1 Ndʉʉmɛ, wontəŋNyii ndə ɔ tyúnə bɔ̌ŋ fəŋ vɛʼ kwi, tʉ́ʉ yi-yə gyʉəʼə, mɔ nyíɛ lɔʼ ndə i shíʼ hə yuo gwù kəchisê, bə kɔ́ nchoʼ tʉ ɔŋ ndə məchóʼ chu mbʉ byʉʉ ndə i gòʼ təmə kie liʼ-i fɛ. 2 Ɔ chóʼ mbʉ chu byʉʉ ndə i gòʼ təmə kie liʼ-i fɛ le, ndyʉʼkə kə́ tə́ŋtə fyú muŋgɔ nə ndyʉʼkə fyú hə mu kyʉʉ juhə le, njəŋkə gwù ndəŋ chichi ghɔŋbə yuo bʉʼka ndyʉʼkə ndə i kə́ fyú hə mu mbʉ byʉʉ.

3 Ndʉʉmɛ, ŋgwehə fyú hə mu mbʉ kəndyʉʼ gwè kəchisê, bə kɔ́ ghʉəʼkə tʉ bɔŋ i bɛ nə yi-bəŋɔŋ-yə kəchisê. 4 Bə shyíi bɔŋ mbɔ b̈ɔ̂ŋ mə lə́ŋhə ŋkɔ kəchisê fɛ, byuunɔ fɔ-nchʉnchʉ-kə təmiyɔŋ ndə i tʉʼ kóʼ byuunɔ tyʉbə fɛ, bɔŋ mbɔ bɔ̂ŋ lə́ŋhə haʼ bʉə ndə cheʼ-Nyii-kə gòʼ təmə bɛ chutəyi-bɔŋ fɛ. 5 Bə mɛ̀ʼtə mbɔ b̈ɔ̂ŋ chɔ́ŋhə bɔŋ ndə bəchi itaa, təmə bɔŋ yítə bɔŋ fɛ, ntɛ məlíŋ ndə i kə gwè hə ndəŋ məchɔ́ŋhə ndə bɔ̂ŋ kə́ chɔ́ŋhə bɔŋ i nɔ kə bɛ nə mənyɔ ŋɔŋ chɔ́ŋhə wo ndʉʉ ndə ɔ lə́ŋ ɔŋ le. 6 Mu bəchi-ghɔ̄bə itaa, bɔ̂ŋ bu gwía kwú, kəŋkaa mbɔ b̈ɔ̂ŋ kwú. Bɔ̂ŋ kə́ kʉ́ʉ ndə məkwú, kwú bɔŋ bu nyʉ́ʉ mbʉə bɔŋ.

7 Mbʉ ŋgwehə nɔ kə bɛ nə bənyaa bəkatə ndə bə kə́ shʉ̀tə bɔŋ ndə məgɛ̀ nə bɔŋ chɔ̂. Fɔbɛʼkə kə́ bɛ kətʉ-bɔŋ nə bɛnə ndə bə chìi nə goo, mbe-shʉ-hə-ʉə kə́ bɛ nə mbe-shʉ-bʉəməsʉʉ-hə. 8 Nyu-kətʉ-hə-ʉə kə́ bɛ nə nyu-kətʉ-bəke-hə, gyʉəʼtə-ʉə kə́ bɛ nə gyʉəʼ-bʉʼ-tə. 9 Fɔ-chɔ̂-bə ndə bɔ̂ŋ kə kie ndə məkyʉ̀hə fyiihə-ʉə chɔ, nɔ nə bɛ nə yi-kətəŋ-yə, ghɔnətə-ʉə kə́ dùŋtə nə bəmatu kɔŋnə buŋmbi ndə bənyaa bəkatə tʉʼ dùu lə̀ŋnə gɛ̀ chɔ̂. 10 Bɔ̂ŋ kie suubə, kə́ lə́ŋ wo nə bəŋɔŋ. Ghʉəʼkə-ʉə ndə bɔ̂ŋ kə kie ndə mələ́ŋhə bʉə ndə bəchi itaa nɔ kə bɛ ndəŋ suubə-ʉə. 11 Bɔ̂ŋ nɔ kə kie fɔŋ ndə ɔ kə́ sɔ́ʼ, kə́ bɛ wontəŋ bʉəbʉə ndə ɔ kie mbʉ byʉʉ ndə liʼ-i gòʼ təmə bɛ ghɔ fɛ. Yie-e kəŋgie-Hibulu nɔ bɛ Abadɔŋ kəŋgie-Gili kə́ bɛ Aboliɔŋ, ndə i bɛ mbɔ mbʉ mbʉəhə.

12 Fəŋ ŋgʉəʼ shʉ́əshʉ́ə nɔʼ tíŋ, nyíɛ, yɔ̄ŋ-yə kʉ̂ʉ tíŋ nɔ, bəbɛʼbə ŋgʉəʼ shʉ́əshʉ́ə ibûu kə́ bíe bɔ̌ŋ gwè.

13 Ndʉʉmɛ, wontəŋNyii ndə ɔ tyúnə bɔ̌ŋ fəŋ vɛʼ taa tʉ́ʉ yi-yə gyʉəʼə, mɔ yʉ́ gyʉʉ ndə i gìe hə mu ndʉʉhə kwi ndə i tə́ŋtə ndəŋ yəŋ-fɛ̀ʼndɛŋNyii-kə ndə bə bɔ́ŋ nə goo bəshʉ-Nyii. 14 Mbʉ gyʉʉ kə́ gìe tʉ mbʉ WontəŋNyii ndə ɔ tə́nə bɔ̌ŋ ndə yəŋbə ntʉʼʉ kie gyʉəʼə le mbɔ, "Yɔ̀ʼtə ghyʉʉtə ndəŋ bʉəntəŋNyii kwi ndə bə kɔ́ʼtə bɔŋ chɔ mbʉə ŋgwɛŋkwɛʼtəŋ Yufelete." 15 Ndʉʉmɛ, mbʉ bʉəntəŋNyii kwi, ndə bə nɔʼ kə shʉ̀tə bɔŋ ndə mbʉ ndʉʉ-ghɔ̄, ndə mbʉ kəchi-ghɔ̄, ndə mbʉ chî-ghɔ̄ leʼnə mbʉ ŋgʉʼʉmbi-ghɔ̄, bə yɔ̀ʼtə ghyʉʉtə ndəŋ bɔŋ, ndə məyí via-bʉəməsʉʉ-kə imɔʼ ndə viabə itia ndə bə nɔʼ gyʉ̀əhə bɔŋ chɔ. 16 Ntyʉʉ bəsɔge ndə bɔ̂ŋ bɛ ndəŋ bənyaa bəkatə ndə məgɛ̀ mbʉ chɔ̂, nɔ kə bɛ bəmɛlɛyɔŋ təghyʉʉ təbuu. Mɔ nɔ kə yʉ́ ntyʉʉ yʉə.

17 Nɔ kə bɛ ntɛ nɔ ndə mɔ kə nyíɛ mbʉ bənyaa bəkatə mu njəŋ-mɔ təmə mɔ kə́ bɛ́ŋbɛ́ŋ fɛ ghɔŋbə bʉə ndə bɔ̂ŋ kə bɛ ndəŋ bɔŋ. Bɔ̂ŋ mɔ̀ʼ fɔ-chɔ̂-bə ndə i kə́ kyʉ̀hə fyiihə-ʉə, i kə́ bɛ kəmbuu nə viʼi leʼ lúhə bɔŋleʼ bùu gɛ̀ kəfyuʼ. Tʉ-mbʉ-bənyaa-bəkatə-bə kə́ bɛ nə tʉ-bʉʼ-bə, viʼi ghɔŋbə ndyʉʼkə leʼnə yɔʼ-məkɔŋ-kə kə́ fyú hə chu-bɔŋ. 18 Bʉʼka nu-bʉəbʉə-bə-ɔ̄ŋ itia, ndə bɛ viʼi leʼnə ndyʉʼkə leʼnə yɔʼ-məkɔŋ-kə ndə i kə́ fyú chu-bɔŋ, yítə via-bʉəməsʉʉ-kə imɔʼ ndə kaʼ bə gyʉ̀əhə bɔ̂ŋ ndəŋ yəŋbə itia. 19 Bʉʼka ghʉəʼ-mbʉ-bənyaa-bəkatə-bə nɔ kə bɛ mu chu-bɔŋ leʼnə suubə-ʉə, bʉʼka suubə-ʉə nɔ kə bɛ nə yɔhə ndə bɔ̂ŋ kie tʉbə, bɔ̂ŋ kə́ lə́ŋhə bʉə nə yɔŋ.

20 Bəʼ-bʉəməsʉʉ-kə, ndə bɔ̂ŋ kə gòʼ təmə kwútə bʉʼka nu-bʉəbʉə-bə-ɔ̄ŋ, kə buŋ shìe liɛŋtə-ʉə ndəŋ fɔʼtə ndə bɔ̂ŋ kə́ fɔ̀ʼ nə ghɔkə-ʉə fɛ. Bɔ̂ŋ kə mɛ̀ʼtə ndə mələ̀ʼtə lyʉʉhəbʉəbʉəbə ghɔŋbə bənyii ndə bə chìi nə goo leʼnə siliba leʼnə təŋ-kəmbuu-kə, leʼnə ŋgoʼhə ghɔŋbə tyʉbə ndə bɔ̂ŋ mə nyíɛ yəŋkə, yʉ́ nukə byuunɔ tòʼ fɛ. 21 Bɔ̂ŋ kə leʼ shìe liɛŋtə-ʉə ndə məyítə bʉə byuunɔ mə fʉ́ʉ fê byuunɔ mə gháa bəsəŋ byuunɔ lʉʼbə fɛ.