João 5

Jesus heelt eenen Kranken bie Betesda

1 No dit wia doa een Juden Fast; un Jesus jinkj nopp no Jerusalem. 2 Doa es oba en Jerusalem bie de Schops-Puat een Wota, daut en hebräisch Betesda jenant woat, daut haft fief Veraundasch. 3 Doa bennen lach eene groote Häad Kranke, Blinje, Lome un Vedrieejde*5:3 Vedrieejde: Dee met vedrieejde Jlieda., dee doa luaden, no een Bewäajen von daut Wota. 4 Wiels een Enjel kjeem to jewesse Tieden en daut Wotaloch un bewäajd daut Wota; wäaemma dan daut ieeschte, no daut Bewäajen, en daut Wota stieech, wort jesunt, von wautemma hee fa eene Krankheit haud. 5 Un doa wia een jewessa Mensch, dee aul acht-un-dartich Joa krank jewast wia. 6 Aus Jesus dän doa ligjen sach un wist, daut hee aul lange Tiet soo jewast wia, sajcht Hee to am: West du jesunt woaren? 7 De Kranka auntwuad Am: Har, ekj hab kjeen Mensch, dee mie en daut Wota brinjt, wan daut Wota bewäajcht worden es; un wäarent ekj kom, sticht een aundra ver mie nenn. 8 Jesus sajcht to am: Sto opp, nemm dien Bad un go! 9 Un fuaz wort de Maun jesunt un neem sien Bad un jinkj. Un deeselwja Dach wia de Sabat*5:9 Sabat: De Säwenda dach en de Wäakj, (Sinowent) en däm kjeene Oabeit sull jedonen woaren..