1 ህንተ ጾሳይ ሀዋዳን ያጌ፤ "ታ አሳ ምንተ! ምንተ! 2 የሩሳላመዉካ፥ እዛ ኦሞዱዋን ደኤዳ ዎዲ ፖለቴዳዋ፥ እዝ ናጋራይ አቶ ጌተቴዳዋ ኦድተ፤ እዝ ናጋራ ድራዉ፥ መና ጎዳይ እዞ ላኡ ዳኩዋ ሙሬዳዋ ኦድተ" ያጌ።

3 እት ሀዋዳን ያግያ ኮሻ ስሰቴ፤✝40:3 ማቶሳ 3:3፤ ማር. 1:3፤ ዮሃ. 1:23✝40:3-5 ሉቃሳ 3:4-6 "መላ ቢታን መና ጎዳ ኦግያ ጊግስተ፤ ኑ ጾሳዉ መላ ጋድያን አኮ ኦግያ ስት ኦተ። 4 ዎምባ ኡባይ ቁ ጋና፤ ደሪ ኡባይነ የዉ ኡባይ ዝቂ ጋና። ባዬዳ ኦጊ ሳላላና፤ ኮርጱኮርጳ ቢታይካ ደምባታና። 5 ሄ ዎደ፥ መና ጎዳ ቦንቹ ቆንጫና፤ አሹዋ ማዬዳ ኡባይ ሄዋ እትፐ በአና። አያዉ ጎፐ፥ መና ጎዳ ዶናይ ሄዋ ሃሳዬዳ" ያጌ።

6 እት ኮሻይ፥ "ዋሳ!" ያግያዋ ስሳድ።✝40:6-8 ያቆባ 1:10-11፤ 1 ጰጽ. 1:24-25

ታን፥ "ዋጋደ ዋሶ?" ያጋድ።

"አሳይ ኡባይ ማታ ማላ፤ አ ቦንቹ ኡባይካ ደምባ ጪሻ ማላ። 7 መና ጎዳይ ባረ ሸምፑዋ አ ቦላን ሸምፕያ ዎደ፥ ማታይ መሌ፤ ጪሻይካ ቆቆፈቴ። አሳይ ቱሙ ማታ ማላ። 8 ማታይ መሌ፤ ጪሻይካ ቆቆፈቴ፤ ሽን ኑ ጾሳ ቃላይ መናዉ ኤቂደ ደኤ" ያጋ ዋሳ።

9 ኔኖ ምሽራቹዋ ኦድያ ጽዮኔ፥ ቃ ደርያ ፑደ ከሳ፤ ነኖ ምሽራቹዋ ኦድያ የሩሳላመ፥ ነ ኮሻ ዎልቃፐ ቁ ኦ፤ ያዮፓ፤ ቁ ኦ፤ ያታደ ይሁዳ ካታማቶ፥ "ህንተ ጾሳይ ሀዌኮ" ያጋ ኦዳ። 10 በእተ፥ ኡባ ሞድያ መና ጎዳይ ዎልቃና ዬ፤✝40:10 ኢሳ. 62:11፤ ሳፃ 22:12 አ ቀሲ አዉ ሞዳና። በእተ፥ አ ዎይታይ አናና ደኤ፤ አ ኦሱዋ ጋቲካ አ ስንና። 11 እ ባረ ዉድያ ሄንንቻዳን ምዜ፤✝40:11 ህዝ. 34:15፤ ዮሃ. 10:11 ባረ ዶርሳ ማራቱዋካ ባረ ቀስያን ሺሺደ፥ ባረ ክዉዋን እድማና። ንያዋንታካ ሎዳን ካለና።

12 ሃቱዋ ባረ ኩሽያ ኮጵያን ማኬዳዌ፥ ሳሎቱዋ ታካያን ልኬዳዌ፥ ቢታ ባና ቁንኣን ማኬዳዌ፥ ቃይ ደረቱዋነ ዞዘቱዋካ ሚዛናን ልኬዳዌ ኦኔ? 13 መና ጎዳ አያና አዛዜዳዌ፥ ዎይ አ ዞርያዋ ግዲደ ታማርሴዳዌ ኦኔ?✝40:13 ሮመ 11:34፤ 1 ቆሮ. 2:16 14 እ ባረዉ ቆንጫናዳን፥ መና ጎዳይ ኦናና ዞረቴዴ? ዎይ አ ሱረ ፕርዳ ኦግያ ታማርሴዳዌ ኦኔ? ዎይ አ አዳ ኤራተ ታማርሴዳዌ ዎይ አ አኬካ ኦግያ በሴዳዌ ኦኔ?

15 በእተ፥ ካዉተቱ ባሬታ ግዶን ደእያ እት ጾክያ ሃ ማላ። ኡንቱንቱ ሚዛናን ደእያ ጉ ባናዳን ፓይደቴድኖ። በእተ እ ዳጋቴዳ ሃካ ሊቆ ባናዳን ማዛኔ። 16 ሊባኖሳ ምይ አዉ ኤናዉ ግደና፤ አን ደእያ ዶአቱካ ጹግያ ያርሾ ግድክኖ። 17 ካዉተቱ ኡባይ አ ስንን ባይናዋ ማላ፤ ኡንቱንቱ አ ስንን ኡባ ባይናባፐካ ጉዳን ፓይደቲኖ።

18 ያትና፥ ጾሳ ህንተ ኦናና ማላትሲቴ?✝40:18-19 ኪታ 17:29 ዎይ አይ ምስለቱዋና ልኪ ጼሊቴ? 19 ኤቃ ምስልያ ግዶፐ፥ ኩሽያ ሂላ ኤርያ አሳይ አ ማሴ፤ ሄዋ ቃይ ዎርቃ ትግያዌ ዎርቃን ሼሼ፤ ብራ ትግያዌካ አ ቦላ ብራ ሳንሳላታ መ። 20 ሄዎ ሻሉ ባይና ህዬሳይ ያርሾ ዎቀና ም ዶሬ፤ ያቲደ፥ ሄ ምስሊ ቃጸናዳን ኤሳናዉ ኩሽያ ሂላ ኤርያ አሳ ኮዬ።

21 ኤርበይክቴ? ዎይ ስስበይክቴ? ሀዌ ህንተንቶ ኮይሮፐ ኦደትቤኔ? ዎይ ሳአይ መቶደፐ ሀዋ ህንተ አኬክበይክቴ? 22 እ ቢታ ዩሹዋፐ ቦላ ባጋን ባረ አራታን ኡቴ፤ ጋድያን ደእያዋንቱ አ ስንን ቡምቡረ ማላ። ሳሎቱዋ ጋርዱዋዳን ፕድ ኦያዌ፥ ቃይ ደኢያሳ ኦደ፥ ዱንካንያዳን ቶልያዌ፥ 23 ካፓቱዋ ባይናባዳን ኦያዌ፥ ቢታ ካለያዋንታካ ሀዳ ኦያዌ አ። 24 ብሮ ኡንቱንቱ ቶከቶሳናነ ዘረቶሳና፥ ቃይ ጻጱዋካ ብሮ ጋድያን የዶሳና፥ ጾሳይ ኡንቱንቱ ቦላ ጫርኩዋ የድ አጌዳ፤ ኡንቱንቱካ መሌድኖ፤ ጎቲ ኡንቱንታ ሱላዳን አፌዳ።

25 ጌሻይ ኡንቱንታ፥ "ያትና፥ ታን አናና ልከታናዉ ታና ኦናና ማላትሲቴ?" ያጌ። 26 ህንተ አይፍያ ቁ ኦደ፥ ሳሉዋ ጼልተ፤ ሄ ጾልንተቱዋ መዳዌ ኦኔ? እ ኡንቱንታ ኦላንቻዳን ካለ፤ ኡንቱንቱ ፓይዱዋካ ኤሬ። እ ኡንቱንታ ኡባካ ኡንቱንቱ ሱንን ሱንን ጼሴ። አ አንጋ ግታተፐነ አ ዎልቃ ምኖተፐ ደንዴዳዋን፥ ኡንቱንቱፐ እቱነ የና።

27 ኔኖ ያቆባ፥ ነኖ እስራኤልያዉ፥ "ታ ኦጊ መና ጎዳፐ ጌሜዳ፤ ጾሳይ ታ ፕርዳ ሸነኮ ጌዳ" ያጋ አያዉ አማሳላይ? ቃይ አያዉ ሀዋዳን ሃሳያይ? 28 ኤራበይኪ? ስሳበይኪ? መና ጎዳይ መና ጾሳ፤ እ ቢታ ኡባካ መዳዋ። እ ዳቡረና፤ ዎይ ዎልቃይ አዉ ዉረና፤ ኦንነ አ ቆፋ ኤራናዉ ዳንዳየና። 29 ዳቡራንቻዉ ዎልቃ እሜ፤ ምኖተይ ባይናዎካ ምኖተ ጉጄ። 30 ሀራይ አቶ ያላጋ ናናይካ ዳቡሪኖ፤ ቃይ ዎልቃ ዉሪኖ። ዎዳላቱካ ኡባና ዳቡሪደ ኩንዲኖ። 31 ሽን መና ጎዳ አማነቲደ ናግያዋንቱ፥ ባረንቱ ዎልቃ ኦራና። ኡንቱንቱ አርጋንቱዋዳን፥ ቀፍያን ፑደ ከሳና፤ ዎጺደ ዳቡርክኖ፤ ሀመቲደካ ዎልቃ ዉርክኖ።