1 «ኢሲ ኣሲ ባ ኬዮ ኣንጂ ዬዲን

ኢዛ ባዳ ሃራ ኣዚና ጌሊኮ፥

ካሴ ኣንጂ ዬዲዳዴይ

ሲሚ ኢዚኮ ቢዜ?

ኢዚ ቢኮ ሄ ቢታያ

ሙሌ ቱኔኬ?

ኔኒ ጊዲኮ ኔ ሲቂዛ

ጮራ ላጌታራ ላይማታዳሳ፤

ሂስታዳካ ሃኢ ኔኒ

ታኮ ሲማና ኮያይ?» ጌስ።

2 «ኣኔ ቁ ጋዳ ኣይኮይ ባይንዳ

ዙምቡላታ ጼላ፤

ኔኒ ላይማስ ኢቾንታሶይ

ሄሳን ዲዜ?

ቦንቃና ባዞን ኡቲዳ

ፓንጋ ማላ

ኦጌ ዶናን ኡታዳ

ኔ ላጌታ ናጋዳሳ፤

ሂስታዳ ኔኒ ላይማቴኒኔ

ኢታቴን ቢታዮ ቱኒሳዳሳ።

3 ሄሳ ጊሻስ ፑሴይካ

ፑሶንታ ማላ ዲጌቲዴስ፤

ባልጎ ኢራይካ ቡኮንታ ኣጊዴስ፤

ኔ ጊዲኮ ሃኖ ጋካናስ

ላይማቴ ኣጋቤካ፤

ኔኒ ዬላቶንታካ ኢጻዳሳ።

4 ሃኢ ኔኒ ታና፥

‹ታ ኣዋዉ፥

ታስ ናቴቴ ላጌዞ!

5 ኔኒ ኡባቶ ታ ቦላ ሃንቄታኔ?

ኔ ሃንቆይ ሜርናሴ?› ጋዳሳ።

ኤ ኔኒ ሂዝጋሳ፤

ጊዶ ኣቲን ኔኒ ዳንዳይዳ ኬና

ኢታ ሚሽ ኡባ

ኦሳ» ጌስ።

6 ካዎ ኢዮሲያሲ ካዎቲዳ ላይ ጎዳይ ታስ፥ «ሃና ኣማኖይ ባይንዳ ኢስራኤሌይ ኦዳይሳ ኔኒ ቤኣዲ? ኢዛ ቃ ዙምቡላታ ቦላ ኬዛዳ ዳሻ ሚታ ጋርሳን ላይማታዱስ።✝3፡6 2ካዎ 22፡1—23፡30፤ 2ታሪ 34፡1—35፡27 7 ኢዛ ሃይሳ ኡባ ኦዳካ ታኮ ሲማና ጋዳ ቆፓዲስ ሺን ሲማቤኩ። ቃሴ ኣማኔቶንታ ኢዚ ሚቾ ዩሁዳይካ ሄሳ ቤያዱስ። 8 ኣማኖይ ባይንዳ ኢስራኤሌ ዴሬቲ ላይማቲዳ ጊሻስ ኣንጆ ዋራቃታ ኢማ ዬዳዲስ፤ ኢስራኤሌ ሚቾ ኣማኔቶንታ ዩሁዳይካ ሃይሳ ቤኣሼ ያዮንታ ኬዛዳ ላይማቲሺን ቤኣዲስ። 9 ባ ካዉሻቴን ቢታ ቱኒሳዱስ፤ ሚራካ ሹቻራካ ላይማታዱስ። 10 ሄሳን ኡባንካ ኢዚ ሚቺያ፥ ኣማኔቶንታ ዩሁዳይ ጮ ሲሚዳ ሚሳታዉሲፌ ኣቲን ኩሜ ዎዚናፔ ታኮ ሲማቤኩ» ጊዴስ።

11 ጎዳይ ታስ፥ «ኣማኔቶንታ ዩሁዳፔ ኣማኖይ ባይንዳ ኢስራኤሌይ ጺላ ቤታዱስ።

12 «ባ፤ ባዳ ፑዴሃ ባጋስ፥

‹ሃኔ ኣማኖይ ባይንዳ

ኢስራኤሌ ሲማ!

ታኒ ማሮታይ

ኩሚዳዴ ጊዲዳ ጊሻስ

ኔና ኢታ ኣይፌን ጼሊኬ፤

ሜርናስካ ሃንቄቲኬ›

ጌስ ጎዳይ።

13 ጊዲኮኔ ኔኒ፥

‹ጎዳ ኔ ጾሳ ቦላ

ማካላቴን፥

ኔ ቦንቾካ ኣላጋ ጾሳታስ

ዳሻ ሚታ ጋርሳን

ኣ ኢሞኒኔ

ታስ ኣዛዜቶንታ ኢጾን ኔኒ

ሞራንቻ ጊዲዳይሳ

ጻላ ኣማና›

ጌስ ጎዳይ» ጊዴስ።

14 ቃሴካ ጎዳይ፥ «ኢንቴኖ

ኣማኔቶንታ

ኣሳቶ፥ ሲሚቴ፤

ታኒ ኢንቴስ ኣዚና፤

ታኒ ኢንቴ ጊዶፌ

ኢሲ ካታማፔ ኢሳ፥

ኢሲ ቆሞፌ ናምኣታ ዶራዳ

ጺዮኔ ኤሃና።

15 «ሄሳፌ ጉዬ ታኒ ታ ዎዚና ማላ ኢንቴና ኤራቴኒኔ ኣኬካን ሄሚዛ ሄንንቻታ ኢንቴስ ኢማና። 16 ቃሴካ ጎዳይ ኢንቴ ቆዳይ ቢታ ቦላ ጮራቲዛ ዎዴ፥ ‹ጎዳ ጫቆ ቃላ ታቦታ› ጊ ጼይጌኬታ። ኢዚ ኢስታስ ቆፌቴናኔ ኣኬኬቴና፥ ዬናኔ ሃራይ ኦሴቴና። 17 ሄ ዎዴን ኢስቲ ዬሩሳላሜ፥ ‹ጎዳ ኣራታ› ጊ ጼይጋና። ካዎቴ ኡባፌ ኣሳይ ጎዳ ሱን ቦንቻናስ ዬሩሳላሜ ሺቃና። ሄሳፌ ኢስቲ ባንታ ኢታ ዎዚና ሃኖቴ ካሌቴና። 18 ሄ ጋላሳታን ዩሁዳ ኣሳቲ ኢስራኤሌ ኣሳታራ ጋይቲዲ ፑዴሃ ባጋ ቢታፌ ታኒ ካሴ ኢንቴ ኣዋታስ ጺንጾ ሂስታ ኢሚዳ ቢታ ኢሲፌ ያና» ጌስ።

19 ጎዳይ፥ «ታኒ ኔና

ኣቱማ ናይታ ማላ

ዎስታ ዎናኮ፥

ዶሬቲዳ ቢታዮኔ

ኣይ ካዎቴካ ዴሞንታ

ሎኦ ቢታዮ

ኔና ላቲሳና ቆፓዲስ።

ቃሴ ታና፥ ‹ታ ኣዋዉ!› ጋዳ

ጼይጋና ሚሳቲዴስ፤

ታና ካሊዛሶፔ

ጉዬ ሲሞንታ ሚሳታዳሳ፤

20 ጊዶ ኣቲን ኢስራኤሌ ኣሳዉ!

ኢንቴ ባ ኣዚናስ

ኣማኔቶንታ ማጫሳ ማላ

ታስ ኣማኔቲቤኬታ» ጌስ።

21 ኢስቲ ጎዳ ባንታ ጾሳ ባሊዲ

ባንታ ኦጌ ጌላሲዳ ጊሻስ

ኢስራኤሌ ዴራ ዋሶይ፥

ሚሻ ዬሆይ ኣይኮይ ባይንዳ

ዙምቡላታ ቦላ ሲዬቴስ፤

22 ኢስቲ፥ «ኢንቴኖ ኣማኖይ ባይንዳ

ኣሳቶ! ታኮ ሲሚቴ።

ኢንቴ ኣማኔታና ማላ፥

ታኒ ኢንቴና ፓና» ጊዴስ።

ሂስቲን ኢስታስ፥

«ኤሮ፥ ኑኒ ኔኮ ሲማና።

ኣይስ ጊኮ ኔኒ ጎዳ

ኑ ጾሳ።

23 ኑኒ ዙምቡላታ ቦላኔ

ዙማታ ቦላ ኤቃ ጾሳታስ

ጎይኖይ ቱማፔ ኑስ ባላ፤

ቱማፔ ኑስ ኢስራኤሌታስ

ኣቶቴ ጎዳ ኑ ጾሳፌ።

24 ኑኒ ዬላጋቴፌ ዶሚን

ኑ ኣዋቲ ዳቡሪ

ዴሚዳ ኣይፌታ፥

ኢስታ ዶርሳታኔ ሜሄታ፥

ኢስታ ማጫ ናይታኔ

ኣቱማ ናይታ

ቱና ጾሳቲ ሚ ይሲዳ።

25 ኑኒ ዬላጋቴፌ ዶሚዲ

ሃች ጋካናስ፥

ኑኒካ ኑ ኣዋቲካ

ጎዳ ኑ ጾሳ ቦላ

ናጋራ ኦዶስ፤

ጎዳስ ኑ ጾሳስ

ኣዛዜቲቤኮ፤

ሄሳ ጊሻስ ኣኔ ኑኒ ዬላቴ

ጉሉንቲዲ ኢቾስ፤

ቃሴ ካዉሻቴ ኑና

ኣፋላ ማላ ካሞ» ጌቴስ።