Salmos 119

Ɠɔoɠɔ GALAGI ná-tɔgi maayikiʋɛ, daazeeli

1 Undaanɛ nu ɠa ga naati, niiti ti-ziɛ ʋelei zɔlegai,

ti ti-ziɛ ʋelei zoloosu Ɠɔoɠɔ GALAGI ná-tɔgi ma.

2 Undaanɛ nu ɠa ga naati, niiti ti ná-kala gooiti sosu,

ti ɠolozu bɛ ga ti-yiimaʋɛ pɛ.

3 Naati ti la faa ɲɔu nɔpɛ kɛa,

kɛlɛ ta ta-eteai ziɛzu, é zoloo GALA ná-pelei ma.

4 È ɗa-leveiti kulani kɛlɛma,

nii a kɛ nu ɠolo ti ʋɛ ga pagɔ.

5 Ziilɔɔi ɠɛ zèa,

nii a kɛ, gè ɗa-leveiti so!

6 Naazu gè la unfega tago ɓalaa,

siɛgi zu gè ɗa-leveiti pɛ pɛtɛsu da.

7 Nà è maamusɛ ga sɔledai, é zìimaʋɛ,

nà ɗa-lelebodai ma leveiti kalana.

8 Nà ɗa-leveiti so,

mina ɠɛlɛ bà ɲɛgɛlɛin.

9 Zunu loungoi ɠa zoo ɠale, é ziɛ ɲadedai zu?

Kɛni é è-laawooi zo, é ziɛ la.

10 Nà è ɠaiziɛzu ga zìimaʋɛ pɛ,

mina ɓe bà, gè ʋa zeɠe ɗa-leveiti polu.

11 Gè è-laawooi makɛgɛ zìimaʋɛ,

naa ɠa a kɛ, gè mina koto ɠɛ è laalɔɠɔma.

12 Mamagi ɠa è ʋɛ, Ɠɔoɠɔ GALAGI,

kàla ga ɗa-leveiti!

13 Dàkɔlɔgiti ta ɗa-leveiti kpein suɠulazu,

niiti è ti woni.

14 Gè ʋilɛ ɗa-ɠala gooiti polu, naa ɠa ɗa kòozunɛ,

eɠɛ ni nà naavolo wola zɔlɔɔ.

15 Nà ɠisiɛ ɗa-leveiti su,

gàazu logɛ ɗa-ʋeleiti ba.

16 Nii è sɛʋɛai, naa ɠa nɛ̀ɛbɛ vaa wolai su,

gè la yeemaa è-laawooi ma.

17 Faa ʋagɔ ɠɛ bɛ̀, nɛ̀i gè ga ɗa-wotiɠɛ nui,

gè zɛnvui wo, nà ɠolo è-laawooi ʋɛ.

18 Gàazuʋɛ zeɠe ma,

naa ɠa a kɛ, gè ɗa-lɔgi maayikizuʋɛ ɠa.

19 Nà ga seikɔɠɔma nu eteai zu,

mina ɗa-leveiti dɔɔɠu bà.

20 Yeeɠɛɠalai pɛ su, ɗa-leveiti kwɛɛ fai ɠa

gè gaiziɛzu ga sɛ̀bɛi pɛ.

21 Ɗa zelii losu waso nuiti ma, foovoo nuiti,

ti zeɠezu ɗa-leveiti polu.

22 Ɓaaɠulamai ta bɛlɛlala vai ma ɠasɔi zeɠe ùnma,

mazɔlɔɔ nà ɗa-ɠala gooiti sosu.

23 Anɛɛ ni kundiɠiiti ta yaavai ɠilizu dàalɔɠɔma,

nɛ̀i gè ga ɗa-wotiɠɛ nui, nà yɛ ɠisiɛzu ɗa-lɔgiti su.

24 Ɗa-ɠala gooiti ti ga zìima vaiti,

ta ga tɛ̀nɛ nu ʋagɔiti.

25 Nà laani fufiligi zu,

zɛnvui ve bɛ̀, eɠɛʋelei è-laawooi bogai la.

26 Gè sɔ̀giti kpein dɛa ga ɗe, è gòoɠaaʋoteni,

kàla ga ɗa-leveiti.

27 Ɗa-leveiti gaaɠa ʋelei lɛ ga ze,

nii a kɛ gè ɠisiɛ ɗa-vaa maayikiaiti su.

28 Ziizoolɛi ɠa gàazuɗɛi ʋuuzu.

Bùzeɠe, eɠɛʋelei è-laawooi la.

29 Màaɠooza zɛɛ ʋelei ʋa.

È-zaalai zu, ɓɔ bà, gè ziɛ ga ɗa-lɔgi.

30 Gè yiimazeɠea ga gè yɛ è ʋɛ ga wooɠɛɠila nu,

nà ɠolozu ɗa-leveiti bɛ.

31 Nà ɠilizu ɗa-ɠala gooiti ba, niiti è ti veeni zèa,

Ɠɔoɠɔ GALAGI, mina va bu, gè ʋa unfe.

32 Nà ɓizɛzu ɗa-leveiti ma ʋelei zu,

mazɔlɔɔ è zìi laalaoga.

33 Ee, Ɠɔoɠɔ GALAGI, kàla ga ɗa-leveiti ma ʋelei,

nà yɛ ziɛzu la eyɛsu gaaɓela.

34 Faaɠaaɠaa ɠigi ve bɛ̀, gè ɗa-lɔgi zo,

gè ɠolo bɛ ga zìimaʋɛ pɛ.

35 Lo tùɠɔ ɗa-leveiti ma ʋelei zu,

mazɔlɔɔ naa ɠa ga zìima vai.

36 Zìi ɠɛʋele ɓɛtɛ ɗa-ɠala gooiti tuɠɔ,

gè mina ʋilɛ kpɔ̀ɠɔ lɔnɔgi ʋolu.

37 Gàazuʋɛ zeɠe wafuun faiti ba,

zɛnvui ve bɛ̀ ɗa-ʋelei ma.

38 Naa ɠɛ bɛ̀, nɛ̀i gè ga ɗa-wotiɠɛ nui,

nii è ma minazeɠea naati bɛ, niiti ti luazu è ʋa.

39 Ɓaaɠulama vai maaɠooza bà, nii é màaluazu,

mazɔlɔɔ ɗa-leveiti pagɛ.

40 Wɔ̀in ma vaa wolai ɠa ga ɗa-leveiti!

Zɛnvui ve bɛ̀ ɗa-lelebodai ʋɔ.

41 Ɠɔoɠɔ GALAGI, ɗa-wooɠɛɠiladai ɠula kɛlɛma bɛ̀,

kìzo, eɠɛʋelei è mìnazeɠeni la!

42 Nà zoo gè naati gooɠaaʋote, niiti ti ɓaaɠulazu mà,

mazɔlɔɔ gè ɓɔɠɔ ɠaliva è-laawooi ma.

43 Dàaʋɛ mina zeɠe gaama ɓɔɛi ʋolu,

mazɔlɔɔ nà ɠitosu ɗa-leveiti ba.

44 Nà ɗa-lɔgi zo,

yeenɔpɛ eyɛsu ɠɔ.

45 Nà ziɛ ɓɔɠɔyeemai zu,

mazɔlɔɔ ɗa-leveiti ka gè ti ɠaiziɛzu.

46 Nà ɓɔɛ masagiti gaazu ga ɗa-ɠala gooiti,

gè la unfega da.

47 Ɗa-leveiti nɛɛʋɛ bɛ̀,

kòozunɛɛʋɛ ga gè ɠolo ti ʋɛ.

48 Nà yeemaalesu ɗa-leveiti ma, mazɔlɔɔ ti nɛɛʋɛ bɛ̀.

Nà ɠisiɛ ɗa-lɔgiti su.

49 Ɠizɛ è-laawooi zu, nii è boni mà, nɛ̀i gè ga ɗa-wotiɠɛ nui,

nii è kitogi veeni bɛ̀ su.

50 Nà-maanɔɠɔi zu, nà-ziilɛigi ɠa ga

ɗa-minazeɠegi ɠa é zɛ̀su vulua.

51 Waso nuiti ti ɲɛɛɠulani nɔ̀un su,

kɛlɛ gè la zeɠezu ɗa-lɔgi ʋolu.

52 Ɠɔoɠɔ GALAGI, kìgi ɠa ɗa-leveiti su, è ti woni kaite,

naa ɠa é zìilɛizu.

53 Zìi ɠa ɗa ɠoloɠolo, nà faa ɲɔu ɠɛ nuiti kaana,

ti ɠɛlɛai ɗa-lɔgi ʋa.

54 Nà ɗa ɗa-leveiti maawuye,

zooi nii zu, ʋɛ gè ná ga wɛɛn.

55 Ee, Ɠɔoɠɔ GALAGI, nà ɗa ɠisiɛ è zu kpidii,

nà ɗa-lɔgi zo.

56 Nii é ga nɔ̀un tosuʋɛ,

naa ɠa é ga, gè ɗa-leveiti makɛ.

57 Ee, Ɠɔoɠɔ GALAGI, nà bosu ʋolu, tòsuʋɛ ɠa é ga, gè ɠolo è-laawooi ʋɛ.

58 Gè ɠaaɓa ga zìimaʋɛ pɛ, ga gè nɛɛ è ʋɛ,

zaalai la mà, eɠɛʋelei ɗa-minazeɠegi la.

59 Gè ɠisiɛni sìɛ ʋeleiti su,

nà ɠalesu ma ɗa-ɠala gooiti ma.

60 Nà zuvilɛzu, gè la ná laazu ɠoba,

ga gè ɗa-leveiti so.

61 Anɛɛ ni faa ɲɔu ɠɛ nuiti ti sòni ga ta-ʋalii,

gè la yeemazu ɗa-lɔgi ma.

62 Kua zaamai, nà ɗa wuzeɠe ga gè è maamusɛ,

tɔɔzei ɗa-leveiti sɔle fai ʋa.

63 Nà ga naati ti-wɔɔlai, niiti ti luazu è ʋa,

ta niiti ti ɠolozu ɗa-leveiti bɛ.

64 Ɠɔoɠɔ GALAGI, ɗa-wooɠɛɠiladai eteai kpein daavegɛ,

kàla ga ɗa-leveiti.

65 Ɠɔoɠɔ GALAGI, è faanɛɛ ɠɛa bɛ̀, nɛ̀i gè ga ɗa-wotiɠɛ nui,

é zoloo è-laawooi ma.

66 Kàla ga ɠimala ʋagɔi ta keleɠelegi,

mazɔlɔɔ dàaʋɛ ɗa-leveiti da.

67 Aisa ùnmaa ʋa yei, gè ɠakani,

kɛlɛ niizu, gè è-laawooi zoga.

68 È ʋagɛ, è ɠɛ ga faanɛɛ ɠɛ nui,

kàla ga ɗa-leveiti.

69 Waso nuiti ta zɛɛ mɔinmɔin pɛɛzu mà,

kɛlɛ nà ɠolozu ɗa-leveiti bɛ ga zìimaʋɛ pɛ.

70 Ti yiilaaɠulugɛ,

kɛlɛ nɔ̀un, kòozunɛ vai ɠa ga ɗa-lɔgi zo vai.

71 É kpɛ̀tɛni, ùnmaayeini,

nii a kɛ gè ɗa-leveiti kala.

72 Tɔgi kulaai è-la, naa vizɔgɛ bɛ̀,

é leʋe zanu kae waagila (1.000) ba, ta wali ɠaei.

73 È-yeeiti ti kɛ̀ʋele ɓɛtɛa, ti sùzo,

ɠimalai ve bɛ̀, nii a kɛ gè ɗa-leveiti kala.

74 Niiti ti luazu è ʋa, ta kà, ti ɠoozunɛ,

mazɔlɔɔ kìtogɛ è-laawooi ʋa.

75 Ɠɔoɠɔ GALAGI, gè kwɛɛ ga ɗa-leveiti sɔlegɛ.

È sɔledai ɠɛɛni ùnmaayei vai zu.

76 Ɗa-wooɠɛɠiladai ɠɛ ga gàanɛɛnɛ zaɓui,

eɠɛʋelei ɗa-minazeɠegi la bɛ̀, nɛ̀i gè ga ɗa-wotiɠɛ nui.

77 Ɗa-maawɔinɠai yei mà, nii a kɛ gè zɛnvui wo,

mazɔlɔɔ ɗa-lɔgi ɠa é ga nɛ̀ɛbɛ vai.

78 Unfegi yei waso nuiti ma, tɛiti ti wɔ̀inzeɠezu wafuun.

Nɔ̀un nà, nà ɠigaiziɛzu ɗa-leveiti su.

79 È ɠaazuluaba nuiti ti ʋa ʋolu pɔ̀ bɛ,

nii a kɛ ti ɗa-ɠala gooiti kwɛɛ.

80 Nà pɔ zìi zɔle ɲɛgɛlɛin, ɗa-leveiti so fai zu,

naa ɠa a kɛ gè la unfega.

81 Zìi ɠa zoolɛzu ga ɗa-ɠizogi ma vai,

kìgi logɛ è-laawooi ʋa.

82 Gàazuʋɛ ɓɔiɗa su ga ɗa-minazeɠegi ɠaiziɛ vai.

Gè ɠɛ ma: «Ɗa gàanɛɛnɛ yeelɛ?»

83 Gè ɠɛa eɠɛ kɔlɔ woolei é ɠoloɠolosu abu luului zu,

anɛɛ naa ʋe, gè la yeemazu ɗa-leveiti ma.

84 Folo lielegɔ ɠa ɗa-wotiɠɛ nui kɛɛzu dɛ, kɛʋelei niizu?

Yeelɛ ɠa è naati tukpɔɠaaleʋezu la, niiti ti nìmizazu?

85 Waso nuiti ta zeɠei wɔɔzu tùɠɔ,

naa la zolooni ɗa-lɔgi ma.

86 Ɗa-leveiti kpein sɔlegɛ ga nu la ti la.

Ta wɔ̀inzeɠezu wafuun, ʋa è ɓɔ bà.

87 Ná tago ɠɛa de, ti ʋa ùndaaʋili,

kɛlɛ gè la ɠɛlɛzu ɗa-lɔgiti ba.

88 Zɛnvui ve bɛ̀ ga ɗa-wooɠɛɠiladai,

naa ɠa a kɛ gè deveiti so, è ti woni.

89 Ɠɔoɠɔ GALAGI, è-laawooi ɠa ná eyɛsu ɠɔ,

seizuʋɛ ɠa ná eyɛsu ɠɔ, geeɠɔlɔgi zu.

90 Ɗa-wooɠɛɠiladai ɠa yɛ ná, yeeɠɛɠalaiti pɛ su.

È eteai ɓɛtɛni, toɠa loni kpaan losuʋɛ.

91 Aniiti pɛ ta ná za, ɗa-levei zaɓui zu,

mazɔlɔɔ eteai kpein ka è yeema.

92 Ni ɗa-lɔgi la ɠɛni zìimani,

nà la za kaite nà-maanɔɠɔi zu.

93 Eyɛsu pɛ gè la yeemaa ɗa-leveiti ma,

naati ka è vaazu bu, gè zɛnvui wo ti zaɓui zu.

94 Nà ga ɗɔnɔ, kìzo.

Mazɔlɔɔ nà ɠaaɓaazu, gè ʋilɛ ɗa-leveiti polu.

95 Faa ɲɔu ɠɛ nuiti ta pàa ɠeleɠelegi ɠaiziɛzu,

kɛlɛ nɔ̀un, gòilogɛ ɗa-ɠala gooiti ma.

96 Gè pɛtɛgɛ ga kwɛ ka ani ʋapagi kpein ba,

kɛlɛ ɗa-leveiti, kwɛ ge la ba.

97 Ee, ɗa-lɔgi nɛɛʋɛ bɛ̀!

Nà ɗa ɠisiɛ su yeenɔpɛ.

98 Ɗa-levei ɠa kɛ̀ɛzu ga ɠima nu, gè leʋe sìli nuiti ba,

mazɔlɔɔ toɠa zèa yeenɔpɛ.

99 Gè ɠimalai zɔlɔɔga, gè leʋe nà-kalamɔinti kpein ba,

mazɔlɔɔ nà ɠisiɛzu ɗa-ɠala gooiti su.

100 Ɠigi ɠa mà, é leʋe kɛwola wɔlɔiti ba,

tɔɔzei nà ɠolozu ɗa-leveiti bɛ.

101 Gè la kɛɛni, kɔ̀ɠɔi ʋa ʋilɛ faa ɲɔu ɠɛ ʋele nɔpɛ ma,

nii a kɛ gè è-laawooi zo.

102 Gè la maaɠoozani ɗa-leveiti ba,

mazɔlɔɔ ɗa ɠa è kàlasu.

103 Ɗa-minazeɠegi nɛɛʋɛ dàa ɠoozuʋɛ,

é leʋe kɔin gulɔi ʋa dàaʋɛ.

104 Ɗa-leveiti ti kɛ̀a ga ɠima nu,

naa ɠa é kɛa gè zɛɛ ʋeleiti kpein wɔinzeɠea.

105 È-laawooi ɠa ga lanboi kɔ̀ɠɔ wu,

ta wozakalagi é volozu nà-pelei zu.

106 Gè minazeɠeni, nà ma, nà nà-minazeɠegi zo,

gè ɠolo ɗa-leveiti bɛ, tɔɔzei ti zɔlegɛ.

107 Ti gòla maanɔɠɔni,

ee, Ɠɔoɠɔ GALAGI, zɛnvui ve bɛ̀, eɠɛʋelei è-laawooi bogai la.

108 Ee, Ɠɔoɠɔ GALAGI, yeezei nà-maamusɛ wooi wu,

è kàla ga ɗa-leveiti.

109 Zɛ̀nvui ɠa faaɓaagi laawu yeenɔpɛ,

kɛlɛ gè la yeemazu ɗa-lɔgi ma.

110 Faa ɲɔu ɠɛ nuiti ta balii zeizu tùɠɔ,

kɛlɛ gè la zeɠezu ɗa-leveiti polu.

111 Ɗa-ɠala gooiti ta nɔ̀un bɛ ɠɔ, ga ani ɓii gola,

tiya ɠa ti kòozunɛɛzu zìimaʋɛ.

112 Gè devea zìimaʋɛ ga gè ɠolo ɗa-lɔgiti bɛ,

yeenɔpɛ, eyɛsu ɠɔ.

113 Gè woovele nuiti wɔinzeɠea,

kɛlɛ ɗa-lɔgi nɛɛʋɛ bɛ̀.

114 Ɗa ga dɔ̀ɔɠuzuʋɛ ta nà-kɔɔɠɔ zɛpɛgi,

kìtogɛ è-laawooi ʋa.

115 À maaɠooza bà, faa ɲɔu ɠɛ nuiti,

naa ɠa a kɛ gè nà-GALAGI ná-deveiti so!

116 Yeezei bù eɠɛʋelei ɗa-minazeɠegi la, naa ɠa a kɛ gè zɛnvui wo,

mina kìteʋe.

117 Ɠɛ ga pòluzeigi, naa ɠa a kɛ gè ɠizo,

gè la ɠaazuzeɠea ɗa-leveiti ba eyɛsu ɠɔ.

118 Ɗa naati daaʋilisu, niiti ti zeɠezu ɗa-leveiti polu,

mazɔlɔɔ ta-ɠisiɛi ɠa nɔ ga zɛɛ vai.

119 Ɗa faa ɲɔu ɠɛ nuiti pilisu ya, niiti ti eteai zu, eɠɛ kaʋai,

naa ɠa é ba, ɗa-ɠala gooiti nɛɛʋɛ bɛ̀.

120 Kpùsɛi ɠa ɓalizu ga dualuagi, è seizu mà,

nà luazu ɗa-leveiti ba.

121 Nà ziɛzu ga sɔledai ta telebodai,

mina ɠɛlɛ bà, è ʋa dɔ̀ nìmiza nuiti zeezu.

122 Ɠɛ ga pòluzeigi, nɛ̀i gè ga ɗa-wotiɠɛ nui, nà-undaanɛɛi vaa zu,

mina yeeɓe bà, waso nuiti ti ʋa nìmiza.

123 Gàazu ɓɔiɗa su ga ɗa-ɓɔbai maaɓɔun fai,

ta ɗa-ɠizogi, nii è ma minazeɠeni.

124 Faa ɠɛ bɛ̀, nɛ̀i gè ga ɗa-wotiɠɛ nui, eɠɛʋelei ɗa-wooɠɛɠiladai la,

è kàla ga ɗa-leveiti.

125 Nà ga ɗa-wotiɠɛ nui, ɠigi ve bɛ̀,

ga gè ɗa-ɠala gooiti kwɛɛ.

126 Ɠɔoɠɔ GALAGI, yeeɠɛɠalai ɠa è wuzeɠe,

ti ɗa-lɔgiti koloɠologa.

127 Nɔ̀un nà, ɗa-leveiti nɛɛʋɛ bɛ̀,

é ɓudɛ zanugi maazu, anɛɛ zanu kitei.

128 Gè ɗa-lɔgiti kpein pɛtɛgɛ ga ti zɔlegɛ, zeeɠaaɠwɛɛzu nɔpɛ ge la ba,

gè zɛɛ ʋelei kpein wɔinzeɠea.

129 Ɗa-ɠala gooiti pagɛ gola,

naa ɠa é ba, nà makɛsu ti ma ga pagɔ.

130 È-laawooiti ma ɠulakɛlɛmai ɠa ɗa wozakalagi ve,

toɠa ɗa ɠigi ve naati bɛ, niiti ti la dɛ faa mɔinmɔin kwɛni.

131 Ɗa-leveiti nɛɛʋɛ bɛ̀ gola,

nà ti magalasu ga zìimaʋɛ pɛ.

132 Ɠaaʋote mà, è zaalai la mà,

eɠɛʋelei è deveai la naati bɛ, niiti ti è nɛai ʋɛ.

133 Sɛ̀bɛlɔ, eɠɛʋelei ɗa-minazeɠegi la,

mina va bu, faa ɲɔu nɔpɛ ge ʋa zobo sɔlɔɔ mà.

134 Fìe, è kùla nìmiza nuiti zeezu,

naa ɠa a kɛ gè ɗa-lɔgiti so.

135 Yeezei bù ga pagɔ, nɛ̀i gè ga ɗa-wotiɠɛ nui,

kàla ga ɗa-leveiti.

136 Gàazuɗɛi ɠa yeizu eɠɛ kɔtuɗɛi,

tɔɔzei nuiti ti la ɗa-lɔgi zosu.

137 Ɠɔoɠɔ GALAGI, è zɔlegɛ,

è lelebogɛ ɗa-leveiti su.

138 Ɗa-ɠala gooiti è ti veezu,

ta ga gaamai, ti zɔlegɛ.

139 Zìi ɠa ɠalazu kòozu,

tɔɔzei sìli nuiti ti yeema è-laawooiti ma.

140 Ɗa-minazeɠegi ma ladalai ɠulaʋɛ kɛlɛma,

naa ɠa é ba, ti nɛɛʋɛ bɛ̀, nɛ̀i gè ga ɗa-wotiɠɛ nui.

141 Nà ga nui tosu wola la ba, ti bɛ̀lɛʋiligai,

kɛlɛ gè la yeemazu ɗa-leveiti ma.

142 Ɗa-lelebodai ɠa ga ɠɔoɠɔ kelei,

ɗa-lɔgi ɠa ga gaamai.

143 Kidaaʋiligi zeelia mà, nà koozuʋiligi zu,

kɛlɛ ɗa-leveiti ka ti ga nɛ̀ɛbɛ vaiti.

144 Ɗa-ɠala gooiti sɔlegɛ eyɛsu ɠɔ.

Ɠigi ve bɛ̀, nii a kɛ gè zɛnvui wo.

145 Ee, Ɠɔoɠɔ GALAGI, nà wooɠulazu è ma ga zìimaʋɛ pɛ, gòoɠaaʋote,

nà ɠolo ɗa-leveiti bɛ.

146 Nà wooɠulazu è ma, ʋa, è kìzo,

naa ɠa a kɛ, gè ɗa-ɠala gooiti so.

147 Nà wuzeɠezu aisa geelaa ʋa lao, gè wooɠula è ma ga è ɓɔ bà,

kìtogɛ è-laawooi ʋa.

148 Nà ɲiizu ɠaazu ɠa,

nii a kɛ gè ɗa ɠigaiziɛ ɗa-minazeɠegi zu.

149 Ee, Ɠɔoɠɔ GALAGI, woilo gòoi ma, ɗa-wooɠɛɠiladai zu,

è zɛ̀ vulua, eɠɛʋelei ɗa-leveiti ti la.

150 Niiti ti faa ɲɔi ɠɛʋele ɓɛtɛzu, naati ta maaɓuɠaʋɛ bà,

ti maaɠoozaʋɛ ɗa-lɔgi ʋa.

151 Kɛlɛ, ɗa ɠa è kòba, ee, Ɠɔoɠɔ GALAGI,

ɗa-leveiti kpein ta ga gaamai.

152 Gè suɠwɛɛ kaite ga è ɗa-ɠala gooiti seini,

ta yɛsu ná ɠɔ.

153 Nà-maanɔɠɔi ʋɛtɛ, è ùnmɔɔ,

mazɔlɔɔ gè la yeemazu ɗa-lɔgi ma.

154 Màalogi wo, è ùnmɔɔ,

zɛnvui ve bɛ̀, eɠɛʋelei ɗa-minazeɠegi la.

155 Kizo fai maaɠoozaʋɛ faa ɲɔu ɠɛ nuiti ba,

mazɔlɔɔ ti la ɠolozu ɗa-leveiti bɛ.

156 Ee, Ɠɔoɠɔ GALAGI, ɗa-maawɔinɠai zuwɔɔlɔʋɛ!

Zɛnvui ve bɛ̀, eɠɛʋelei è deveai la.

157 Sìli nuiti ta wɔ̀inzeɠe nuiti mɔinʋɛ,

kɛlɛ gè la ʋoluavega ɗa-ɠala gooiti ba pɛ.

158 Nà wooʋalada nuiti kaana, nà ɗa ti wɔinzeɠe,

ti la ɠolozu ɗa-leveiti bɛ.

159 Ee, Ɠɔoɠɔ GALAGI, ɠizɛ su ga ɗa-leveiti nɛɛʋɛ bɛ̀!

Ɗa-wooɠɛɠiladai maaʋele ma, zɛnvui ve bɛ̀.

160 È-laawooi ma ungi ɠa é ga gaamai,

ta ɗa-leveiti kpein ti zɔlegɛ, ta yɛsu ná ɠɔ.

161 Zobobɛ nuiti ta wɔ̀inzeɠezu wafuun,

kɛlɛ sàsu la ɓalia, kɛni è-laawooi nɔ luɠɔ.

162 Kòozunɛɛʋɛ è-laawooi ma,

eɠɛ nui nii é naavolo wola zɔlɔɔgai.

163 Zɛɛi maayo ge la bɛ̀, gè wɔinzeɠeʋɛ,

kɛlɛ ɗa-lɔgi ɠa nɛai bɛ̀.

164 Nà ɗa è maamusɛ ná zeizu ɠɛ lɔfela foloi ma,

ɗa-leveiti faa zu, ti zɔlegai.

165 Ziilɛi gola ɠa naati bɛ, niiti ɗa-lɔgi nɛai ti ʋɛ,

ani nɔpɛ ge la ti ɠɔɠɔziɠaa, ti ʋa loo.

166 Kìtogɛ è ʋa, Ɠɔoɠɔ GALAGI, ga ɗa kìzo,

nà ziɛzu ga ɗa-leveiti.

167 Nà ɗa-ɠala gooiti sosu ga zìimaʋɛ pɛ,

tɔɔzei ti wola nɛɛʋɛ bɛ̀.

168 Nà ɗa-lɔgiti ta ɗa-ɠala gooiti sosu,

mazɔlɔɔ è sìɛ ʋelei kpein kwɛɛ fai pɛ su.

169 Ee, Ɠɔoɠɔ GALAGI, nà-kpee wooi zeeli è ma,

faaɠaaɠaa ɠigi ve bɛ̀, é zoloo è-laawooi ma.

170 Nà-maanɛɛnɛ wooi zeeli è ma,

ùnmɔɔ, eɠɛʋelei è minazeɠeni la.

171 Dàkɔlɔgiti ti è maamusɛ gola,

mazɔlɔɔ ɗa kàlasu ga ɗa-lɔgiti.

172 Nɛ̀gi è-laawooi maamusɛ,

mazɔlɔɔ ɗa-leveiti kpein sɔlegɛ.

173 È-yeei ʋa é ɓɔ bà,

mazɔlɔɔ gè yiimazeɠea ga ɗa-lɔgiti.

174 Ɠɔoɠɔ GALAGI, wɔ̀inma vaa wolai ɠa ga è kìzo,

ɗa-lɔgi ɠa é ga nɛ̀ɛbɛ vai.

175 Gè yɛ vulua, gè ɗa è lɛbi,

ɗa-leveiti ti ɓɔ bà.

176 Nà leʋeteʋesu eɠɛ baalagi nii toai ya.

Ʋa, è gàiziɛ, nɛ̀i gè ga ɗa-wotiɠɛ nui,

mazɔlɔɔ gè la yeemazu ɗa-leveiti ma.

Bíblia Online

Veja também

Oração para pedir a Deus que aumente a fé quando o coração está cheio de dúvida

Como o amor de Deus cura as dores de relações passadas?