3 Unttunttu shiik’iide S’oossaa, «Nuuni s’oomeeddo; shin neeni ayaw nuuna s’eellabeykkii? Nuuni nuunatetsaa kawushsheeddo; shin neeni nuuna ayaw erabeykkii?» yaagiino.
S’oossay zaariide, unttuntta hawaadan yaagee; «Be’ite, hintte s’oomiyaa gallassi hinttena nashechchiyaabaa ootsiita; hintte oosanchcha ubbaa uk’k’unniita. 4 Be’ite, hintte walassawunne wad’etaw s’oomiita; k’ay mek’etsi bayinna deshetsaa dechchanaw s’oomiita. Hachche hintte s’oomiyaa hawaa mala s’oomay, hintte k’aalay bollan sisettanaadan ootsenna. 5 Taani dooriyaa s’oomay hawaa maleeyye? Itti Asay barenatetsaa kawushshiyaawe hawaa mala gallassaaneeyye? K’ay taani koyiyaa s’oomay Asay bare huup’iyaa c’eec’c’aadan duge hokissiyaaweeyye? Bidintsaa k’oliide, maak’aa hiis’s’iide gisiyaaweeyye? Yaatina, hewaa s’oomaa giide s’eegiiteeyye? K’ay he s’oomiyaa gallassaykka Med’inaa Goday nashettiyaa gallassaa geetettiiyye?
6 «Taani dooreedda s’oomaa hawaa be’ite: pirddaan naak’k’iide k’achcheeddawanttu sanssalataa leppiyaawaa, morgge mitsaa gonniyaa biliyaawaa, uk’k’unnetteeddawantta uk’k’unnuwaappe kessiyaawaanne morgge mitsaa ubbaa mentsiyaawaa.