1 Siɛgi zu Izilayɛle nuɓusɛiti ti ɠulani la Ezipete yooi ʋa,

siɛgi zu Zakɔɓe mavofodaiti ti ɠulani wɛɛn nuɓusɛiti saama,

2 Zuda yooi ɠɛni ga Ɠɔoɠɔ GALAGI zeizu ɲadegai,

Izilayɛle ɠɛ ga ná-zooi.

3 Kpoloɗɛi naa ɠaani, é ɓizɛ,

Zuludɛn ɠaaɠaleni ma ga ʋoluʋelei.

4 Gizeiti ti ɠɛni ʋilisu ga baala sinɛ wolaiti kɛʋele,

gize goiti ti ɗa ʋili ga baala ziʋoiti kɛʋele.

5 Toɠa ɠale, kpoloɗɛi, è ʋelani ɠana?

Ɗa ma, Zuludɛn, toɠa ɠale è ɠaleni ma ga ʋoluʋelei?

6 Wa ma, gizeiti, toɠa ɠale wo ʋilini eɠɛ baala sinɛ wolaiti?

Wa ma, gize goiti, toɠa ɠale wo ʋilini eɠɛ baala ziʋoiti?

7 Ee, eteai, ɓali Maliɠii ɠakala,

Zakɔɓe ná-GALAGI ɠakala,

8 nii a ɗa fasai valibo, é kɛ ga kpoigi,

é kɔtui ɠɛ ga ziɛungi.