1 À Ɠɔoɠɔ GALAGI maamusɛ!

Mazɔlɔɔ soloogɛ nu guyei loo ada-ƓALAGI lɛbi vai ma,

mazɔlɔɔ faa ʋagɔ ʋe ta fizɔgɛ ga nu maamusɛ.

2 Ɠɔoɠɔ GALAGI ɠa Zeluzalɛme losu ʋolu,

Izilayɛle nui niiti ti liini ga tiye duɔlai zu, toɠa naati gaalɛ ba náʋɛ.

3 Toɠa naati balo, niiti ti yiiɠoloɠologai,

é ta-ʋalaiti gaaɠili.

4 Toɠa a ɗa somideɠaiti tiegi leve ba,

é ti ɠilagilagi laaseigi ʋɛɛ.

5 Ade-Maliɠii wɔɔlɔʋɛ, ná-zobogi maayiki,

ná-keleɠelegi ɠwɛ ge la ba.

6 Ɠɔoɠɔ GALAGI ɠa ɗa ɓɔɠɔmaayei nuiti suzo,

kɛlɛ toɠa ɗa nu ɲɔiti toka, é ti la mɛɛn zooi ma.

7 À guyei loo Ɠɔoɠɔ GALAGI ʋɛ ga faanɛɛ wuuɠwɛɛgai.

À guyei loo ada-ƓALAGI lɛbi vai ma ga kɔnigi.

8 Toɠa ɗa geeɠɔlɔgi maalɔɔɠu ga tonaɓiingiti,

é tonai ɠɛʋele ɓɛtɛ eteai ʋɛ,

é tufaiti pɔnɔ gizeiti ma.

9 Toɠa ɗa togani ɓulugiti daamianigi ve ti ya,

è kalawɔni yiʋoiti kɔnɔgi ve ti ya, siɛgi zu ti ɓainsu da ga pului.

10 Sooi ná-suɓaai la gaazu ga faa nɔpɛ,

kɔɔɠɔ nui ná-zɛbɛi laade, a ɗa ziilɛi.

11 Kɛlɛ Ɠɔoɠɔ GALAGI wɔinʋɛ ga naati, niiti ti luazu ba,

niiti ti ɠitosu ná-wooɠɛɠiladai ʋa.

12 Zeluzalɛme, Ɠɔoɠɔ GALAGI lɛbi!

Siyɔn, ɗa-ƓALAGI maamusɛ!

13 Mazɔlɔɔ é ta ɓɔgɛ è makɛ vai ʋa,

toɠa tuya loozu è-lointi pɛ bɛ è ʋɔ bɛ.

14 Toɠa ɓaazu ɗa-you ɠwɛgiti ma, ɗa zoo è zei ziilɛigi zu,

toɠa molo ʋagɔi ɠɛɛzu ga wo-laamianigi.

15 Toɠa ná-devei leʋesu eteai zu.

Daawooi ɠa ɓizɛzu fala.

16 Toɠa kɔɔlɛ vukɔi vazasu eɠɛ baala deɠai,

é ɓumugi vaza eɠɛ zuʋui.

17 Toɠa sakɔtui ʋilisu eɠɛ kɔtui.

Ɓɛ ɠa a ziɛ ná-dɛii wu?

18 Kɛlɛ a devei veena feya, ti ɠaa ɠa ɗa wuun,

a ná-fiilɛi ʋuuna ti ma, ti-ma ɗɛi ɠa ɗa yei.

19 Toɠa daawooi wosu Zakɔɓe ma,

é ná-deveiti ta ná-tɔgiti fe Izilayɛle ya.

20 É la ɠɛni naa ɠɛɠala ɠɛɛni zii taɠili nɔpɛ bɛ,

tanɔpɛ ge la ná-tɔgi ta ɠwɛɛ.

À Ɠɔoɠɔ GALAGI maamusɛ!