ጽሎተን አይስያ ካትያ
1 በእተ፥ ካቲ ጽሎተን ካተታና፤ ሞድያዋንቱካ ሱረተን ሞዳና። 2 አሳይ ሁጲያን ሁጲያን ጫርኩዋፐ ጌምያ ሳ፥ ጎትያፐ ባቃትያ ሳ ግዳናዋ፤ መላ ሳኣን ጎግያ ሃነ ዞዘትያ ጋድያን ደእያ ዎልቃማ ዛላ ኩዋ ማላ ግዳናዋ። 3 ጼልያ አሳቱ አይፊ ጪልመና፤ ስስያዋንቱ ሀይይካ ሀይዛና። 4 ታፍታፍያ አሳቱዋ ዎዛናይ ኤራናነ አኬካና። ዴዶትያ አሳቱዋ እንጻርሳይካ ሱረ ጌሺደ ሃሳያና። 5 ሀዋፐ ስንናዉ ኤይ ቦንቾ አሳ ጌተተና። ኢታ አሳይ ቦንቼተና። 6 አያዉ ጎፐ፥ ቦዛይ ቦዛተ ሃሳየ፤ አ ዎዛናይካ ናጋራ ኦናዉ፥ መና ጎዳ ቦላ ጻላባ ሃሳያናዉ፥ ኮሻቴዳዋንታ ካልሰናን አጋናዉነ ሳመቴዳዋንታ ኡሸናን ድጋናዉ፥ ኢታባ ማቀቴ። 7 ኡዘትያዋ ኡዚ ኢታ፤ መቶታንቻይ ሱረባ ሃሳዪደ፥ ዎርዱዋን ህዬሳ ይሳናዉ እ ኢታ ቆፋ ቆፔ። 8 ሎኦ ኡራይ ሎኦባ ሀልቼ፤ ሄ ሎኦ ሀልቹዋን ምኒደ ደኤ።
ፕርዳነ በትያፐ ስምያዋ
9 ህንተኖ ቆፋይ ባይናን ደእያ ማጫዋንቶ፥ ደንድተ፤ ታ ኦድያዋ ስስተ፤ ህንተኖ አማነቲደ ኡቴዳ ማጫ ናቶ፥ ታን ህንተንቶ ኦድያዋ ስስተ። 10 እት ላይፐ ጉ አሽን፥ ህንተ አማነቲደ ኡቴዳዋንቱ ኮኮራና፤ ዎይንያ አ ዎድያን ጹንቂያዌ አታና። ቶኬዳዋፐ ህንተ አይፍያ ሺሻና ዎዲካ ዬና። 11 ህንተኖ እሻሉዋን ደእያ ማጫዋንቶ፥ ኮኮርተ። ህንተኖ አማነቲደ ኡቴዳ ማጫ ናቶ፥ ጋጅ ጋጅተ። ህንተ ማዩዋ ቃርተ፤ ካዩዋ አፍላ ህንተ ጼሳን ዳንጭተ። 12 ሎእያ ሾይቃይነ አይፍያ ዶርጾጼዳ ዎይኒ ዬዳ ድራዉ፥ ካዮቲደ፥ ህንተ ትራ ባቂተ። 13 አጉን ቡራይነ ክንድቹ ታ አሳ ጋደን ሞኬዳ። አሳይ ናሸቲደ ደኤዳ ጎለቱዋስነ ናሸቻን ደኤዳ ሀ ካታማዉ ዬክተ። 14 ሚጻይ አታና፤ ዳሮ አሳይ ደእያ ካታማቱካ ኦናና፤ ጌሱነ ዎችያ ግምበቱ መናዉ መላ ግዳናዋ፤ ኡንቱንቱ ዎራ ሀረቱ ናሸትያሳነ ዶርሳ ዉዲ ሀመትያሳ ግዳናዋ። 15 ሄዌነ፥ ቦላ ቃፐ ኑ ቦላ አያናይ ጉካና ጋካናሳ፥ መላ ባዙ አራዳና ጋካናሳነ አራዳ ቢታይካ ዎራ ግዴዳ ጌተቲደ ቆፈታና ጋካናሳ።
16 ሄዋፐ ጉይያን፥ ሱረ ፕርዳይ መላ ባዙዋን፥ ጽሎተይካ አራዳ ጋድያን ደአና። 17 ጽሎተ ኦሱ ሳሮተ ግዳናዋ፤ ጽሎተ አይፊካ መናዉ ዎፓተነ አማነቲደ ደእያዋ ግዳናዋ። 18 ታ አሳይ ሳሮተይ ደእያ ሳኣን፥ ናገትያ ጎልያንነ ዎፑ ጌዳ ሸምፖ ሳአቱዋን ደአና። 19 ሻቻን ዎራይ ዲፖፐነ፥ ቃይ ካታማይ ኡባና ኮለቶፐነ፥ 20 ሄ ሃ ኡባ ማታን ህንተ ካ ዘሪደ፥ ህንተ መህያካ ህንተ ሀረቱዋካ ሄንዉ ብል የዲደ፥ ህንተ ሎይ አንጀታና።