Mateus 26

Uhesi wa kumkopola Yesu

1 Yesu loyasindile kulonga ago geng’ha, kawalonjela walanguswa wa heye, 2 "Mvizela kota mazuwa meli galinguya kowa na mnvina ya Pasaka, na Mwana wa munhu kolavigwa leka yawambigwe."

3 Mhela awo watambika wakulu na wasekulu wa wanhu nawating’hana kuli chipepela cha Kayafa, mtambika mkulu. 4 Nawalongasa vyowomibata Yesu kwa chinyele hamba wamkopole. 5 Ila walonga, "Mbuli ayo ileche kukoleka mhela wa mnvina ya Pasaka, kuleche kulawila kilewa na kibagula hali wanhu."

Yesu kangubakalizwa unhunyhililo Betaniya

6 Yesu loyali Betaniya, hakaye kwa Simoni, yawele na uswema, 7 mdala yumwe yawele na ibuli liwele na unhunyhililo wa sendi nyinji, nakamuyila hala mchisaga hoyekale kulya chilyo, nakamjidila awo unhunyhililo kumutwi. 8 Walanguswa wa heye lowawene ago nawazudila walonga, "Ya choni kuwifya aku?" 9 Unhunyhililo awu wahaguzigwe kwa sendi nyinji na wahapegwe wazunwa.

10 Yesu nakagazela majesa gawo, kawalonjela, "Ndaze lekachoni mwangumgaza ayu mdala? Heye kanditila mbuli inojile. 11 Wazunwa mwanawo mazuwa geng’ha, ila heni siwa na hemwe mazuwa gose. 12 Ayu mdala loyali yonjidila unhunyhililo nayali yombika goya kwa kutiligwa kwa heni mchilaga. 13 Ndanguwalonjelani ndikomya, koneche kweng’ha muisi Mbuli Inojile yodamligwa, chinhu chino choyaditile ayu mdala chodamligwa kwa kumkumbuchila heye."

Yuda Isikalioti kangumbelenhuka Yesu

14 Hamba, Yudasi Isikalioti, yumwe wa wala kumi na weli, nakaluta kwa watambika wakulu, 15 nakawalonjela, "Momha choni wone ndimlavye Yesu kwa hemwe?" Nawamuwazila migwala makumi gadatu ga sendi, 16 baho Yudasi nayali yopala ndaze vyoyombelenhuka Yesu.

Yesu kangulya ndiya ya Pasaka

17 Zuwa lya mwaluko lya mnvina ya mibumunda johajiwichigwe usaso, walanguswa nawamlutila Yesu wamuuza, "Kwangugana kohi tukuwichile goya ndiya ya Pasaka?" 18 Heye nakawedichila, "Luteni kuli muji kwa munhu yumwe, mumlonjele, ‘Mlangusa kangulonga, mhela wa heni ufika, kwa hegwe ndolya Pasaka hamwe na walanguswa wa heni.’ " 19 Walanguswa wadita kota Yesu vyoyawalajize, nawawika goya ndiya ya Pasaka.

20 Lokuwele matinazo, Yesu kekalisa mchisaga hamwe na walanguswa wa heye kumi na weli. 21 Lowali wolya, Yesu kalonga, "Ndanguwalonjelani ndikomya, yumwe wa hemwe kombelenhuka heni." 22 Walanguswa nawesinza ng’hatu, waluka kiuza yumweyumwe, "Mkulu, ndaze nda heni?" 23 Yesu kedichila, "Heye yodiliza ibumunda hamwe na heni kuli chisaye ndo heye yombelenhuka. Kulya hamwe nayali ndo ulajilo wa kigana. 24 Ena, Ndangukomya Mwana wa munhu kobagama kota Maandiko Matakatifu vyogawele longa mbuli ya heye, ila mane yuye munhu ayo yalingumgalamka Mwana wa munhu! Nayahawele goya munhu ayo wone nahaleleche."

25 Yudasi, ndo yula yaganile kumbelenhuka, kamuuza, "Mlangusa, ndaze nda heni?" Yesu kamwidichila, "Ena hegwe kulonga."

Ndiya ya Mkulu

26 Nalowali wolya, Yesu kahola ibumunda, kamtogola Nguluwi, kaumogola, kawagawila walanguswa yolonga, "Mhole mulye, alu ndo lukuli lwa heni." 27 Hamba kahola chizombe, katambichiza, kawapa yolonga, "Munwe weng’ha, 28 mina ayi ndo danda ya heni ilingweneza ilagano lya Nguluwi na wanhu wa heye, danda ilingubohoka kwa chiwalo cha wanhu weng’ha kuwosela gehile ga hewo.