1 Undaanɛ nu ɠa ga naa, nii é la ziɛzu ga faa ɲɔu ɠɛ nuiti ta-lɛnɛ gooi,

é la ziɛzu ga kotoba nuiti siɛ ʋelei,

é la zeizu ɲɛɛɠulasu nuiti ta-ɓɔkpɔgi ma.

2 Kɛlɛ ziima vai ɠa ga Ɠɔoɠɔ GALAGI ná-tɔgi,

é ɗa ɠizɛ ná-tɔgi zu, folo ʋɛɛ kpidi ʋa.

3 Kɛɛʋɛ eɠɛ gului nii siingai ziɛlaʋɛ,

é gwaai wosu ga gwaa yeeɠɛɠalai,

gaalaagi la ʋooloa,

nii kpein é kɛɛzu, ta ɗa zoloo.

4 É la ɠana ga faa ɲɔu ɠɛ nuiti,

ti ɠɛɛʋɛ eɠɛ molo ɠalai fiilɛi liizu la.

5 Naa ɠa é ba, faa ɲɔu ɠɛ nuiti ti la losu zɔlɔɔga tukpɔɠaaleʋe voloi.

Kotoba nuiti ɓalaa, ti la zeizu zɔlɔɔga telebo nuiti saama.

6 Mazɔlɔɔ Ɠɔoɠɔ GALAGI ɠaazu ɠa telebo nuiti ta-ʋelei ʋa.

Kɛlɛ kotoba nuiti ta-ʋelei ɠa liizu ga tiye undaaʋiligi zu.