Guyeiti 76

GALA ka é ga zobo sɔlɔɔ nui

1 Guyei loo ɠundiɠii nɔnɔi ʋe. É loozu ga kɔnigiti. Azafe ná-guyei. Guyei.

2 GALA ge ɓɔɠɔ lɛɛni Zuda yooi zu,

daaseigi wɔɔlɔʋɛ Izilayɛle yooi zu.

3 Ná-seɠe ʋɛlɛi ɠa Salɛme,

seizuʋɛ ɠɛ Siyɔn.

4 Miná ɠa é kɔɔɠɔ zɔɔlaiti galeɠaleni ná,

mɛɛinti, ta kɔɔɠɔ zɛpɛgiti, ta boɠa zɔkpɔiti.

Lo!

5 Ee, GALA, ɗa volozu,

è maayiki, é leʋe gizeiti ba, ʋɛti è è zili nuiti koloɠoloni ná.

6 Ti salaʋusu ɠɛzɛɠɛzɛgiti maavooni,

ti loa bu ɲiimɛnii zu, ta-ɲiimɛni ɠaaɓelagi.

Naama ɠɔɔɠɔ nu ɠɛzɛɠɛzɛgiti, ti la zooni ti ʋa ɓɔɠɔ maalobo.

7 Zakɔɓe ná-GALAGI, siɛgi zu è zelii loni da ti ma,

kɔɔɠɔ wotoloiti kpizɛ nuiti ta sooiti ti naʋalani.

8 È maayikiʋɛ!

Ɓɛ ɠa a zoo losu è ɠakala, ɗa-yiiɠaawanai ʋa ziɛgi zu?

9 È yɛni geeɠɔlɔgi ungaʋɛ, è ɗa-lukpɔɠaaleʋe vai lɛ,

eteai ɠaaluani, é zei kpɛ,

10 siɛgi zu, ee, GALA, è wuzeɠeni la, è faawogi wo,

è ʋa ga kizogi naati kpein pɔ, niiti ti maawɔinɗai eteai zu.

Lo!

11 Anɛɛ nuɓusɛiti ta-yiiɠulagi ɠa ɗa valibo, é ɠɛ ga maamusɛ vai è ʋɛ,

niiti ɗa-yiiɠulagi ʋoolazu ti ʋa, naati ta fɛtii ɠula ɗɔun è ʋɛ.

12 À minazeɠegiti bo Ɠɔoɠɔ GALAGI wa-ƓALAGI ʋɛ, wo ti laazeeli.

Niiti kpein ti maaɠoolii zu, naati ti ʋa ga vebɛaniiti maayiki ƓALAGI ʋɔ bɛ.

13 Mazɔlɔɔ toɠa kundiɠiiti ta-waso fiilɛi ɠula ti zu,

maayikiʋɛ, etea masagiti zea.