ካቲ ህዝቂያስ ሀርጊደ ፓጼዳ
(2 ካታ. 20:1-11፤ 2 ኦዱዋ 32:24-26)
1 ሄ ዎደ ካቲ ህዝቂያስ ሀርጊደ፥ ሀይቃና ማቴዳ። ያት ደእሽን አሞጻ ናአይ ትምቢትያ ኦድያ እስያስ አኮ ቢደ፥ "መና ጎዳይ ኔና፥ ‘ኔን ሀይቃሳፐ አትና ፓጻካ፤ ሄዋ ድራዉ፥ ነ ጎልያ ጊግሳ’ ያጌ" ያጌዳ።
2 ህዝቂያስ ጎዳኮ ስም ግሲደ፥ መና ጎዳ ዎሴዳ። 3 እ "አቤት መና ጎዳዉ፥ ታን ነ ስንን ቱማተንነ ኩመን ዎዛናን ሄመቴዳዋነ ቃይ ኔና ናሸችያባ ኦዳዋ ታዉ ኔን ሀሳያና ማላ፥ ታን ኔና ዎሳይ" ያጊደ ዎሴዳ፤ ህዝቂያስ ሎይ ምሸቲደ ዬኬዳ።
4 ሄዋፐ ጉይያን፥ መና ጎዳ ቃላይ ኢስያሳ ኮ ሀዋዳን ያጊድ ዬዳ። 5 "ባደ፤ ህዝቂያሳ፥ መና ጎዳይ ነ ማይዛ አዉዋ ዳዊታ ጾሳይ ሀዋዳን ያጌ፤ ‘ታን ነ ዎሳ ስሳድ፤ ነ አፎካ በኣድ። ነ ላይ ቦላ ታን ነዉ ታማነ እቼሹ ላይ ጉጃና። 6 ኔናነ ሀ ካታማ አሶረ ጋድያ ካትያ ኩሽያፐ አሻና፤ ታን ሀ ካታማዉ ኦለታደ አሻና ያጌ’ " ያጋ ያጌዳ።
7 እስያስ ጉጂድካ ሀዋዳን ያጌዳ፤ "መና ጎዳይ ባረ ጌዳ ቃላ ፖላናዉ መና ጎዳዉ ማላታይ ሀዋ: 8 በአ፥ አካዝ ፑደ ከሳናዉ ጊግሴዳ ደን ደእያ ኩዋይ ታሙ ታንጉዋ ጉየ ስሚደ ባናዳን፥ ታን ኦና" ያጌዳ። ኩዋይ ታሙ ታንጉዋ ጉየ ስሚደ ቤዳ።
9 ይሁዳ ካቲ ህዝቂያስ ሀርግ ፓጼዳዋፐ ጉይያን፥ ጻፌዳ ማዝሙሪ ሀዋ: 10 ታን፥ "ታ ደኦ ላይዉ ብሮ ባጋ ጋክያ ዎደ፥ ሀይቁዋ ፐንግያና ገላና ሀናይታ? ታ አቴዳ ላይ ቦንቂ ድግና፥ መላ አታና ሀናይታ?" ያጋድ። 11 ሄዋዳንካ ቃይ፥ "ታን ፓጻ ደእያዋንቱ ጋድያን መና ጎዳ በእከ፤ ሀ ሳኣን ደእያዋንቱ ግዶንካ ላኤን መና ጎዳ በእከ። 12 ዶርሳ ሄምያዋ ዱንካንያዳን፥ ታ ደኡ ሾደቴዳ። ሸማይኒ አፍላ ሀርባን ጻጽያዋዳን፥ ታን ታ ደኡዋ ጻጻድ፤ እካ ታና ሸማይንያ ሀርባፐ ዱዳ ጋላሳፐ ቃማ ጋካናዉ፥ ኔን ታና ይሳዳ ያጋድ። 13 ሳአይ ዎንታና ጋካናዉ ታን ማዱዋ ደማናዉ ዋሳድ። ሽን ጋሙዋዳን እ ታ መቀ ኡባ መንዳ። ቃይ ጋላሳፐ ቃማ ጋካናዉ፥ ኔን ታና ይሳዳ። 14 ታን ጭራሹዋዳንነ ሃ ካፉዋዳን ዋሳድ፤ ሀራጵያዳንካ ዙዙማድ። ታ አይፈቱ ሳሉዋ ፑደ ጼሊደ ጼሊደ ዳቡሬድኖ። አቤት ጎዳዉ፥ ታን ኡንኤታድ፤ ኔን ታና ሀ ኡንኡዋፐ ከሳ!" ያጋድ።
15 ሀዋ ኡባ ጾሳይ እ ባረ ሁጲያን ኦዳ፤ ያትና፥ ታን አያ ጋናዉ ዳንዳያይታ? ታ ሸምፑ ሎይ ኡንኤቴዳ ድራዉ፥ ታ ላይ ኡባን አሽከተን ሀመታና። 16 አቤት ጎዳዉ፥ ሀዋንቱ ማላ የዎቱዋን አሳይ ፓጻ ደኤ። ሀይ ታ ፓጻተ ዛራደ፥ ታና ፓጻ ዎርኪ! 17 በአ፥ ታን ሀ ዎልቃማ ቱጋ ቱጋቴዳዌ ታዉ ሎአ ግዴዳ። ኔን ታ ሸምፑዋ ባሻ ኦላፐ ጉየ ዛራደ አሻዳ፤ ኔን ታ ናጋራ ኡባ ኔፐ ጉየ ዛራደ ኦላዳ። 18 አያዉ ጎፐ፥ ዱፉ ኔና ጋላተና፤ ሀይቁካ ኔና ሳበና። ጪማ ኦላዉ ዱገ ዎያዋንቱ ኔና አማን ጊደ ህዶታ ኦክኖ። 19 ታን ሀች ኔና ጋላትያዋዳን፥ ፓጻ ደእያዋንቱ ጻላላቱ ኔና ጋላቲኖ፤ ኔን አማንያዋ አዉ ባረ ናናቶ ኦዴ።
20 መና ጎዳይ ታና አሻና፤ ሄዋ ድራዉ፥ ኑን ኑ ደኡዋ ላይ ኡባን፥ መና ጎዳ ጎልያን ባቀቴዳ ክርያን ዋጸቴዳ ዲን የጻና።
21 ሀዋፐ ካሰ እስያስ፥ "ባላስያ ቴራ ዳጺደ፥ አ ጋፉዋ ቦላ ዎተ። ያቶፐ፥ እ ፓጻና" ያግ ዎዳ።
22 ህዝቂያስካ፥ "ታን ፓጻደ መና ጎዳ ጌሻ ጎልያ ፑደ ከሳናዎ ማላታይ አዬ" ያግ ኢስያሳ ኦች ዎዳ።