1 ጎዳፔ ኤርማሳኮ ዪዳ ቃላይ ሃይሳፌ ካሊዛይሳ። 2 ጎዳ ኢስራኤሌ ጾሳይ ኤርማሳ፥ «ታኒ ኔስ ዮቲዳ ቃላ ኡባ ማጻፋን ጻፋ። 3 ታኒ ታ ዴሬ ኢስራኤሌኔ ዩሁዳ ካሴ ኢስታ ኣዋታስ ታ ኢሚዳ ቢታ ኢስታስ ዛራ ኤሃና ዎዴይ ጋኪዴስ፤ ኢስቲካ ላታና» ጌስ።

4 ጎዳይ ኢስራኤሌሲኔ ዩሁዳስ ዮቲዳ ቃላይ ሃይሳፌ ካሊዛይሳ።

5 ጎዳይ፥ «ታኒ ባቦኔ

ሺሮ ዋሶ ሲያይስ፤

ሳሮይካ ዴና።

6 ኣኔ ኦይቺቴኔ ኣኬኪቴ!

ኣዴይ ዬላናስ ዳንዳይዜ?

ሂስቲን ኣዴይ ኡባ

ሚጻይ ኦይኪዳ ማጫሳ ማላ

ባ ኩሼ ባ ኡሎ ቦላ ዎን

ኣሳ ኡባ ሲን ካሬቲን

ታ ቤኢዛይ ኣዛሴ?

7 ሄ ጋላሳይ ኣይ ማላ

ዳጋንዛ ጋላስ ጊዳኔ!

ሄሳ ማላ ጋላሲ ዴና፤

ሄ ጋላሳይ ያቆቤ

ዜሬታስ

ሜቶ ጋላስ ጊዳና፤

ጊዶ ኣቲን ኢስቲ

ሄ ሜቶዛፔ ኣታና» ጌስ።

8 ጎዳይ ኡባፌ

ዎልቃማ ጾሳይ፥

«ሄ ጋላስ ታኒ ኢስታ ሞርጌፌ

ቃምባራ ሜንና፤

ኢስቲ ቃሼቲዳ

ሳንሳላታካ ዱና፤

ሃይሳፌ ጉዬን

ኣላጋይ ኢስታ ሃሬና።

9 ጊዶ ኣቲን ጎዳስ

ባንታ ጾሳሲኔ

ታኒ ኢስታስ ካዎዳ

ካዎ ዳዊቴ ዛሬስ

ኢስቲ ሃሬታና» ጌስ።

10 «ሄሳ ጊሻስ ታ ኣይሌ

ያቆቤ ዛሬቶ ያዮፍቴ!

ኢንቴኖ ኢስራኤሌቶ ዳጋሞፍቴ!

ኢንቴ ሃሆሶን ዲሺን

ታኒ ኢንቴና ኣሻና፤

ኢንቴ ዛሬታካ ኢስቲ ዲኤቲዳ

ቢታፌ ኬሳ ኤካና፤

ያቆቤ ዛሬቲ ሲሚዲ

ሳሮኒኔ ዎፓን ኡታና፤

ኢስታ ያሺሳና

ኣይ ሚሺካ ዴና።

11 ታኒ ኢንቴና ኣሻናስ

ኢንቴናራ ዳይስ፤

ታኒ ኢንቴና

ካዎቴታ ጊዶን ላላዲስ፤

ሄ ካዎቴታ

ሙሌራ ይሳና፤

ጊዶ ኣቲን ኢንቴና

ሙሌራ ይሲኬ፤

ታኒ ቂጻቴይ ባይንዳ ጮ ኣጊኬ፤

ጊዲኮካ ታኒ ኢንቴና

ጊናራ ቃጻያና» ጌስ ጎዳይ።✝

12 ጎዳይ፥ «ኢንቴ ሜቆይ ኮሌቴና፤

ኢንቴ ማዱንይ ፓጼና።

13 ኢንቴ ጊሻስ ሞቴቲዛይ ዴና፤

ኢንቴ ማዱንስካ ሌይ ቤቴና፤

ኢንቴስ ፓጾይ ዴና።

14 ኢንቴ ላጌቲ ኡባይ ኢንቴና ዶጊዳ፤

ኢስቲ ኢንቴ ጊሻስ ዉዴቴቴና፤

ታኒ ኢንቴና

ሞርኬ ሾጪዛ ማላ ሾጫዲስ፤

ሜንጼ ኢታ ኣሳ ማላ

ታ ኢንቴና ቃጻያዲስ።

ጋሶይካ ኢንቴ ቆሆይ ጊታ፤

ኢንቴ ናጋራይካ ዳሮ።

15 ሌይ ባይንዳ ኢንቴ ሃርጌሲኔ

ኢንቴ ማዱን ጊሻስ ኣይስ ዋሴቲ?

ኢንቴ ሞሮይ ጊታኔ

ኢንቴ ናጋራይ ዳሮ ጊዲዳ ጊሻስ

ሃይታ ኡባ ታ ኢንቴ ቦላ

ኦዲስ» ጌስ።

16 «ጊዶ ኣቲን ኢንቴና

ዲፒ ሂስቲ ሚዳ ኡባቲ

ሄሳ ሜቴታና፤

ኢንቴ ሞርኬ ኡባቲካ ዲኤቲ ባና፤

ኢንቴና ቦንቂዳይቲ ቦንቄታና፤

ኢንቴና ቦጊዛይቲ ቦጌታና።

17 ኢንቴና ጊዲኮ ታኒ ዛራዳ ፓዪሳና፤

ኢንቴ ማዱንካ ፓና።

ጋሶይካ ኢስታስ፥ ‹ካቲዳሮ፤

ኦኒካ ኮዮንታ ጺዮኖ›

ጊዳ ጊሻሳ» ጌስ ጎዳይ።

18 ጎዳይ፥

«ታኒ ያቆቤ ኬ ዛራ ኬጻና፤

ኢዚ ዲዛሶስካ ቃታና፤

ካታማያካ ካሴ ባ ላሌቲዳሶን

ሲማ ኬጼታና፤

ካዎቴ ኬይካ ካሴ ባ ዲዛሶን

ሲሚ ኬጼታና።

19 ኢስታፌ ጋላታ ዬይኔ

ኢሊሊሳ ጬንጉርሲ ሲዬታና፤

ታኒ ኢስታ ዳርሳና፤

ኢስታ ቆዳይካ ፓጬና፤

ታኒ ኢስታ ቦንቼቲዳ ዴሬ ኦና፤

ኢስቲ ካቲዳይታ ጊዴቴና።

20 ኢስታ ዜሬይ

ቤኒ ዎዴ ዲዛ ማላ ዳና፤

ኢስታ ማባራይካ ታ ሲንን

ሚኒ ኤቃና፤

ኢስታ ኡንኤዛ ኡባካ

ታኒ ቃጻያና።

21 ኢስታ ካሌዛይ ኢስታ ባጋፌ ጊዳና፤

ኢስታ ኣይሲዛይ

ኢስታ ጊዶፌ ዴንዳና፤

ታኒ ኢዛ ታኮ ሺሻና፤

ኢዚካ ታኮ ሺቃና።

ታ ሺሾንታ ዲሺን ጻሊዲ

ታኮ ሺቃናይ ኦኔ?

22 ሄሳ ጊሻስ ኢንቴ ታ ዴሬ ጊዳና፤

ታኒካ ኢንቴ ጾስ ጊዳና» ጌስ።

23 ቤኢቴ ጎዳ ሃንቆይ

ዳምባላ ማላ ዴንዴስ፤

ቡልኣኬቲዛ ጎቴ ጫርኮይ

ኢታታ ዎና።

24 ኢዛ ዎዚና ቆፋ ፖሎንታ ጎዳ ሃንቆይ

ጮ ሃዳ ጉዬ ሲሜና፤

ሄሳ ዪዛ ዎዴታን ኢንቴ ኣኬካና።