ስንፐ ካተታና ካትያ
1 ግዶፐነ፥ ዋየቴዳዋንቶ ሀዋፐ ስንዉ መና።9:1 ማቶሳ 4:15 በን ዎደ ጾሳይ ዛብሎና ቢታነ ንፍታሌማ ጋድያ ካዉሼዳ፤ ሽን ስንፐ ሄ ሜድተራነ አባ ኦግያን ደእያ ቢታነ ዮርዳኖሳ ሻፋፐ ሄፍን ባጋን ደእያ "አይሁዳ ግደና አሳይ ደእያ ጋሊላ" ግያ ጋድያ እ ቦንቻና።
2 ማን ሀመትያ አሳይ ዎልቃማ ፖኡዋ በኤዳ፤9:2 ማቶሳ 4:16፤ ሉቃሳ 1:79 ቃይ ባራ ማ ጋድያን ደእያዋንቶ ፖኡ ፖኤዳ።
3 ኔን ካዉተ አሳ ዳርሳዳ፤ ኡንቱንቶ ናሸቻ ጉጃዳ፤ አሳይ ካ ጫክያ ዎደ ናሸትያዋዳን፥ ዎይ ኦሞዱዋ ግሺደ አክያ ዎደ ናሸትያዋዳን፥ ነ ስንን ናሸታና። 4 አያዉ ጎፐ፥ ኔን ምድያማ ጋድያ ጾኔዳ ጋላሳዳን፥ ኡንቱንታ ዴጽያ ሞርገ ም፥ ኡንቱንቱ ሀሽያ ሞርገ ምነ ኡንቱንታ ናቂያዋንቱ ጻምኣ መንሬዳ። 5 ዎራጅያ ኦላንቻቱዋ ጫማይነ ሱን ሙናቀቴዳ ማዩ ኡባይ ታማን ኤያባ ግዳናዋ። 6 ናአይ ኑዉ የለቴዳ! አቱማ ናእ ኑዉ እመቴዳ! ካዉተይ አ ሀሽያን ዎና፤ አ ሱንይ፥ "ማላልስያ ዞርያዋ፥ ዎልቃማ ጾሳ፥ መና አዉዋ፥ ሳሮተ ካፑዋ" ጌተታና። 7 አ ካዉተ ዳሩዋዉነ አ ሳሮተዉ ዛዋይ ባዋ፤9:7 ሉቃሳ 1:32-33 ሀችፐ ዶሚደ፥ መና ጋካናዉ፥ ሱረ ፕርዳንነ ጽሎተን ምንሳናዉነ ኤሳናዉ ዳዊታ ካተቱዋ አራታንነ አ ካዉተን እ ካተታና፤ ኡባፐ ዎልቃማ መና ጎዳ ምሹ ሄዋ ፖላና።
ጎዳ ሀንቁዋ
8 ጎዳይ ያቆባ ዛራቱዋ ቦላ ፕርዳ ቃላ ኪቴዳ፤ እስራኤልያ ቦላ ኩንዴዳ። 9 አሳይ ኡባይ፥ ኤፍሬማ አሳይነ ሳማርያ ካታማን ደእያዋንቱ፥ አዩዋንነ ኦቶሩዋን ሃሳይያዋንቱ፥ ሀዋ ኦዳዌ ጎዳ ግድያዋ ኤራና። 10 ኡንቱንቱ፥ "ጹብያፐ ኬጸቴዳዋንቱ ኮለቴድኖ፤ ሽን ኑን ኡንቱንታ ዛረደ፥ ማሰቴዳ ሹቻቱዋን ኬጻና፤ ኤቱ ቃንጸቴድኖ፤ ሽን ኑን ኡንቱንቱ ሳኣን ዝጋቱዋ ላማና" ያጌድኖ።
11 ሄዋ ድራዉ፥ መና ጎዳይ፥ ራአሶና ሞርከቱዋ ምንሳና፥ ኡንቱንቱና ኦለቴዳ ሞርከቱዋ ኡንቱንቱ ቦላ ደንዳ። 12 አዋይ ዶልያ ባጋፐ ሶርያ ጋድያ አሳቱነ አዋይ ዉልያ ባጋፐ ፕልስጼማ ጋድያ አሳቱ ባረንቱ ዶና ሀንጊደ፥ እስራኤልያ ሜድኖ። ሄ ኡባንካ ጾሳ ሀንቁ ስምቤና፤ አ ኩሺካ ብሮ ደንዴዳሳን ደኤ።
13 ግዶፐነ፥ አሳቱ ባረና ሾጬዳዋኮ ስምበይክኖ፤ ኡባፐ ዎልቃማ መና ጎዳካ ኮይበይክኖ። 14 ሄዋ ድራዉ፥ መጽ እት ጋላስ መና ጎዳይ እስራኤልያፐ ሁጲያነ ጎይና፥ ቃ ዛምባ ዳሻነ ዝቃ ማቃ ቃንጻና። 15 ጭማቱነ ቦንቼቴዳዋንቱ ሁጲያ፤ ዎርዱዋ ታማርስያ ትምቢትያ ኦድያዋንቱ ጎይና። 16 ሀ አሳ ካለያዋንቱ፥ ዎራ ካለኖ፤ ኡንቱንታ ካልያዋንቱካ ባሊኖ። 17 ሄዋ ድራዉ፥ ጎዳይ ኡንቱንቱ ያላጋ አሳቱዋን ናሸተና፤ አዉ ባይና ናናቶነ አምኤቶ ቃረተና። አያዉ ጎፐ፥ አሳይ ኡባይ ኢታነ ጾሳ ኤረናዋ፤ አሳይ ኡባይ ባረ ዶናን ኢታባ ሃሳየ። ሄ ኡባንካ ጎዳ ሀንቁ ስምቤና፤ አ ኩሺካ ብሮ ደንዴዳሳን ደኤ።
18 ኢታተይ ታማዳን ጹጌ፤ ክንድቹዋነ አጉን ም ይሴ፤ ስኬዳ ዎራይ ኤጽና፥ ጩዋይ ቱሳዳን ስት ጊደ፥ ፑደ ከሴ። 19 ኡባፐ ዎልቃማ መና ጎዳ ሀንቁዋን ጋዲ ጹገታናዋ፤ አሳይካ ታማን ኤያባ ማላ ግዳናዋ፤ ኦንነ ባረ እሻ አሻናዉ ቆፐና። 20 ኡንቱንቱ ኡሸቻ ባጋፐ ቦንቃና፤ ሽን ኮሻታና፤ ሀድርሳ ባጋፐ ማና፤ ሽን ካልክኖ፤ ኡንቱንቱ ባረንቱ የሌዳ ናናቱዋ ማና። 21 ምናሰ ኤፍሬማ፥ ኤፍሬምካ ምናሳ ማና፤ ኡንቱንቱ እትፐ ግዲደ፥ ይሁዳ ቢታ ሞርካና። ሄ ኡባንካ ጾሳ ሀንቁ ስምቤና፤ አ ኩሺካ ብሮ ደንዴዳሳን ደኤ።