1 ጾሳይ ሀዋዳን ያጌ፤✝55:1 ሳፃ 21:6፤ 22:17 "ህንተኖ ሳመቴዳዋንቶ፥ ኡባይካ ሃኮ ሃ ዪተ፤ ሻሉ ባይናዋንቶ፥ ሃይተ። ሻምተ፤ ሚተ። ሃ ዪደ፥ ሚሻ ጭገናን ጮ ዎይንያ ኤሳካ ማካ ሻምተ። 2 ህንተ ሚሻ ቁማ ግደናባዉ አያዉ ከሲቴ? ካልሰናዋን ህንተ ዎልቃ አያዉ ዉርሲቴ? አነ ሎይደ፥ ታን ኦድያዋ ስስተ፤ ሎኦባ ሚተ፤ ቃይ ሞዋን ህንተ አሳተ ናሸችተ።

3 "ታ አሳዉ፥ ስስተ፤ ታኮ ሃ ዪተ።✝55:3 ኪታ 13:34 ሸምፑዋና ፓጻ ደአና ጎፐ፥ ታን ኦድያዋ ስስተ። ታን ህንተናና መና ጫቁዋ ጫቀታና። ታን አንጃና ጋደ ዳዊታ አንጄዳዋዳን፥ ህንተናካ አንጃና። 4 በእተ፥ ታን አ አሳዉ ማርካ፥ ካለያዋነ ካፑዋ ኡዳድ። 5 በአ፥ ኔን ኤረና ካዉተቱዋ ጼሳና፤ ቃይ መና ጎዳ ነ ጾሳ እስራኤልያ ጌሻ ጋሱዋን፥ ኔና ኤረና ካዉተቱ ኔኮ ኤሌሊደ ያና። አያዉ ጎፐ፥ ጾሳይ ኔና ቦንቼዳ" ያጌ።

6 መና ጎዳይ ቤትያ ዎደ አ ኮይተ፤ ማታን ደእያ ዎደ አ ጼስተ። 7 ኢታይ ባረ ኦሱዋ፥ ናጋራንቻይካ ባረ ቆፋ አጎ፤ ጾሳኮ እ ስሞ። እ አ ማራና። እ ኑ መና ጎዳኮ ስሞ። እ አዉ ጮ አቶ ጋና።

8 አያዉ ጎፐ፥ መና ጎዳይ፥ "ታ ቆፋይ ህንተ ቆፋ ማላ ግደና፤ ህንተ ኦጊካ ታ ኦግያ ማላ ግደና። 9 ሳሎቱ ሳኣፐ ቂያዋዳን፥ ታ ኦጊ ህንተ ኦግያፐ ቄ፤ ታ ቆፋይካ ህንተ ቆፋፐ ቄ። 10 እራይነ ሱፓ ሻቻይ ሳሉዋፐ ዎደ፥ ቢታ አሊደ፥ ሞካናዳንነ አይፋናዳን ኦያዋዳን፥ ቃይ ዘርያዎ ዘረ፥ ምያዋዉካ ካ እመናን ጉየ ሳሉዋ ስመናዋዳን፥✝55:10 2 ቆሮ. 9:10 11 ታ ዶናፐ ከስያ ቃላይካ ሄዋ ማላ። እ ታን ሀልቼዳዋ ፖላና፤ ቃይ ኪቴዳዋ ኦናፐ አትና፥ ታኮ ጮ ስመና።

12 "ህንተ ናሸቻን ከሳና፤ ሳሩዋን ሞይዘታና። ደረቱነ ከራቱ ህንተ ስንን ናሸቲደ የጻና፤ ደምባን ደእያ ምቱ ኡባይካ ባረንቱ ኩሽያ ባቃና። 13 አጉን ድራዉ ጺዳይ፥ ጎምኦርያ ድራካ ጻይይ ሞካና። ሄዌ መና ጎዳይ ሀሳየትያዋነ መናዉ የና ማላታ ግዳናዋ" ያጌ።