Guyeiti 60

GALA sɛbɛi zu, gá pilɛ sɔlɔɔ nɔ fai pɛ su

1 Guye loo ɠundiɠii nɔnɔi ʋe. Nii é loozu é zoloo guye wooi ma, nii daa ga: «Bulɛgi ma ʋuaiti». Zeele wooi. Davide ná-guyei, kalagi wosu da. 2 Siɛgi zu é kɔɔi ʋɛɛni la Siili yooi zu nuiti ba, niiti ti Mezopotami, ta Soɓa. Zoaɓe ɠalesuʋɛ ma, é Edɔme nu waapuugɔ maazu felegɔ (12.000) ʋaani Kpolo Ʋɛtugi zu.

3 Ee, GALA, è ɠɛlɛa gi ʋa, è gá-ɠɔɔi ɠoloɠologa.

È ɗa-yiiɠaawanai ɠula kɛlɛma, niizu, gi ɓɛtɛna ʋolu.

4 È eteai ɲiikpiga, è bali ga.

Galeɠalezuʋɛti kpɛtɛ, mazɔlɔɔ toɠa ɲiikpisu.

5 È ʋoluɠula vaa ɓaa golaiti seiɗa ɗa-nuɓusɛiti ma,

è gaazulati dɔɔi loga gi-la.

6 È poo gila fea nuiti zea, niiti ti luazu è ʋa,

ti ʋa ʋela ti zili nuiti ta-ɠɔɔɠɔi ʋa.*60:6 ti ʋa ʋela ti zili nuiti ta-ɠɔɔɠɔi ʋa: Tati pelei taɠili ɓalaa ka ga nii: é ɠɛ ga gaamai ná-kulanumai

Lo!

7 Gi unmɔɔ ga è-yeezai, gi wooɠaaʋote,

naa ɠa a kɛ è nɛɛbɛ nuiti ti unmɔɔ.

8 GALA ge ɓɔɛni seizu ɲadegai,*60:8 seizu ɲadegai: Tati pelei taɠili ɓalaa ka ga nii: ná-ɲadedai zu é ɠɛ ma: «Pilɛ sɔlɔɔ nui ɠa é ga ze!

Nà Sikɛme ɠaaɠwɛ su, gè Sukɔte nɛmɛi ɠaaɠwɛ.

9 Galaade ɠa ga nɔ̀nɔ, Manasé ɠa ga nɔ̀nɔ,

Efelayime ɠa ga kɔɔɠɔ wɔɔlɔgi ùnba,

Zuda ɠa ga nà-masa tukpɔi.

10 Moaɓe ɠa ga kokoi, nii gè maagbazu su,

nà-saʋala pilisuʋɛ ɠa ga Edɔme yooi.

Nà pilɛ sɔlɔɔ kpeei loozu Filisiti nuiti ta-yooi laalɔɠɔma.»*60:10 Nà pilɛ sɔlɔɔ kpeei loozu Filisiti nuiti ta-yooi laalɔɠɔma: Tati pelei taɠili ɓalaa ka ga nii: Filisiti nuiti ta zɔngɔzu mà

11 Ɓɛ ɠa a li ga ze taa wolai zu, nii siɠigi ma?

Ɓɛ ɠa a li ga ze Edɔme?

12 Ee, GALA, ɗa laade ɓaa, è ɠɛa ɠɛlɛni gi ʋa?

Ee, GALA, siɛgi zu gá-ɠɔɔɠɔ nuiti ti ɠɛni ɠulazu la, è la mɔ ɠɛni ʋilɛsu ti ʋolu.

13 Ɓɔ gi ʋa gi zili nuiti daalɔɠɔma,

mazɔlɔɔ nuɓusɛiti ta-ɓɔbai ɠa nɔ ga wafuun faa.

14 Ni GALA ka ade ʋa, ada pilɛ sɔlɔɔ,

mazɔlɔɔ tɔ ɠa é ade zili nuiti dɛɛvɛzu.