋ bɛ bʉə-bi, Nyii nə mbəŋ-ɛŋ bɛ ghɔŋ bɔŋ nə Nyii-yʉə. 4 Ɔ bu yʉ̀əʼ shʉmə shʉ-bɔŋ inchəŋ, təmə kwú leʼnə bɛ ghɔ fɛ, təkɔmə məlí kwú, təmə məgwía kwú bieleʼ nə bɛ ghɔ fɛ, təkɔmə mbʉə liŋnə bieleʼ nə bɛ ghɔ fɛ, bʉʼka nduɔŋ-bənu-hə nɔʼ tíŋ."

5 Mbəŋ-ɛŋ ndə ɔ kə yétə ndəŋ mbʉ kəyetə ghɔ̀ŋ mbɔ, "Nyíɛ! Mɔ nɔ tʉʼ bʉ̀nə chìi fɔbə inchəŋ fefe." Ɔ bìʼ ghɔ̀ŋ ghɔ mbɔ, "Nyɔ̀ʼ nukə-ɔ̄ŋ sê, bʉʼka ŋgiebə-ɔ̄ŋ inchəŋ nɔ bɛ ŋgie-shʉəŋ-bə ndə bəkɔ bə tə́nə chɔ bɔŋleʼ bɛ shʉəŋ." 6 Ɔ ghɔ̀ŋ tʉ mɔ mbɔ, "I nɔʼ mì! Mɔ nɔ bɛ Fəŋ bɔŋ-kə́-leʼ bɛ Ndyiʼtəkə. Nɔ chʉ́ʉhə mɔ chʉ́ʉhə nubə inchəŋ, bɔŋleʼ lìʼ mɔ lìʼ nubə inchəŋ. Tʉ bʉə ndə tʉʉ-yʉə nɔʼ yə́ŋ, bɔ̂ŋ bu nú mu lʉ̂ʉ muu ndə ĩ kɔ́ məchímbi ndə mɔ bu kɔ́ tʉ bɔŋ təmə bɔ̂ŋ nyúɔnyúɔ fɛ. 7 Wo ndə ɔ mɔ̀ʼ chɔ̂-ɔ̄ tə yú mɔ bu kɔ́ fɔbə-ɔ̄ŋ tʉ ɔŋ inchəŋ bɔŋ-bu-leʼ bɛ Nyii-i, ɔ bɛ vaa-ɔŋ.

8 "Bɔŋ tʉ bʉə kəfaa kwú, bʉə ndə bɔ̂ŋ nɔʼ shìe liɛŋtə-ʉə ndəŋ mɔ, bʉə-mbʉəhə, bʉə yí bʉə, bəŋghaa-bəsəŋ, bʉə-bəfʉ, bʉə ndə bɔ̂ŋ tʉʼ gháa bənyii leʼnə bʉə chʉ̀ə kəlɛɛŋ bənchəŋ, yəŋkə-ʉə bu bɛ mu taanəkə ndə i tʉʼ kyʉ́ʉ nə viʼi ndə i tʉʼ kyʉ́ʉ kie yɔʼ-məkɔŋ-kə ndə bɛ biitə-kwú-kə."

Jɛlosalɛŋ fefe

9 Ndʉʉmɛ, mbyu wontəŋNyii mu bʉəntəŋNyii-bīŋ təkwiitia le ndə bɔ̂ŋ kə kie bəbaŋ gheghe kəghɔ-bɔŋ təkwiitia ndə i bɛ ilə́ŋnə nə ndyiʼtə-ŋgʉəʼ-bə təkwiitia le, gwè, kwə́ʼ tʉ mɔ ghɔ̀ŋ mbɔ, "Gwè mɔ bu dʉ̀ʼ mbʉ woke ndə ɔ tʉʼ gɛ̀ lɔŋ tʉ a, vi mbʉ Vaabinjyʉʉ."

10 LyʉʉhəNyiikə jyʉ́ʉhə mɔ, mbʉ wontəŋNyii lʉ̀ mɔ kóʼ gɛ̀ nə mɔ ndə kwɔŋ ndə i də̀ʼ daa, dʉ̀ʼ yəŋkwɛʼtəŋkə tʉ mɔ ndə i bɛ ŋkʉʉ, Jɛlosalɛŋ ndə i tʉʼ shíʼ gwè hə yuo bəshʉ-Nyii. 11 I kie məgʉə-Nyii, kə́ lèʼnə nə ŋgoʼ chuɔŋ chyʉʉchyʉʉ ndə bə tíi nə jasaba, kə́ bɛ nə ŋgoʼ kəmbuu lúhə ndə i tʉʼ lèʼnə nə bəgalashi. 12 I kie sɔʼ-lɔ̂ŋkwɛʼtəŋ-kə ndə i gʉ́ə daa bɔŋleʼ də̀ʼ nə chutə chɔ njuɔ bûu nə wuŋ, bʉəntəŋNyii njuɔ bûu nə wuŋ kə́ tə́ŋtə ndə mbʉ təchulɔŋ, bə nyɔ̀ʼtə yie bʉə-bəlɔŋ-Isilɛ njuɔ bûu nə wuŋ chɔ. 13 Chu-lɔ̂ŋ-tə nɔ kə bɛ kwii ndə chichi sɔ́ʼ chɔ itia, kə́ bɛ byûukwe itia, kə́ bɛ byûumbɔŋ itia leʼ kə́ bɛ kwii ndə chichi sʉ́ʉ chɔ chusii-ɔ itia. 14 Lɔ̂ŋ ndə i kə yə̀ŋhə mbʉ kəyəŋkwɛʼtəŋ fúu nɔ kə kie ŋgoʼ-yiesê-hə njuɔ bûu nə wuŋ, bə nyɔ̀ʼ yie mbʉ bəlɔntəŋNyii mbʉ Vaabinjyʉʉ njuɔ bûu nə wuŋ ndəŋ ghɔ.

15 Mbʉ wontəŋNyii ndə ɔ kə kwə́ʼ tʉ mɔ, kie tyʉkə kəghɔ-ɔ ndə bə chìi nə goo ndə məfʉ̀ʼ mbʉ kəyəŋkwɛʼtəŋ nə yɔŋ ghɔŋbə chutə-i leʼnə mbʉ lɔŋ ndə i yə̀ŋhə fúu. 16 Sɔʼ-mbʉ-lɔ̂ŋ-bə nɔ kə bɛ ndyʉndyʉ, mədəʼ-ɛ ghɔŋbə buuŋ-iŋ kə́ bɛ ndyʉndyʉ. Ɔ fʉ̀ʼ mbʉ kəyəŋkwɛʼtəŋ nə tyʉkə-i, i bɛ bəghǔu mbyu mɛlɛyɔŋ nə bəghǔu ghyʉʉ ŋkɔŋ nə ŋkɔŋ-bəghǔu-hə wuŋ.*21:16 Kəŋgie Gili yɔ̄ŋ-yə nɔ bɛ bəsatadia 12,000. Satadia nɔ bɛ fʉʼ mədə̀ʼ. Məsúu ntyʉʉ 12,000 bəkɔ i tə́nə ndə bʉə-Nyii ghɔŋbə mətə́nə-ndyʉndyʉ-yʉə gɛ̀ kùu. Mədəʼ-ɛ, buuŋ-iŋ leʼnə tyʉ-i kə́ bɛ ndyʉndyʉ. 17 Ɔ leʼ lʉ̀ fʉʼ mbʉ kəsɔʼ lɔŋ haʼ ndə woməsʉʉ lʉ̀ fʉ̀ʼ kəfɔ le. Fyʉʼkə-i kə́ bɛ bəghǔu njuɔ bûu nə wuŋ tia nə saafyii,*21:17 Kəŋgie Gili yɔ̄ŋ-yə nɔ bɛ bəkubi 144. Bəkɔ ntyʉʉ-ɔ̄ bɛ fʉʼkənu. ndə i bɛ haʼ ntɛ fʉʼ ndə mbʉ wontəŋNyii lʉ̀ ghɔ.

18 Bə bɔ́ŋ mbʉ bəsɔʼɔ lɔŋ nə ŋgoʼ kəmbuu lúhə ndə bə tíi nə jasaba, bɔ́ŋ mbʉ mu kəyəŋkwɛʼtəŋ nə ŋkɛŋ goo ndə i kə́ lèʼnə nə galashi. 19 Bə bɔ́ŋ yiesê mbʉ bəsɔʼɔ lɔŋ shʉ̀tə nə ŋgoʼ-chuɔŋ-chyʉʉchyʉʉ-hə ntɛntɛhə, fəŋ bùu gɛ̀ lúhə nə yuo bə kə́ tíi nə jasaba, yi ndə i tyúnə bɔ̌ŋ fəŋ kə́ bɛ lúhə nə yuo bə kə́ tíi nə safia, yi ndə i tyúnə bɔ̌ŋ fəŋ vɛʼ bûu lúhə nə ŋkɔ bə kə́ tíi nə age, yi ndə i tyúnə bɔ̌ŋ fəŋ vɛʼ tia lúhə nə ŋkɔ bə kə́ tíi nə ɛmɛla, 20 yi ndə i tyúnə bɔ̌ŋ fəŋ vɛʼ kwi bùu gɛ̀ nə chɔʼkə nə laa-kəfyuʼ-tə chɔ, bə kə tíi nə oni, yi ndə i tyúnə bɔ̌ŋ fəŋ vɛʼ taa kə́ bɛ kəmbuu bə kə́ tíi nə kanilia, yi ndə i tyúnə bɔ̌ŋ fəŋ vɛʼ ntʉʼʉ bɛ kəmbuu fyûʼ bə kə́ tíi nə kilisole, yi ndə i tyúnə bɔ̌ŋ fəŋ vɛʼ təkwiitia kə́ bɛ lúhə nə ŋkɔ bə kə́ tíi nə bɛli, yi ndə i tyúnə bɔ̌ŋ fəŋ vɛʼ fɔ̂ŋ kə́ bɛ kəmbuu fyûʼ, bə kə́ tíi nə toba, yi ndə i tyúnə bɔ̌ŋ fəŋ vɛʼ bɔmɔʼ kə́ bɛ lúhə nə ŋkɔ, bə kə́ tíi nə kilisoba, yi ndə i tyúnə bɔ̌ŋ fəŋ vɛʼ wuŋ kə́ bɛ luhə nə yuo, bə kə́ tíi nə jasiŋ, yi ndə i tyúnə bɔ̌ŋ fəŋ vɛʼ njuɔ mɔʼ nə wuŋ bùu mbuu-fʉ́əŋ-kə bə kə́ tíi nə emɛti.

21 Bə bɔ́ŋ mbʉ təchulɔŋ njuɔ bûu nə wuŋ nə ŋgoʼhə njuɔ bûu nə wuŋ bə kə́ tíi nə bee, bə kə́ bɔ́ŋ mbyu chulɔŋ nə mbyu ŋgoʼ imɔʼ, fiatə mbʉ mu kəyəŋkwɛʼtəŋ bə bɔ́ŋ nə ŋkɛŋ goo, isúunə bɛ nə galashi.

22 Təmə mɔ nyíɛ njaafɛ̀ʼndɛŋNyii mu mbʉ kəyəŋkwɛʼtəŋ fɛ, bʉʼka nɔ bɛ mbʉ Nyii Tiekətʉ, ndə ɔ kie ghʉəʼkə inchəŋ, ghɔŋ mbʉ Vaabinjyʉʉ, bɛ njaafɛ̀ʼndɛŋNyii ndə i bɛ chɔ. 23 Təmə mbʉ kəyəŋkwɛʼtəŋ kie ndə məkie chichi byuunɔ chisuu ndə mə-kə́-báa chɔ fɛ, bʉʼka məŋwɔʼ Nyii nɔ bu kə́ chìi mu-i kə́ báa, kɛʼɛ-ɛ kə́ bɛ mbʉ Vaabinjyʉʉ. 24 Lɔʼ-bətə̂ŋ-tə mu kəwʉʉnəmbi bu kə́ tòʼ mu kɛʼɛ-ɛ, bəfɔŋ kəchisê gwè nə məgʉə-yʉə muŋgɔ. 25 Bə kʉʉ nə fúu chu-lɔ̂ŋ-tə-i ndʉʉnəchî fɛ, təmə ndʉʉbətyuʼ bɔŋ-kʉʉnə-leʼ bɛ chɔ fɛ. 26 Lɔʼ-bətə̂ŋ-tə bu gwè nə mbʉətə-bəfɔ-hə inchəŋ chɔ ghɔŋbə nchuɔ bʉəməsʉʉ mu kəyəŋkwɛʼtəŋ-ghɔ̄. 27 Bɔŋ təmə fɔ-nyàatə-kə kʉ̂ʉ nə sʉ́ʉ chɔ fɛ təkɔmə wo ndə ɔ tʉʼ chìi nu-kətʉvyiinə-bə byuunɔ kə́ chʉ̀ə lɛɛŋkə bɔŋ bu bɛ haʼ bʉə ndə yietə-ʉə bɛ mu ŋwɔʼnə məchímbi mbʉ Vaabinjyʉʉ.