ጾሳ ሙራይ ሀራ አሳቱዋ ቦላ
(13:1—23:18)
1 አሞጻ ናኣ ኢስያሳ ዉ ጾሳይ ባብሎነዋ ቆንጭስና በኤዳዌ ሀዋ።13:1—14:23 ኢሳ. 47:1-15፤ ኤር. 50:1—51:64
2 መላ ደርያ ቦላ ባንድራ ኤስተ፤ ህንተ ቃላ ቁ ኦደ፥ ኡንቱንቶ ዋስተ፤ ኡንቱንቱ ካፓቱዋ ፐንግያና ገላና ማላ፥ ዉትተ። 3 ታን ሀንቀቴዳዋንታ ሙራና ማላ፥ ታ ጌሻቱዋ አዛዛድ፤ ታን ጾንያዋን ናሸትያ ታ ዎልቃማ ቶራንቻቱዋካ ጼሳድ።
4 ጮራ አሳይ ጫቦትያዋዳን፥ ደርያ ሁጲያን ጫቦትያ ዋላሳ ስስተ! ቃይ ካዉተቱ እትፐ ሺቂደ ሻቢረትያ ዋላሳ ስስተ! ኡባፐ ዎልቃማ መና ጎዳይ ቶራንቻቱዋ ኦላዉ ሳልፕሴ። 5 መና ጎዳይነ እ ባረ ሀንቁዋ ፖልሳናዉ ጎኤትያ ሚሻቱ ቢታ ኡባ ይሳናዉ፥ ሃኮ ጋድያፐ፥ ሳሎቱዋ ጋጻፐ ዪኖ።
6 መና ጎዳ ጋላሳይ ማቴዳ ድራዉ ዬክተ! ሄ ጋላሳይ ኡባፐ ዎልቃማ ጾሳ ማታፐ ባሻዳን ያና።13:6 ኢዩ. 1:15 7 ሄዋ ድራዉ፥ ኩሽያ ኡባይ ህልስ ጋና፤ አሳ ኡባ ዎዛናይካ ሲላና። 8 ኡንቱንቱ ዳጋማና፤ ኦይይነ ዬላይ ኡንቱንታ ኦይቃና። የሉ ኦይቄዳ ምሽራቲዳን፥ ኡንቱንቱ ኦይቀታና። ኡንቱንቱ ዳጋሚደ፥ እቱ እቱዋ ጼላና፤ ኡንቱንቱ ሶምኢካ ዳጋማን ቦጻና። 9 በእተ፤ መቀ ኢሲደ፥ ይሉዋንነ ሱሎ ሀንቁዋን ጋድያ መላ ከሳናዉነ አን ደእያ ናጋራንቻቱዋ ይሳናዉ፥ መና ጎዳ ጋላሳይ ዬ። 10 ሳሉዋ ጾልንተቱነ ጾልንተቱዋ ጭታቱ ባረንቱ ፖኡዋ እመናን እጻና፤ አዋ አይፊ ዶሊደ ማና፤ አግናይካ ፖኤናን አጋና።13:10 ህዝ. 32:7፤ ማቶሳ 24:29፤ ማር. 13:24-25፤ ሉቃሳ 21:25፤ ሳፃ 6:12-13
11 ጾሳይ ሀዋዳን ያጌ፥ "ታን ሀ ሳኣ አ ኢታተ ድራዉ፥ ኢታቱዋካ ኡንቱንቱ ናጋራ ድራዉ ሙራና። ታን ኦቶራንቻቶ ኦቶሩዋ ድጋና፤ መቀ ኢታቱዋ ኦቶሩዋካ ካዉሻና። 12 አቴዳ አሳይ አልኦ ዎርቃፐ አደ አልአና፤ ኦፊራ ዎርቃፐካ አደ አልአና። 13 ሄዋ ድራዉ፥ ኡባፐ ዎልቃማ መና ጎዳ ሀንቁዋን፥ አ ሀንቁዋ ሱሉዋ ጋላስ ታን ሳሎቱዋ ኮኮርሳና፤ ሳአይካ ባረ ደኢያሳፐ ካጻና" ያጌ።
14 ሻንካፐ ባቃትያ ጋራዳን፥ ዎይ ሄምያ አሳይ ባይና ዶርሳ ዉድያዳን፥ አሳይ ኡባይ ባረ አሳኮ አሳኮ ስማና፤ ኡባይካ ባረ ቢታ ባቃታና። 15 ቤቴዳዌ ኦንነ ጫደታና፤ ኦይቀቴዳዌ ኦንነ ማሻን ሀይቃና። 16 ኡንቱንቱ ጉ ናናይ ኡንቱንቱ ስንን ቡሳከታና፤ ኡንቱንቱ ጎለቱካ ቦንቀታናዋ፤ ኡንቱንቱ ማጫ አሳቱዋናካ ዎልቃን ሀራ አቱማ አሳቱ ጋከታና።
17 በእተ፥ ብራ ኮየና፥ ዎርቃንካ ናሸተና ሜዶና ጋድያ አሳቱዋ ታን ኡንቱንቱ ቦላን ደንና። 18 ኡንቱንቱ ዎንዳፈቱ ዎዳላቱዋ ዎኖ፤ ጉ ናናቱዋካ የድ ማርክኖ፤ ኡንቱንቱ አይፊ ፑርጋእያ ናናቶካ ቃረተና። 19 ካዉተቶ ቦንቹዋ፥ ቃይ ባብሎነ አሳዉካ አሌቆነ አዉ ግዴዳ ባብሎነ ጋድያ ጾሳይ ሶዶማዳንነ ጋሞራዳን አ የጋና።13:19 ዶመ 19:24 20 ሄ ጋድያን ሙለካ አሳይ ኡተና፤ ዎይ የለታፐ የለታ ጋካናዉካ ያን አሳይ ደኤና፤ አራባ አሳይካ ያን ባረ ዱንካንያ ቶለና፤ ዶርሳ ዉድያ ሄምያዋንቱካ ያን ባረንቱ ዉድያ አላጽሲኖ። 21 ሽን ያን ባዙዋ ዶአቱ አላጻና። ዎራካናቱ ኡንቱንቱ ጎልያ ኩማና፤ ጉታቱ ሄዋን ደአና፤ ባዙዋ ዴሻቱ ሄዋን ጉፓና።13:21 ኢሳ. 34:14፤ ሶፎ. 2:14፤ ሳፃ 18:2 22 ኡንቱንቱ ጎለቱዋን ባባርቂ ዋሳና፤ ኡንቱንቱ ቦንቾ ካትያ ጎለቱዋንካ ዎራካናይ ቦጫና። አ ዎዲ ማታቴዳ፤ ጋላሳይካ ጋምኤና።