Guyeiti 64

Makɛ mà!

1 Guye loo ɠundiɠii nɔnɔi ʋe. Davide ná-guyei.

2 Ee, GALA, woilo gòoi ma, siɛgi zu gè kpalagi wosu da!

Zɛ̀nvui makɛ sìli nuiti daalɔɠɔma, gè luazu ti ʋa!

3 Kìzo nu ɲɔiti daayaavai ma,

ta naati ta-woya vaiti ma, niiti ti faa ɲɔi ɠɛɛzu.

4 Ta ti-nɛgi ɠaalizu eɠɛ boɠa zɔkpɔi,

ta nu maawana ɓɔɛiti bosu, eɠɛ mɛɛinti ti ʋilisu,

5 é ʋilisu dɔɔɠuzu telebo nui ma.

Ta pilisu ma ga kulafilibai, inɛinɛ ge la ti ʋa.

6 Ta ɓɔɠɔ zasulɔɔzu kpɔɛ ɲɔu wogaiti su,

ta bosu ga ti baliiti da, ti maalɔɔɠu,

ti ɗa ɠɛ ma: «Ɓɛ ɠa a ti ɠa?»

7 Ti ɗa yaavaiti kpɛtɛ, ti ɠɛ ma:

«Wɛlɛ, ade ɠɛʋele ɓɛtɛa, ada-vaa ɓɛtɛi zolooga su!»

Ungo, kigaiziɛi, nu zii ɠa ga zeɠezaɠai.

8 Kɛlɛ GALA ka mɛɛin ʋilisu ti ma ga kulafilibai,

tiya ɠana ti zuloɠaai.

9 Ti-nɛgi ɠa é ti ɓunɛgai.

Nuiti ta ti ʋɛtɛna, ti ɗa ɠɔmɔɔni ga tiye.

10 Dualuagi nuɓusɛiti kpein sogɛ,

ta GALA ná-kɛɛwotii ɠulazu kɛlɛma,

ti ná-kɛɛwotiiti gaaɠa.

11 Telebo nui ɠa ɠoozunɛɛzu Ɠɔoɠɔ GALAGI ná-fai zu, é lɔɔɠu pɔ bɛ.

Niiti dɔin ti-yii zɔlegai, naati ta ɓɔɠɔ maamusɛ.