De Openboarunk von Johanes 22

De Riefa von Läwens-Wota

1 Un hee wees mie eenen reinen Riefa von Läwens-Wota, kloa aus Kristal, dee jinkj rut von Gott sien Troon un von daut Laum. 2 En dee Medd von äare Gaus un aun jiedat Sied Riefa, wia de Läwens-Boom, dee twalw Sorten Frucht drajcht un brinjt jieda Moonat siene Frucht; un de Bläda von däm Boom sent fa de Nazionen äare Heelunk. 3 Un doa woat kjeen Fluch mea sennen; un de Troon von Gott un von daut Laum woat en ar sennen; un siene Kjnajchts woaren Am deenen. 4 Un dee woaren sien Aunjesecht seenen; un sien Nomen woat aun äare Stierns sennen. 5 Un doa woat kjeene Nacht sennen, un dee haben kjeen Bederfnis fa eene Laump uk nich Licht von de Sonn; wiels de Har Gott beschient äant, un see woaren rejieren von Eewichkjeit to Eewichkjeit.