1 መና ጎዳይ ታና ሀዋዳን ያጌዳ፤ "ዎልቃማ ጻ ዋራቃታ አካደ፥ ‘ኦሞዶ ኤሌላ! ቦንቂያዉ ኤሌላ!’ ያጋደ፥ ናባበትያ ፕዶልያን ጻፋ። 2 ቄስያ ኦርዮናነ ይባራክያ ናኣ ዛካራሳ አማንያ ማርካቱዋ ኦደ ታን ሱንና" ያጌዳ።

3 ሄዋፐ ጉይያን፥ ታን ትምቢትያ ኦድያ ታ ማቻትና ግሳድ፤ ያትና፥ አ ሻሃራደ እት ናኣ የላዱ፤ መና ጎዳይ ታና ሀዋዳን ያጌዳ፤ "አ ሱን፥ ‘ማሀር-ሻላል-ሀሽ-ባዝ’ ያጋደ ሱን። 4 ናአይ፥ ‘ታ አዎ፥ ታ አቴ’ ያጊደ ጼስያዋ ኤራናፐ ካሰ፥ አሶረ ጋድያ ካቲ ዳማስቆ ዱረተነ ሳማርያ ኦሞዱዋ አኪደ አፋና" ያጌዳ።

5 መና ጎዳይ ቃይካ ታዉ ሀዋዳን ያጊደ ሃሳዬዳ፤ 6 "ሀ አሳይ ሎዳን ጎግያ ሳልሆማ ሃቱዋ እጺደ፥ ራጺናነ ራማልያ ናኣ ናሸቲደ አኬድኖ። 7 ሄዋ ድራዉ፥ ታን ጎዳይ ምኖነ ዳሮ ግድያ ኤፍራጺሳ ሃ፥ አሶረ ካትያ አ ቶራንቻቱዋ ኡባና አሀና ሀናይ። እ ሻፍያ ኡባ ኩሚደ ከሳና፤ ጋጻ ኡባ ማዪደ ጎጋና። 8 ክጺደ ጎጊደ፥ ይሁዳ ገላና፤ ኤሊደ ያና አና፤ ኩን ቆያ ጋካና። አቤት አማኑኤላ፥ ካፉ ባረ ቀፍያ ምጭያዋዳን፥ ሃ ኩን ነ ጋድያ ኡባ ቦላን ምጨታና" ያጌዳ።

9 ህንተኖ ካዉተቶ፥ እትፐ ሺቅተ! ሽን ህንተ መኤረታና! ሃኮ ቢታ ኡባን ደእያ አሳቶ፥ ስስተ! ኦላዉ ጊግተ! ሽን ህንተ መኤረታና! ኤ፥ ኦላዉ ጊግተ፤ ሽን ህንተ መኤረታና! 10 ኦላ ኦለታናዉ ማቀትተ፤ ሽን ህንተ ማቁ ላለታና፤ ህንተ ሀልቹዋ ሃሳይተ፤ ሽን ህንተ ሀልቹዋ ሀላና፤ አያዉ ጎፐ፥ ጾሳይ ኑናና ደኤ።*8:10 ጾሳይ ኑናና ደኤ፦ ሀዌ እብራዌ ቃላን "አማኑኤላ" ግያዋ።

11 መና ጎዳይ ባረ ምኖ ኩሽያ ታ ቦላ ዎደ፥ ታዉ ሃሳዬዳ፤ ታን ሀ አሳ ኦግያ ካለና ማላ፥ ታና ሀዋዳን ያጊደ ሴሬዳ፤ 12 "ሀ አሳይ ማካላ ማቆ ግያዋ ኡባ ማካላ ማቆ ጎፕተ፤ ኡንቱንቱ ያይያባዉ ያዮፕተ ዎይ ዳጋሞፕተ።✝8:12-13 1 ጰጽ. 3:14-15 13 ህንተ ጌሻ ጋናዉ በስያዌ ኡባፐ ዎልቃማ መና ጎዳ፤ ህንተ አዉ ያያናዉነ ዳጋማናዉ በሰ። 14 እ ጌሻ ሳ ግዳናዋ፤ ሽን ይሁዳ ጋድያ አሳዉነ እስራኤልያ ጋድያ አሳዉ እ ቢያ ሹቻነ ኩንድስያ ዛላ ግዳናዋ፤ የሩሳላመን ደእያ አሳዉ እ ግትያነ ጲረ ግዳናዋ።✝8:14-15 1 ጰጽ. 2:8 15 ኡንቱንቱፐ ዳሩ በታና፤ ኩንዲደካ መአና፤ ጲርያን ኦይቀቲደካ ኦሞደታና" ያጌዳ።

16 ታን ኦዴዳዋ ናጋ፤ ታ ኤርስያ ቆማቱ ግዶን ህግያ አታማ። 17 ታን ባረ ሶምኡዋ ያቆባ ዛራቱዋፐ ገንያ መና ጎዳ ናጋና፤ ቃይ አን አማነታና።✝8:17 እብራ. 2:13

18 ታናነ ታዉ መና ጎዳይ እሜዳ ናናቱዋ በእተ። ኑን ጽዮነ ደርያን ደእያ ኡባፐ ዎልቃማ መና ጎዳፐ እስራኤልያዉ ማላታነ ማርካ።✝8:18 እብራ. 2:13

19 "ሳሱኪደነ ዙዙሚደ ሃሳይያ ሻሬቾቱዋነ ሞይትልያ ሃሳይስያዋንታ ኦችተ" ያጊደ ህንተና ዞርያ አሳይ ደኤ። ሀይቄዳዋንታ ፓጻ ደእያዋንቱባ ኦችያዋፐ፥ አሳይ ባረንቱ ጾሳ ኦቻናዉ በሰኔ? 20 ህግያነ ጾሳይ ኦድያዋ ስስተ! ሄ አሳቱ ሀ ቃላዳን ሃሳያና ዮፐ፥ ኡንቱንቶ ሳአይ ዎንተና።

21 አሳይ ዋየቲድነ ኮሻቲደ፥ ጋድያን ቶይላካታና፤ ኡንቱንቱ ኮሻቴዳ ዎደ ይሎቲደ፥ ፑደ ጼሊደ ባረንቱ ካትያነ ባረንቱ ጾሳ ሸቃና። 22 ሳኣኮ ዱገ ጼሊደ፥ ዋይያ፥ ማነ ያሽያ ሾኑዋ በአና፤ ኡንቱንቱ ባራ ማዉ ኦለታና።