Marcos 6

Yesu wudikila mafunda matanu ma babakala

30 Zintumwa zikutakana ku Yesu na zimuyadila mimvimba mi bahidika, mpe mi balonga. 31 Yesu wubateela ti: «Yizeeno ha luhengo ha kibuka ki yeto hiika na humeeno mwa ndambu.» Mu dyambu ti bantu bedi kwendanga na vutukanga, mpe baba nakani ntangu ye dya ko. 32 Bakota mu mulungu, bayenda ha luhengo ha kibuka kiyawu hiika. 33 Kansi bantu babingi babayena bu bedi kwenda, mpe babakula kibuka ki bedi kwenda. Buna bafuma mu zimbanza zimvimba zi kizunga bayiza mu ntiinu na batula mu malu ha kibuka bekyokyo, tekila Yesu na milongoki myandi batula.

34 Bu katotoka mu mulungu, Yesu wuyena mpumbu yi bantu yiyinene na wubafwila nkenda, mu dyambu ti baba bonso mameme malembolo ba na mumvungi. Mboki, wubalonga misamu mimingi. 35 Ntangu bu yikibeela kukula, milongoki myandi mifinama ha kabeela na mimuteela ti: «Bwisi bweka kukula, mboki kibuka kitudi kii na kima ko. 36 Vutula bantu bamvimba mwanki benda mu mabwala maa bela-bela na mwa zinzo zi mimvungi, basumba bye dya.» 37 Yesu wubavutudila ti: «Bahaaneeno yebende bindya!» Kansi bamuteela ti: «Tusumba mampa ma nkama nzole zi mbongo zi bisengo na tubahaana badya e?» 38 Yesu wubateela ti: «Mampa makwa ma neeno e? Yendeeno lutala» Bayenda tala na bavutula ti: «Tuu na mampa matanu na mbizi zole.» 39 Buna, Yesu wubatuma mu bazakisa bamvimba ha yulu bititi bimamba mu kabu-kabu . 40 Bantu bazakala mu makabu ma bantu nkama (100) mpe makabu ma bantu makumatanu (50). 41 Wubonga mampa ma matanu na mbizi za zizole, wusendola meso ku yulu ni kasakumuna byo. Mboki wubukuna mampa ni kahaana mo ku milongoki mwanki bakabula ku mpumbu yi bantu. Wukabula mpe mbizi za zizole ku yawu bamvimba. 42 Bamvimba badya na bayukuta. 43 Batota mikuta kumi na myole mifuluka mu bibuku bi mampa na mbizi zisadila. 44 Yobobo badya, baba mafunda matanu ma babakala (5000).